Փաստ ինֆո

Politik.am-ի փոխանցմամբ՝ ԱԺ պատգամավոր Արման Բաբաջանյանը համաձայնության է եկել Վարդանյան եղբայրների հետ եւ սիմվոլիկ գումարով «նվեր կստանա» «Ար» հեռուստաընկերությունը։

«Պատգամավորը ցանկանում է իր հակառուսական կողմնորոշում ունեցող 1in.am կայքը վերածել հեռուստաընկերության։ Բաբաջանյանը իր հեռուստաընկերության համար ֆինանսավորողներ է ճարել հենց այն հիմնավորմամբ, որ ստեղծվելիք հեռուստաընկերությունը, ինչպես իր կայքը, հակառուսական օրակարգ է ունենալու»,- գրել է կայքը։ Նույն աղբյուրի փոխանցմամբ՝ լիցենզավորման մրցույթի ընթացքում նախապատվություն է տրվելու այն հայտատուներին, որոնք վերջին երեք տարիների ընթացքում արդեն իսկ ունեցել են գործող հեռուստաընկերություն։ Արման Բաբաջանյանի լրատվական կայքը այս պահանջին չի համապատասխանում։

«Փաստինֆո»-ն կապ հաստատեց «Ար» հեռուստաընկերության տնօրեն Արամ Ղազարյանի հետ, որը չցանկացավ անդրադառնալ կայքի տեղեկությանը։ «Բանսարկություններ են գրում, մեկնաբանելու արժանիք չունեն»,- ասաց Ղազարյանը։

«Գրանդ հոլդինգ» ընկերության սեփականատերերի՝ Վարդանյան եղբայրների հետ կապ հաստատել չհաջողվեց։

Նշենք, որ «Ար» հեռուստաընկերության մշուշոտ ճակատագրի մասին խոսվում է արդեն մի քանի ամիս։ Դեռեւս ամռան սկզբներին՝ մի քանի հաղորդաշարարերի աշխատակիցներին նախազգուշացրել են, որ հաղորդումների՝ հնարավոր փակվելու մասին։

Աղբյուր` Փաստինֆո