Փաստ ինֆո

«Հանդիպման ժամանակ քննարկվել են տարբեր հարցեր, այդ միջադեպը ևս քննարկման առարկա է դարձել և Պարոն Շաթիրյանը տվել է համապատասխան բացատրություններ, որոնք ընդունելի և հասկանալի են եղել խմբակցությանը»,- այս մասին այսօր լրագրողների հետ հանդիպմանն ասաց ԱԺ «Իմ քայլը» խմբակցության պատգամավոր, պետաիրավական հարցերի հանձնաժողովի նախագահ Վլադիմիր Վարդանյանը՝ անդրադառնալով հարցին, թե ՍԴ դատավորի պաշտոնի թեկնածու Էդգար Շաթիրյանը կոռուպցիայի կանխարգելման հանձնաժողովի անդամ էր ընտրվել, սակայն հրաժարական տվեց։ Արդյոք այս հանգամանքը կաշկանդո՞ղ է «Իմ քայլի» համար։

«Շատ հետաքրքիր ասպեկտ կա քաղաքականության և դատական իշխանության պարագայում։ Անձը ներկայացնում է իքս դրվագի վերաբերյալ իր սկզբունքային դիրքորոշումը, որը կարող է արտահայտվել նաև լիազորությունները վաղաժամ դադարեցնելու միջոցով, այլ վարքագծի միջոցով։ Հիմա Պարոն Շաթիրյանը բացատրություն է տվել խմբակցությանը, որը մեծամասնության համար ընդունելի և հասկանալի է եղել։ Այդ դրվագի հետ կապված թեկնածությունը, որը բավականին երկար տարբեր առիթներով, տարբեր պաշտոնների հետ կապված քննարկվել է, տարբեր մակարդակներում այդքան էլ ճիշտ չէ։ Մի պահ պատկերացնենք այդ դրվագը չկա, չի եղել, այլ հարցեր պարոն Շաթիրյանի թեկնածության հետ կապված ունե՞նք, թե ոչ»։

Հարցին, թե արդյոք մենք ունենք կադրերի՝ սղություն, հաշվի առնելով, որ կառավարությունը ներկայացրեց թեկնածուի, որը այլ պաշտոնի համար էր առաջադրվել, նախագահը երկրորդ անգամ առաջադրեց ՍԴ դատավորի նույն թեկնածուին, Վլադիմիր Վարդանյանն ասաց, որ այո, պրոֆեսիոնալների թիվը Հայաստանում մեծ չէ։

«Եթե լրիվ անկեղծ լինեմ, պետք է արձանագրենք, որ պրոֆեսիոնալների թիվը Հայաստանում շատ մեծ չէ: Ես չեմ ուզում, որ սա դիտարկվի որպես հավանական այլ թեկնածուների նսեմացում, որոնք կան: Այո, որակյալ պրոֆեսիոնալների, որոնք ցանկանում են համալրել պետական ծառայության համակարգը, այդքան մեծ չէ։ Դա պայմանավորված է և աշխատավարձով, և այն սոցիալական երաշխիքներով, որոնք պետք է տրամադրվեն: Շատ դեպքերում հանրային ծառայությունը ոչ շատ հրապուրիչ է: Երբ որ դու վերացնում ես բոլոր կոռուպցիոն ռիսկերը, գոնե պետք է այնպիսի սոցիալական երաշխիքներ նախատեսես, որը կմղի անձին դեպի հանրային ծառայություն, դու ունենալու ես այս խնդիրը։ Դրա համար շատ է քննարկվում հավելավճարների, պարգևավճարների թեման, բայց պետք է անկեղծ լինենք, որ գործ ունենք մի վիճակի հետ, երբ հանրային որակյալ ծառայություններ ստանալու համար որակյալ և արժանապատիվ աշխատավարձ մարդիկ պետք է ստանան: Այս խնդրի ուղղությամբ կառավարությունն ու ԱԺ-ն շատ ակտիվ աշխատում են»,-ասաց նա:

Աղբյուր` Փաստինֆո