Փաստ ինֆո

«Լավ եմ, դիմանում, եմ, հուսով եմ ինձ բան չի լինի։ Ջհանդամ եկել- կպելա, մարդու համարա»,- Մարտունու համայնքապետ Արմեն Ավետիսյանը հաստատում է՝ ինքը նոր տիպի կորոնավիրուսով է վարակված, սակայն պատկերացում չունի՝ ումից է վարակվել։

«Երբ ինձ հարցնում են ո՞ւմից ես վարակվել՝ ասում եմ մեկ չինացուց։ Եթե այդ մի հոգին ամբողջ աշխարհի կեսին վարակեց, մենք ո՞վ ենք, որ չվարակվենք»։

Համացանցում տեղեկություն էր տարածվել, թե քաղաքապետը՝ 25-ամյա դստեր նշանդրեքին արդեն թեստ էր հանձնել կնոջ և որդու հետ, սակայն պատասխանին չսպասելով՝ մասնակցել է միջոցառման։ Արմեն Ավետիսյանը հերքում է այս տեղեկությունը։

«Թեստը հաստատվել է շաբաթ երեկոյան, ինձ տեղեկացրել են կիրակի երեկոյան։ Կիրակի էլ հայտարարել ենք։ Ուրբաթ օրը առավոտը 38 աստիճան է եղել ջերմությունս, զգուշավոր լինելու համար թեստ հանձնեցի։ Ծանր չէի զգում, մաշկիս վրա ցավ էի զգում, մտածեցի քաղաքապետարանում մարդկանց հետ շփվում եմ, թեստ հանձնեմ»։

Ավետիսյանների ընտանիքի բոլոր՝ 6 անդամները վարակված են և մեկուսացված։ Նրանցից ամենաերիտասարդը համայնքապետի դուստրն է 25 տարեկան է։ Հենց նրա 150 հոգանոց նշանդրեքի մասին են պտտվող լուրերը, որը համայնքապետը ևս հերքեց.

«Նշանդրեքը իմ խնամու և իմ ընտանիքն է եղել. 30 հոգով նշանդրեք ենք արել, մինչև այդտեղ գնալը որևէ մեկը չի իմացել, որ ինքը վարակված է կորոնավիրուսով։ Ուրբաթ օրը մենակ ես եմ թեստ հանձնել, կիրակի իմացել եմ պատասխանը, ընտանիքիս անդամները երկուշաբթի են թեստ հանձնել, երեքշաբթի պատասխանը ստացել։ Ինչի մասին է խոսքը։ Խոսում են չար լեզուները։ Նշանդրեքին եղե՞լ են, գիտե՞ն քանի հոգի է եղել, թող գային, մասնակցեին, չնայած արգելված էր ավել հյուր կանչել»,- ասաց Ավետիսյանը։

«Երբ զգացի վատ եմ զգում, փորձել եմ բոլորից հեռու մնալ, ընտանիքիս հետ չէի կարող չշփվել։ Կնոջս եմ վարակել, կինս էլ երեխաներին։ Մեր տանն էլ հոգնել եմ ասելով, կարգը պահեն, մտնելուց իրար պաչում են, առավոտը զարթնում են, գնում են գործի՝ իրար պաչում են։ Մեր տան մեջ դա դրվածք է, ասել եմ գոնե կորոնավիրուսի ժամանակ թարգեք։ Իմ աղջիկները ասում են չէ, պապ, պիտի պաչենք »։

Համայնքապետի 25 –ամյա դուստրը, ըստ Ավետիսյանի, ինքն է խնդրել բազմամարդ հավաք չկազմակերպել.
«Աղջիկս երիտասարդ է, բայց չորս ինստիտուտ է ավարտել, որից իրավաբանականն ու տնտեսագիտականը՝ կարմիր դիպլոմով։ Լավ երեխա է, սուպերգրագետ երեխա է։ Ասում էր՝ արի քիչ թվով նշանդրեք անենք՝ թող ընկերուհիներս էլ չգան։ Հիմա ասում է ՝ պապ, որ այս ամեն ինչը ավարտվի 500 հոգանոց կանենք, չար լեզուներին էլ կհրավիրենք»։

Աղբյուր` Փաստինֆո