Փաստ ինֆո

«Ինչպես հասկացանք, վերջին օրերին, կարծես թե ուզում են քննարկել մինչև 12 տարեկան երեխաների դիմակ կրել – չկրելու խնդիրը։ Ուզում եմ հավատալ, որ մեր՝ մանկավարժների, ծնողների և հոգեբանների բարձրացրած հիմնախնդիրը ինչ – որ չափով տեղ է հասնում և այդ հարցը կվերանայվի, հակառակ դեպքում՝ ես կցանկանայի տեսնել այն պետական պաշտոնյայի դեմքը, ով գրել է դպրոցական վարքականոնների այդ սահմանափակումները, որոնք վերաբերում են դպրոցահասակ վաղ տարիքի երեխաներին,- ասում է մանկավարժ – հոգեբան Արմինե Դավթյանն, անդրադառնալով նոր ուսումնական տարվա մեկնարկից ԿԳՄՍ նախարարության կողմից հեղինակած վարքականոնի նոր չափորոշիչներին։

Մասնագետը հարց է բարձրացնում՝ ինչպե՞ս օրինակ խաղից նոր կտրված երեխան կարող է ժամեր շարունակ անշարժ նստել մի տեղում, կամ ինչպես երեխան կարող է հետևել, որ իր դիմակը մշտապես մնա դեմքին և այլն։ «Սրանք, իհարկե մտահոգիչ խնդիրներ են, բայց այս հարցերի լուծման ճանապարհները վերլուծելով ես հասկանում եմ, որ այս նոր կանոնները ստեղծողները պարզապես ցանկացել են իրենց վրայից հանել պատասխանատվության բեռը և այն դնել դպրոցի տնօրենների, նրանք էլ իրենց հերթին՝ մանկավարժի ուսերին»,- ասաց Ա.Դավթյանը։

Ի՞նչ արդյունքներ ենք մենք գրանցելու այս պայմաններով դպրոց հաճախող երեխաների վարքականոնից, և հատկապես՝ ինչպե՞ս է նոր պրոցեսն անդրադառնալու նրանց կրթական ցենզի վրա հարցին հոգեբան-մանկավարժը նկատում է՝ նախ այսպիսի պայմաններում առաջին հերթին աննկարագրելի բարդանալու են ուսուցիչների գործառույթները, ովքեր, մեծ իմաստով պետք է կարողանան կենտրոնանալ և՛ ուսումնական պրոցեսի պատշաճ կազմակերպման, և՛ դրա իրականացման, և՛ երեխաների վարքականոնի, և՛ նրանց կրթական բարձր ցենզի ապահովման համար. «Իհարկե, քաջ իմանալով մեր ուսուցիչների անձնազոհ նվիրումը և նրանց պատասխանատվության չափը, վստահ եմ, որ նրանք կանեն ամեն ինչ, որպեսզի նախ՝ առաջին հերթին ապահովի աշակերտների կրթական բարձր ցենզը, հետո լուծվի նրանց՝ հատկապես առաջին անգամ դպրոց հաճախողների նորմալ ադապտացման խնդիրը, բայց այստեղ մենք պետք է փաստենք հետևյալ իրականությունը՝ այս ամենը միանշանակ թողնելու է իր բացասական հետքը աշակերտների հետագա կյանքի վրա։ Եթե նկատում ենք, կրթական համակարգում քաոսային իրավիճակ է ստեղծվել։ Բարեփոխումների անվան տակ միանգամից մի շարք փոփոխություններ են մտցրել դպրոցներ՝ առարկայական չափորոշիչների, առարկաների վերանայման, հիմա՝ արդեն նաև նոր վարքականոնների տեսքով։ Ցավոք, սրա հետևանքները մենք կտեսնենք մի քանի տարի անց, և դրանք մեզ վստահաբար չեն գոհացնի»,- «Փաստինֆո»-ի հետ զրույցում ամփոփելով թեման ասում է մանկավարժ – հոգեբան Արմինե Դավթյանը։

Աղբյուր` Փաստինֆո