Փաստ ինֆո

Վերջերս մեծ աղմուկ հանած՝ Վարդաշենի անօթևանների կացարանում հայտնաբերված «Զինվորի համար» մակնշմամբ գուլպան, պարզվում է պատկանել է անօթևանների կացարանի արդեն մահացած շահառուներից մեկին։ Գուլպան հայտնաբերվել է նրա իրերում։ Դեպքի առնչությամբ քրեական գործ է հարուցվել։

«Փաստինֆո»-ի հետ զրույցում մեկնաբանելով փաստը «Հանս Քրիստիան Կոֆոեդ» բարեգործական հիմնադրամի՝ Վարդաշենի անօթևանների ժամանակավոր կացարանի իրավախորհրդատու Վարուժան Վարդանյանը նշեց. «Հետազոտելով հայտնաբերված գուլպան, ես՝ որպես հիմնադրամի իրավախորհրդատու, և կացարանի սոցաիալական աշխատողը պարզեցինք, որ դա վաճառքի ենթակա գուլպա է, գուլպայի պիտակի վրա առկա տվյալներով ճշտեցինք նաև արտադրողին։ Ուզում եմ նաև տեղեկացնել, որ Երևանում կան համապատասխան երկու, երեք խանութներ՝ Նորքի զանգվածում, Էրեբունի համայնքում, որտեղ բանակում ծառայողների ծնողները կարողանում են «Բանակի համար» մակնշմամբ իրեր գնել և անհրաժեշտության պարագայում ուղարկել նրանց։ Ուզում եմ նաև տեղեկացնել, որ այս մասին չճշտված տեղեկություն հրապարակած լրատվամիջոցները ստիպված են եղել հերքում տպագրել»,- «Փաստինֆո»-ի հետ զրույցում ասում է Վարուժան Վարդանյանը։

Հիշեցնենք, որ Մարդու իրավունքների պաշտպանի աշխատակազմի՝ «Հանս Քրիստիան Կոֆոեդ» բարեգործական հիմնադրամի անօթևանների ժամանակավոր կացարան անցյալ տարի կատարած այցի արդյունքներով կատարվել էր կացարանի բնակելի տարածքի, սանիտարական և կոմունալ հարմարությունների, շահառուների խնամքի, բուժօգնության, սննդի տրամադրման, շահառուների իրավունքների և հիմնարար ազատությունների վիճակի ուսումնասիրություն: Այցի արդյունքում հայտնաբերվել էին նաև «Զինվոր» պիտակով ձմեռային գուլպաներ, որի առնչությամբ այցի արդյունքներն ուղարկվել էին դատախազություն։

Աղբյուր` Փաստինֆո