Փաստ ինֆո

«Չնայած այն հանգամանքին, որ բազմիցս իմ կարծիքը հայտնել եմ կրթական նոր չափորոշիչների մասին, դեռևս զգում եմ վտանգ, որովհետև շատ նուրբ ձևով տեղի է ունենում խաբեություն։ Նույնիսկ այն մարդիկ, ովքեր գիտական կոչումներ ու լուրջ ներդրումներ ունեն գիտության զարգացման մեջ, առաջնորդվում են՝ հույսը վերջինն է մեռնում մոտեցմամբ, - ասում է գրականագետ, Սփյուռքի նախկին փոխնախարար Սերժ Սրապիոնյանը «Փաստինֆո»-ի հետ զրույցում՝ անդրադառնալով կրթական չափորոշիչների շուրջ ծագած վեճին, որով պայմանավորված առաջացել է ԿԳՄՍ նախարար Արայիկ Հարությունյանի հրաժարականի պահանջը,-այն ինչ առաջարկվում է այսօր ոչ միայն քայքայելու է ավանդական դպրոցի մասին մեր պատկերացումները, այլ նաև ողջ դպրոցական կրթական համակարգը։ Այլ կերպ ասած՝ հոնքը շինելու փոխարեն, աչքն էլ հանել են։ Չկա գլուխ, չկա գլխացավ, ահա այս նշանաբանով է առաջնորդվում այսօրվա ԿԳՄՍ նախարարությունը։ Այս ամենը շատ ռեալ, շատ կոնկրետ և շատ խորը վտանգներ է պարունակում՝ ազգային անվտանգության խնդիրների առումով։ Ահա սա է պատճառը, որ մենք թողնելով ամեն ինչ, ոտքի ենք կանգնել, թողնելով մեր հիմնական գործը, որն է՝ գիրը, գրականությունն ու ստեղծագործելը»։ 

ԵՊՀ Բանասաիրական ֆակուլտետի երկարամյա դասախոս, գրականագետ Սերժ Սրապիոնյանը անհանգիստ է՝ ինչպե՞ս կարող էին թրքական կողմի հետ կազմված կրթական նոր չափորոշիչները մուտք գործել հայկական դպրոց. «Կարծում եմ այս հարցն ուղիղ գծով պետք է ուղղել այն անձին, ով այսօր ղեկավարում է Կրթության և գիտության ոլորտը։ Եթե նկատել եք, հենց նա է, որ այդ մասին մինչ այսօր խոհեմաբար որևէ բառ չի արտասանել իր ելույթներում, իսկ նրա արբանյակները, ասում են, թե սա, իբր առանձին ձեռնարկ է և փարիսեցիություն է բերել այս երկուսը միևնույն հարթության վրա։

Պաշտոնապես հայտարարում եմ՝ այն սկզբունքները, որ ընկած են թուրք մասնագետների հետ միասին հայոց պատմության առարկան վերանայելու հիմքում, նույնությամբ առկա են նաև ողջ կրթական համակարգի ծրագրերը կազմելու գործում։ Այն սկզբունքները, որոնք գործել են ռեվիզիայի ենթարկելու հայոց պատմագրությունը, նույն սկզբունքն ընկած է ողջ դպրոցական ծրագրերի կազմման հիմքում։ Նույն մոտեցումը գործում է նաև Հայ գրականության պարագայում»։

Սերժ Սրապիոնյանը նշում է՝ այսօր արդեն պահանջում է ԿԳՄՍ նախարարի հրաժարականը.«Արայիկ Հարությունյանի սրած կացինն իջնում է կրթական համակարգի գլխին։ Երբ ԲՈւՀ-երի ոչ մասնագիտական ֆակուլտետներում հայոց լեզու առարկան կարողացան նեյնիմներով անցկացնել իբրև կամընտրական դասընթաց, հենց այդ պահից Արայիկ Հարությունյանի գործունեությունը քննադատողներից եմ եղել։ Ես հասկացա, որ սա անձի խնդիր չէ, այլ համակարգի, հետևաբար ես պահանջում եմ ոչ միայն Արայիկ Հարությունյանի, այլև ողջ այս համակարգի հրաժարականն ու հեռացումը»,- «Փաստինֆո»-ի հետ զրուցում ասում է Սերժ Սրապիոնյանը։

Մանրամասները՝ տեսանյութում։

Հեղինակ՝ Նվարդ Մանվելյան

Աղբյուր` Փաստինֆո