Փաստ ինֆո

«Երկու տարբերակ է առաջարկվել ՌԴ-ից եկող քաղաքացիների համար՝ ավտոբուսներով գան, որը պետք է կազմակերպվի, և մեքենաները քարշակներով բերվի, որը ծախսատար է։ Սա վերադարձողների մասին։ Այս կողմից էլ բացվելու մասին խոսակցություն չկա»,- այս մասին ասաց ԼՀԿ ղեկավար Էդմոն Մարուքյանը, ՌԴ մեկնել ցանկացող քաղաքացիների ակցիայի ժամանակ։

«Բազմաթիվ ՀՀ քաղաքացիներ ՌԴ ում են իրենց անձնական մեքենաներով, այսինքն` շարժական գույքով և չեն կարողանում հայրենիք վերադառնալ։ Կա հնարավորություն չարթերային չվերթներով գալու, բայց իրենք մեքենաները թողնելու տեղ չունեն։ Սա լուրջ խնդիր է։ Ես դիմել էի, որ հատուկ թույլտվությամբ Վրաստանից խնդրեինք, որ շարասյունով այդ մեքենաները գան Հայաստան։ Վրաստանի մտահոգությունն այն է, որ վարակակիրներ չշփվեն։ Առաջարկությունը մերժվել է։ Երկու տարբերակ է առաջարկվել՝ ավտոբուսներով գան, որը պետք է կազմակերպվի, և մեքենաները քարշակներով բերվի։ Սա վերադարձողների մասին»,- ասաց Մարուքյանը։

Հայաստանից ՌԴ մեկնել ցանկացողների համար Էդմոն Մարուքյանը լավ լուր չհայտնեց, ասաց, որ այս կողմից էլ սահման բացվելու մասին խոսակցություն չկա։

«Եղել է նախկինում, որ եթե ՀՀ –ում արտակարգ դրությունը վերացվի, ՌԴ-ն էլ մեզ համար պետք է բացեր, հիմա երբ դադարի արտակարգ դրությունը, կարանտին կհայտարարվի։ Մեր մտավախությունն այն է, որ այս կարանտինի ուղերձը լինի ավելի խիստ ուղերձ, ավելի անհասկանալի և սահմանները շարունակաբար չբացեն»։

Էդմոն Մարուքյանը հիշեցրեց, որ առաջարկել են հանել արտակարգ դրությունը և ամրագրել միայն ողջամիտ սահմանափակումների պահպանումը։

«Հինգ ամիս կար էս փաթեթը պատրաստելու համար, հիմա 5 րոպեա ժամանակը՝ զեկուցելու համար»։
Էդմոն Մարուքյանն ասաց, որ հինգ ամիս է զբաղված են արտագնա աշխատողների խնդիրների, բաժանված ընտանիքների, գույքի մասին շղթայական խնդիրներով։

«Կարծում եմ, ռեժիմը, որ հիմա սահմանվում է, չպետք է լինի ամբողջ երկրով մեկ ։ Սահմանափակումները, որոնք պետք է պահպանվեն, պետք է համապատասխանեն ՀՀ սահմանադրությանը, որոնց մի մասը չի պահպանվում։ Արտակարգ դրության պարագայում ամեն ամիս գալիս էին, որ երկարացնեն, խորհրդարանը հսկողական մեխանիզմ ուներ, հիմա եթե մինչև 6 ամիս հայտարարվում է՝ խորհրդարան գալու անհրաժեշտության չկա»։

Մանրամասները՝ տեսանյութում։

Աղբյուր` Փաստինֆո