Փաստ ինֆո

Երթուղային տրանսպորտում այժմ հաճախ է պատահում, երբ չի պահպանվում պարետի այն որոշումը, որի համաձայն՝ երթուղայինում կանգնած ուղևորներ չպետք է լինեն։ Կան մտավախություններ, որ սեպտեմբերի 15-ին, երբ կվերսկսվի ուսումնական գործընթացը, հնարավոր է երթուղիներն էլ ավելի ծանրաբեռնվեն, ինչը կվատթարացնի համաճարակային իրավիճակը։ Թե ինչ խնդիրների առջև կկանգնի քաղաքը և ինչ են նախատեսում անել քաղաքային իշխանությունները, «Փաստինֆո»-ն փորձեց տեղեկանալ Երևանի ավագանու «Իմ քայլը» խմբակցության անդամ Իզաբելլա Աբգարյանից։

Ավագանու անդամը կարծում է՝մինչև դասերի վերսկսումը կլինեն հայտարարություններ։ Նրա խոսքով պարետատունը և քաղաքապետարանը միասին պետք է այդ հարցը քննարկեն, իսկ ավագանին այս պահին տեղեկություններ չունի քննարկումներից. «Իմ կարծիքով, եթե ԲՈՒՀ-երի առաջին կուրսերն են հիմնականում գնում և աշակերտները, չենք կարողանա ապահովել, որ երթուղայինն այսօրվա տեսքով՝ միայն նստած տեղերով լինի։ Այսինքն պետք է հավելյալ որոշում ընդունվի և ինքս սպասում եմ այդ որոշմանը»,-նշեց Իզաբելլա Աբգարյանը։

Հարցին՝ արդյոք քննարկվում է ուղիղ գնումով տրանսպորտային միջոցների ձեռքբերման հարցը, Իզաբելլա Աբգարյանը բացասական պատասխան տվեց և նշեց, որ քննարկվում է որպես ժամանակավոր միջոց 100 փոքր ավտոբուսների գնման հարցը. «Փոքր ավտոբուսների մրցույթն արդեն հայտարարված է և հուսով եմ՝ այն կկայանա և գոնե որպես միջանկյալ լուծում մի քիչ կթեթևացնի հարցը»,-ասաց Ավագանու անդամը։

Վերջինս կարծում է, որ եթե երթուղայիններում չպահպանվեն կանոնները, վտանգավոր կլինի, քանի որ մեծ ռիսկի են գնում. «Ռիսկ ամեն դեպքում կա։ Իմ երեխաներն էլ տրանսպորտից են օգտվում դասի գնալուց, ինքս էլ մտահոգություն ունեմ և բնականաբար տաքսիով չեմ կարող նրանց ուղարկել։ Հուսով եմ մինչև դասերի վերսկսումը հայտարարություն կլինի, քանի որ բոլորն էլ հասկանում են՝ մեծ հոսքի դեպքում անհնար է լինելու միայն նստատեղերով սահմանափակվել»,-ասաց Իզաբելլա Աբգարյանը։

Հեղինակ՝ Հասմիկ Կոշկարյան

Աղբյուր` Փաստինֆո