Փաստ ինֆո

Արմավիրում ալկոհոլային խմիչքից զանգվածային թունավորման դեպքերի առթիվ հարուցված քրեական գործի շրջանակներում ձերբակալված Աշոտ Հովսեփյանը ներկայացված կասկածանքը չի ընդունում։ Հովսեփյանի պաշտպան Գոռ Գևորգյանը «Փաստինֆո»-ի հետ զրույցում ասաց, որ իր պաշտպանյալը մանրամասն ցուցմունք է տվել՝ հայտնելով, թե որտեղից է ձեռքբերել գործարանային արտադրության սպիրտը, նշել պատրաստման հանգամանքները։

«Ստացվում է՝ գործարանային արտադրության սպիրտ է գնել իր պատկերացմամբ, թորած ջուր է խառնել, լիմոնի աղ և շաքարավազ՝ համային երանգները ստանալու համար։ Պատրաստել է օղի։ Մինչ այդ նա պարտադիր փորձել է, քանի որ համային հատկանիշները պետք է ինքը զգար՝ որպես դրա մասնագետ։ Իր հետ որևէ բան չի եղել և չենք էլ կարող պատկերացնել, թե դա ինչ ճանապարհով, ինչպես տարածվեց, արդյո՞ք դա համապատասխանում է իրականությանը։ Հնարավոր է՝ հիմնավոր կասկածի շրջանակներում սպիրտի հետ կապված ինչ-որ խնդիր լինի, բայց համենայն դեպս ինքը, որպես այդպիսին, որևէ քիմիական հավելում չի խառնել։ Խառնել է ջուր, շաքարավազ և լիմոնի աղ»,- ասաց Գևորգյանը՝ նշելով, որ կասկած չկար, որ իր խառնածը կարող էր այդպիսի թունավորում առաջացնել։

Նրա խոսքով՝ ձերբակալված մյուս երկու անձանցից մեկը, ամենայն հավանականությամբ, այն անձն է, ումից սպիրտը գնել է իր պաշտպանյալը, իսկ մյուս անձի վերաբերյալ տեղեկություն չկա, նրանց մասնակցությամբ դեռևս որևէ քննչական գործողություն չի եղել։

Փաստաբանը հայտնեց, որ Աշոտ Հովսեփյանը մատնացույց է արել այն տեղը, որտեղ պահելիս է եղել սպիրտի ամբողջ քանակությունը։

«Հաշվի առնելով այն հանգամանքը, որ, եթե ինքը մատնացույց չաներ, որևէ մեկը դրա տեղը չգիտեր։ Նախաքննական մարմինը չէր էլ կարող հայտնաբերել, բայց իր մատնացույցով գնացել, հայտնաբերել են, որ, եթե իրականում դա է եղել խնդիրը, հանկարծ տարածում չստանա»,- ասաց պաշտպանը։

Աշոտ Հովսեփյանը, փաստաբանի փոխանցմամբ, ներկայացրել է այն անձանց ցուցակը, ովքեր իրենից օղի են գնել։ Նրա խոսքով՝ նախկինում երբևէ նման դեպք չի եղել։

Անդրադառնալով քրեական գործի շրջանակներում նշանակված փորձաքննություններին՝ պաշտպանը տեղեկացրեց, որ նշանակվել է դիակի դատաբժշկական փորձաքննություն, որի եզրակացությունը դեռևս չի ստացվել, իսկ հայտնաբերված օղու վերաբերյալ դեռևս որևէ փորձաքննություն չի նշանակվել։

Ինչ վերաբերում է պնդումներին, թե նախնական վարկածով մեթիլ սպիրտ է եղել, փաստաբանը նշեց, որ մահացածների արյան միջից հայտնաբերվել է մեթիլ թունավորում։

«Տեսչությունը երկրորդ անգամ, կարծես թե, ուղղվածությունը տանում է դեպի այդտեղ, սակայն անպատասխանատու հայտարարություններ անում, քանի որ, ձեռքի տակ չունենալով փաստական տվյալ, չպետք է խախտես անձի անմեղության կանխավարկածը։ Ունենք մեթիլ սպիրտից թունավորում։ Ընդ որում՝ դա տրվել է ոչ թե դիակի դատաբժշկական փորձաքննությամբ, այլ՝ հիվանդանոցում են եկել նման եզրահանգման, բայց արդյոք դրա կապը կարելի էր տանել դեպի Աշոտ Հովսեփյան կամ արդյոք այդ սպիրտից են թունավորվել, այս պահին որևէ մեկին այդ հանգամանքը պարզ չէ, նույնիսկ՝ նախաքննական մարմնին»,- ասաց նա։

Ավելի վաղ արձանագրել ենք, որ օգոստոսի 31-ից սեպտեմբերի 3-ն ընկած ժամանակահատվածում  գրանցվել է ալկոհոլային թունավորման 38 դեպք՝ Արմավիրում, Կոտայքում, Երեւանում, որից 14-ը՝ մահվան ելքով:

Դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը) 3-րդ մասի հատկանիշներով:

Նախաքննության ընթացքում կատարվել են մի շարք քննչական գործողություններ՝ դեպքի վայրի զննություններ, հայտնաբերվել և առգրավվել են ալկոհոլի հոտին նմանվող հեղուկով լցված տարաներ: Ըստ մասնակիցների հայտարարությունների` թունավորված անձինք գործածել են նշված հեղուկը: Անվտանգության պահանջներին չհամապատասխանող ապրանքներ իրացնելու կասկածանքով ձերբակալվել է Արմավիր քաղաքի բնակիչ՝ Աշոտ Հովսեփյանը՝ ծնված 1970թ։ Գործի շրջանակներում ձերբակալվել է ևս երկու քաղաքացի։
Աշոտ Հովսեփյանի ձերբակալման 72 ժամը լրանում է այսօր։

Հեղինակ՝ Իզաբել Սահակյան

Աղբյուր` Փաստինֆո