Փաստ ինֆո

Վարդաշենի անօթևանների կացարանում լուծվել է երրորդ անգամյա սննդի հարցը։ Այս մասին այսօր «Փաստինֆո»-ի թղթակիցը տեղեկացավ տեղում՝ անօթևանների կացարանում կատարված նկարահանումների ընթացքում։ Մեր վերջին աղմկահարույց հրապարակումներից մեկով լրատվամիջոցն անդրադարձ էր կատարել կացարանի շահառուների ահազանգերին, որի արդյունքում պարզվել էր՝ երկրում արտակարգ դրություն սահմանելու օրվանից, այն է մարտի 13-ից,սահմանափակվել է կացարանի շահառուների տեղաշարժը, փակ են ունեցել, շատերը ջերմել են, եղել թերսնված։

Այսօր Վարդաշենի անօթևանների կացարան կատարած մեր այցի ընթացքում այնտեղ ճաշի ժամ էր, սակայն տնօրեն Շավարշ Խաչատրյանը թույլ չտվեց նկարահանումներ կատարել կացարանի ճաշարանում։ «Փաստինֆո»-ի հետ զրույցում սոցիալական աշխատակից Հմայակ Ղազարյանը նշեց, որ արտակարգ դրության ընթացքում՝ միջանկյալ մի ժամանակահատվածում, կացարանի շահառուներն իսկապես զրկված են եղել երրորդ անգամ տրվող սննդից՝ այն է ճաշից, նրանք միայն նախաճաշել և ընթրել են, բայց վերջին օրերին կացարանի խնայողությունների հաշվին հարցին ժամանակավոր լուծում է տրվել։

Անդրադառնալով անօթևանների կացարանի շահառուների առողջական վիճակի թեմային՝ բուժաշխատակիցը պատմեց՝ հուլիս ամսին կորոնավիրուսային վարակի բռնկում է եղել կացարանում։ Թվով 14 վարակակիրներ բուժում են ստացել հանրապետության տարբեր հիվանդանոցներում և բուժման կուրսն ավարտելուց հետո վերադարձել։

Կացարանում բնակիչների հետ զրույցների ընթացքում պարզվեց հետևյալը՝ սնունդն այնտեղ բազմազան չէ, բարոյահոգեբանական մթնոլորտն էլ այնպիսին է, ինչպես ամենատարբեր խավի, բնավորության ու պահանջմունքների տեր անօթևան մարդկանց մեկտեղվելու արդյունքում է լինում։

Վարդաշենի անօթևանների կացարանում բունտ է հասունանում, մարտի 13-ից մարդիկ ներսում փակի տակ են, արդեն նաև սոված, շատերը ջերմում են. քրեական գործ է հարուցվել

Կենսաթոշակների ստացման հարցում խնդիրները դեռ կան։ Կացարանի շահառու տիկին Անահիտը, որ նախկին բուժաշխատող է եղել, յոթանասուննանց կին է, մինչ օրս որևէ անգամ օրենքով հասանելիք կենսաթոշակը չի ստացել։ «Փաստինֆո»-ին պատմում է՝ տարիներ առաջ կորցրել է անձնագիրը, մինչ օրս այդ խնդրով չի զբաղվել։ «Հանս Քրիստիան Կոֆոեդ» բարեգործական հիմնադրամի՝ Վարդաշենի անօթևանների ժամանակավոր կացարանի իրավախորհրդատու Վարուժան Վարդանյանը տեղեկացնում է՝ խնդրին տեղյակ են, փորձում են լուծել հարցը։ Կացարանի մեկ այլ շահառու եւս (հասկանալի պատճառներով կնոջ անունը չենք հրապարակում) լրատվամիջոցի հետ առանձնազրույցի ընթացքում տեղեկացրեց՝ թոշակ չի ստանում։ Ըստ կենտրոնի իրավաբանի տրամադրած տեղեկատվության, կնոջ կենսաթոշակը որդին է ստանում։ Հասնո՞ւմ է արդյոք օրենքով նախատեսված գումարը կենսաթոշակառու շահառուին, պարզ չէ։ Պարոն Վարանյանը նկատում է՝ կինը տառապում է հոգեկան հիվանդությամբ, շատ դրվագներ չի հիշում, կամ մասնակի է հիշում։

Տեղեկացնենք, որ մեր նկարահանող խումբը մեծ դժվարությամբ ստացավ տնօրենի համաձայնությունը նկարահանումներ կատարել կառույցի չորրորդ հարկում, որտեղ էլ հավաքված են անօթևանների կացարանի բոլոր 90 շահառուները։ «Փաստինֆո»-ի տեսախցիկը ֆիքսեց բարեկարգման խիստ կարիք ունեցող սանհանգույցի վիճակը։

Մեզ թույլատրվեց նկարահանումներ կատարել կացարանի միայն երկու սենյակներում։ Կենտրոնի տնօրեն Շավարշ Խաչատրյանը, ով այստեղ է աշխատում դեռևս 1979 թվականից տեղեկացրեց՝ կացարանը կապիտալ վերանորոգման կարիք ունի, նախագիծն արդեն կա, պատվերն Ուկրաինայից է։ Կորոնավիրուսային վարակով պայմանավորված երկրում հայտարարված արտակարգ դրության ռեժիմը սակայն հետ է գցել մեծամասշտաբ վերանորոգման ծրագրերը։ Տնօրենը հույս ունի՝ արտակարգ դրության ավարտից հետո կացարանը կվերադառնա կյանքի բնականոն ընթացքին՝ շահառուները կկարողանան ազատ ելումուտ անել, նախկին խիստ սահմանափակումները չեն լինի ։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո