Փաստ ինֆո

«Հատուկ անվտանգության ծառայություն» ՍՊԸ-ի կողմից Ամուլսարի տարածքում «Լիդիան Արմենիա» ՍՊԸ-ին մատուցվող պահնորդական ծառայությունը կասեցվել է, իսկ ընկերությունը նոր պայմանագիր է կնքել։ «Լիդիանի» հետագա քայլերի, մարտահրավերների մասին «Փաստինֆո»-ն զրուցել է «Լիդիան Արմենիա» ընկերության իրավաբանական գծով ղեկավար Խորեն Նասիբյանի հետ։

-Պարոն Նասիբյան, հայտնի դարձավ, որ «Հատուկ անվտանգության ծառայություն» ՍՊԸ-ի կողմից Ամուլսարի տարածքում «Լիդիան Արմենիա» ՍՊԸ-ին մատուցվող մասնավոր պահնորդական գործունեության իրականացումը կասեցվել է, ինչո՞ւ։ Ձեր գնահատականը։

-Նախ չի կասեցվել «գործունեության իրականացումը»։ Մասնակի կասեցվել է պահնորդական ծառայության գործունեության լիցենզիան, ու բացառապես այն պատճառով, որ տարածքում մի քանի պահնորդ չի ունեցել համապատասխան որակավորման վկայական։ Պահնորդական ընկերությանը տրվել է ժամանակ` այդ բացը լրացնելու համար։ Որեւէ այլ իրավական խնդիր պահնորդական ծառայության որեւէ այլ գործողության հետ կապված, այդ թվում՝ Ամուլսարում, չի հայտնաբերվել։ Անկախ այս հանգամանքից, մեր պայմանագիրը այդ պահնորդական ծառայության հետ լրանում էր սեպտեմբերին, եւ մենք արդեն տարածքում ունենք նոր պահնորդական ծառայություն։

-Փաստորեն, արդեն այլ  պահնորդական ծառայության հետ պայմանագիր եք կնքել։ Ի՞նչ քայլեր եք պատրաստվում ձեռնարկել։

-Իհարկե, եւ շատ ավելի վաղուց, քան նախորդ պահնորդական ծառայության լիցենզիայի հետ կապված վարչական վարույթը։ Մենք գիտեինք, որ սեպտեմբերին պայմանագիրը լրանում է ամեն դեպքում։ Գիտեք, ապօրինություն իրականացնող խմբավորման ոգեւորությունը, էմոցիոնալ վայրիվերումները մեր պահնորդական ծառայության հետ կապված առնվազն ծիծաղելի են։ Ես հասկանում եմ, որ այս մարդիկ սովորել են, որ երկու տարի իրենք իրականացնում են անպատիժ ապօրինություն, ու իրենց բոլոր կապրիզները իրականանում են, բայց եթե այս մարդկանց ակնկալիքն է, որ իրենք այդ փոքրաթիվ խմբով խանգարելու են համայնքին աշխատել, եւ կամ նոր պահնորդական ծառայությունը չի իրականացնելու իր գործառույթները, պետք է հիասթափեցնեմ։ Մենք օրենքի սահմաններում բոլոր հնարավորությունները օգտագործելու ենք համայնքում մեր աշխատակիցներին պաշտպանելու համար, եւ պահնորդները դրա համար կիրառելու են օրենքով թույլատրված բոլոր միջոցները։

-Քաղաքային իշխանությունները  Ամուլսարի տարածքից հանեցին Լիդիանի տեղադրած վագոն-տնակները, կասեցրեցին պահնորդականի գործունեությունը, ինչպես պահանջում էին բնապահպան-ակտիվիստները, մերժեցին քրեական գործ հարուցել Ջերմուկի քաղաքապետի դեմ, ինչպես դուք էիք պահանջում։ Միաժամանակ շարունակում է փակված մնալ դեպի Ամուլսար տանող ճանապարհը, այսինքն՝ չեք կարողանում գործունեություն ծավալել։ Կարծես թե քաղաքական իշխանությունները չեն ողջունում հանքի շահագործման ուղղությամբ Ձեր կողմից իրականացվող քայլերը։ Ձեր գնահատականը։

 - Նախ հայտնեմ, որ մենք դեռևս չենք ստացել նշված քրեական գործը մերժելու վերաբերյալ վարույթն իրականացնող մարմնի որոշումը, ինչը սակայն չեմ բացառում, հաշվի առնելով այն հանգամանքը, թե ովքեր են հետաքննության մարմնի ներկայացուցիչները, ինչ կապ ունեն ցուցարարների հետ և որն է նրանց կաշկանդվածության աստիճանը լրիվ, բազմակողմանի և օբյեկտիվ  քննություն իրականացնելու հարցում։ Մենք, ամեն դեպքում, օրենքով նախատեսված բոլոր միջոցներն օգտագործելու ենք, իրավական լուծումներ ստանալու համար։ Քաղաքային իշխանությունը, կարծում ենք, նախ՝ պետք է քաղաքի ու համայնքի շահից ելնի։ Մենք, համենայն դեպս, միայն այդ տրամաբանության մեջ ենք գործում, ու վստահ ենք որ համայնքը սպասում է Ամուլսարում լայնամասշտաբ աշխատանքների վերսկսմանը ու օրենքի վերականգնմանը։

- Եթե պետությունը իր գործողություններով թույլ չի տալիս գործարկել հանքը, ինչու չեն չեղարկում Լիդիանի հետ պայմանագիրը։

-Ես կարծում եմ, այստեղ խոսքը ոչ այնքան գործողությունների, որքան անգործության մասին է։ Մենք ամեն ինչ անելու ենք օրենքը վերականգնելու համար։ Տարածքում արդեն սկսել ենք համայնքի բնակիչների ներգավումը նախնական վերականգնողական աշխատանքներում։ Ինչ է անելու պետությունը, չեմ կարող ասել։ Կարող եմ ասել, որ օրենքի տեսանկյունից պետության միակ անելիքը այս պահին օրենքը վերականգնելն ու ապօրինություն իրականացնողների ձեռքը բռնելն է։ Մնացած ամեն ինչի համար Լիդիանն ունի եւ օրինական ձեռք բերված թույլտվությունները եւ համայնքում աշխատել ցանկացող հարյուրավոր մարդկանց աջակցությունը։ Որեւէ բան չեղարկելու իրավական ոչ մի հիմք չկա, ու այդ մասին պետության կողմից ամենաբարձր մակարդակով հայտարարվել է դեռեւս անցյալ տարի։

Աղբյուր` Փաստինֆո