Փաստ ինֆո

«Կրթական ոլորտում տեղի ունեցող անընդունելի զարգացումները համախմբել են խնդրով մտահոգ վերկուսակցական, վերքաղաքական բոլոր ուժերին։ Երբ արժեզրկվում է արժեհամակարգը, երբ գլխատվում է մշակույթը, երբ աղավաղվում է հայոց լեզուն և պատմությունը, երբ մենք տագնապի մեջ ենք ընկնում, որ կորցնում ենք մեր հայրենիքը, այլ ճանապարհ չի մնում, քան միավորված պայքարը,- ասում է դերասան Արտաշես Ալեքսանյանը «Փաստինֆոյի» հետ զրույցում՝ անդրադառնալով կրթական չափորոշիչների շուրջ ծագած վեճին, որով պայմանավորված առաջացել է ԿԳՄՍ նախարար Արայիկ Հարությունյանի հրաժարականի պահանջը,- ես ոչ մեկին չեմ ծառայում, ոչ մեկի հետ որևէ պայմանավորվածություն չունեմ, քավ լիցի, հենց այդ պատճառով էլ պարզ և հստակ ասում եմ՝ թրքական գաղափարները, որով հիմա լցված են կրթական նոր չափորոշիչները, Հայաստան են մուտք գործել դեռևս 1991 թվականից։ Մեկը բերեց, մյուսը եկավ հաստատեց, էն մյուսը՝ իրագործեց և ահա, այսօր էլ՝ կատարելագործում են և արդյունքում ունենք այն, ինչ ունենք»։ 

«Փաստինֆո»-ի հետ զրույցում Արտաշես Ալեքսանյանը նկատում է՝ կողմ է և միացել է ԿԳՄՍ նախարար Արայիկ Հարությունյանի պահանջին, բայց այդքանով չի բավարարվելու։ Անձի փոփոխությունը, ըստ վերջինիս, ոչինչ չի տալու, պետք է չափորոշիչներն ու մոտեցումները փոխվեն։ Պետք է պայքարենք, որպեսզի կրթական համակարգը շտկվի։

Հարցին՝ ի՞նչ են ուզում թուրքերը 21-րդ դարում հայերից, Արտաշես Ալեքսանյանը պատասխանում է՝ ինչպես միշտ՝ թուրքերն ուզում են մեր հայրենիքըմ մեր հողն ու ջուրը.«Թուրքը միշտ է սպառնացել՝ բնաջնջել, վերացնել հային։ Մեծ Թուրանի ծրագիրն իրագործվելու ճանապարհին է, Էրդողանի արած վերջին հայտարարությունները հենց այդ մասին են ասում, նույնիսկ 21-րդ դարում Թուրքիան մեծ հավակնություններ ունի՝ Հայաստանը գրավելու։ Սա մենք պետք է իմանանք և սրան մենք պետք է պատրաստ լինենեք։ Վերջերս ՊՆ-ի կողմից աշխարհազորային ստեղծելու մասին հայտարարություն եղավ։ Այսպիսի հայտարարությունները հենց այնպես չեն արվում, այլ այն ժամանակ, երբ սպառնալիքը մեծ է և մոտ է։ Մեր ազգը պետք է պատրաստ լինի դաժան և մեծ պայքարի, որովհետև սա կարող է դառնալ նոր Սարդարապատի ճակատամարտ»,- ասում է Արտաշես Ալեքսանյանը։

Մանրամասները՝ տեսանյութում։

Հեղինակ՝ Նվարդ Մանվելյան

Աղբյուր` Փաստինֆո