Փաստ ինֆո

Երեւանում ուղեւորափոխադրումներ իրականացնելու համար նոր Գազելների ձեռքբերման համար Երևանի քաղաքապետարանի մրցույթին մասնակցել է երկու կազմակերպություն՝ «Ռեգնում» և «Մուլտի Մոթորս» ՍՊԸ-ները։ Երկու կազմակերպությունն էլ ներկայացրել են ռուսական արտադրության «Գազել» մակնիշի նոր միկրոավտոբուսներ։

100 հատ «Գազել» ձեռք բերելու համար «Մուլտի Մոթորս» ՍՊԸ-ն առաջարկում է պայմանագիր կնքել 1 միլիարդ 945 միլիոն դրամի ընդհանուր գնով։ «Ռեգնում» ՍՊԸ-ն էլ 1 միլիարդ, 945 միլիոն 200 հազար դրամ: Այս գումարի մեջ ներառված են նաեւ հարկերը

Իսկ ինքնարժեքն և կանխատեսվող շահույթը «Ռեգնում ՍՊԸ-ն գնահատել է 1 միլիարդ 621 միլիոն դրամ, իսկ «Մուլտի Մոթորսը»՝ 1 միլիարդ 620 միլիոն 833 հազար 333 դրամ։

«Ռեգնում» ՍՊԸ-ն առաջարկում է «Գազել Սիթի» արտադրողի «Գազել» մակնիշի մեքենաներ։ Դրանք 2020 թվականի արտադրության են, չօգտագործված՝ 36 ամիս երաշխիքային սպասարկմամբ։ Մակնիշը նախատեսված է 22 մարդ տեղափոխելու համար, բացի այդ հարմարեցված է՝ շարժողունակության խնդիրներ ունեցող անձանց տեղափոխելու համար։ Ունի 17 նստատեղ, ևս 5 ուղևոր կարող է կանգնած տեղափոխվել։ Հաշմանդամության մեկ սայլակի տեղավորման դեպքում՝ 14 նստատեղերի և 4 կանգնած ուղևորների տեղափոխման հնարավորություն ունի։

«Մուլտի Մոթորս» ՍՊԸ-ն առաջարկած գազելները իրենց հնարավորություններով առանձնապես չեն տարբերվում է մրցակցի ներկայացրած առաջարկից։

Համացանցում կատարված փոքրիկ հետազոտության արդյունքում պարզեցինք, որ «Ռեգնում»-ի առաջարկած «Գազել»-ի շուկայական գինը 16 մլն 900 հզար դրամ է (մեկ «Գազելի» համար), իսկ «Մուլտի Մոթորս» ՍՊԸ-ի առաջարկած «Գազ A68R52 մակնիշի մեկ ավտոբուսի գինը՝ մոտավորապես 18 մլն 350.000 դրամ։

Թեմային անդրադարձել է նաև Երևանի ավագանու «Լույս խմբակցության» ղեկավար Դավիթ Խաժակյանը, որը տեղեկացրել էր.

«Ամենայն հավանականությամբ հաղթող կճանաչվի «Մուլտի Մոթորս» ՍՊԸ-ն, քանի որ վերջինս ներկայացնելով 1.945 միլիարդ դրամի գնառաջարկ, առաջ է անցել մյուս կազմակերպությունից 200 հազար դրամով։ Այսպիսով սիրելի երևանցիներ, ձեր վճարած հարկերից քաղաքապետրանը գնում է նոր Գազել՝ հատի համար վճարելով շուրջ 19.5 միլիոն դրամ»,- գրել է Խաժակյանը։

«Փաստինֆո»-ի հետ զրույցում Ուղևորափոխադրողների միության նախագահ Հրանտ Եղիազարյանն ասաց, որ գազել պատվիրելը վատ գաղափար էր։

«Անպայման արժե մեծ տեղատարողությամբ ավտոբուսներ պատվիրել, դա հրամայական է, ամբողջ աշխարհում է այդպես։ Փոքր տեղատարողությամբ միկրոավտոբուսները պատվիրելը խայտառակություն էր և չգիտեմ ինչո՞ւ են իրենք հետ քայլ անում, երևի Լենինի աշխատությունները լավ չեն կարդացել. Երկու քայլ առաջ՝ մի քայլ հետ։ Նրանք հակառակն են անում՝ երկու քայլ առաջ՝ հինգ քայլ հետ։ Մենք սարսափելի դեմ ենք «Գազել» մակնիշի միկրոավտոբուսներով քաղաքը նորից կեղտոտելուն։ Մեկ ավտոբուսի փոխարեն պետք է աշխատի չորս գազել մակնիշի մեքենա։ Բոլոր դեպքերում սխալ է, ամենաէժան տարբերակի դեպքում անգամ սխալ է»։

Երևանի քաղաքապետի մամուլի խոսնակ Հակոբ Կարապետյանն էլ ֆեյսբուքյան էջում տեղեկացրեց. «քաղաքը պատվիրում է ոչ թե որեւէ մակնիշի մեքենա, այլ պատվիրում է պայմաններ, որոնց պետք է համապատասխանեն պոտենցիալ մատակարարները»։ Գնման գործընթացով քաղաքը պատվիրել է 100 փոքր տարողության ավտոբուս, որոնք պետք է ունենան, մասնավորապես.

-ուղևորասրահում ջեռուցման և օդափոխման հնարավորություն

-սրահի այնպիսի բարձրություն, որ ուղեւորները կարողանան ամբողջ հասակով ազատ կանգնել,

-վարորդի խցիկում քարտային տոմսավորման և GPS սարքերի միացման հնարավորություն,

-ուղևորների տեղեկացման էլեկտրոնային ցուցատախտակ,

- կանգառների ավտոմատ հայտարարման սարքեր,

- ցածր հատակ,

- հաշմանդամության սայլակի տեղավորման և տեղափոխման հնարավորություն,

- հաշմանդամություն ունեցող անձանց նստատեղերի և հաշմանդամության սայլակի հարևանությամբ կանգառի ազդանշանման կոճակ, եւ այլն։

Մրցույթն արդեն ավարտվել է, մոտ օրերս գնահատող հանձնաժողովը եզրակացություն կտա, որին կհետևի ավտոբուսների մատակարարման ընթացքը:

«Այո, սա աննախադեպ գնում է, որովհետև շատ վաղուց համայնքն իր միջոցներով հանրային տրանսպորտի միջոցներ չի գնել: Փոքր ավտոբուսների ձեռքբերումը չի նշանակում, որ քաղաքը հրաժարվում է մեծ ավտոբուսներից: Հակառակը՝ 12 մետրանոց ավտոբուսների համար առաջիկայում նոր մրցույթ կհայտարարվի»,- գրել է Կարապետյանը։

Աղբյուր` Փաստինֆո