Փաստ ինֆո

Ոչ վարկային թալանին նախաձեռնության անդամները՝ ղեկավար Մանուել Մանուկյանի գլխավորությամբ նախօրեին հանդիպել են ԿԲ նախագահ Մարտին Գալստյանին, որի ժամանակ վերջինս հայտարարել է, որ վարկային արձակուրդ չի կարող տրվել. Օրենսդրությունը թույլ է տալիս վարկային կազմակերպություններին փող աշխատել։

ԿԲ-ի մոտ ցուցարարների հետ հանդիպման ժամանակ ԿԲ նախագահը նշել է, որ վարկային արձակուրդ տրվելու դեպքում բանկերը չեն կարողանա մարդկանց ավանդ տալ, որովհետև շրջանառություն չի լինի։

«Մարդիկ փող են դրել այս երկրում բիզնես անելու համար։ Դուք եք որակումները տալիս, ՀՀ օրենսդրությունը թույլ է տալիս աշխատելու վարկային կազմակերպություններին։ Մենք ունեցել ենք կազմակերպություն, որը խախտել է օրենքը և փակվել է»,- ասաց Գալստյանը։
Մանուել Մանուկյանը հակադարձել, որ վարկային կազմակերպությունները բացթողումներով են աշխատում, մարդիկ թալանվում են, իսկ կազմակերպություններն օգտվում են նրանց իրավական թույլ գիտելիքներից։

«Մարդը ամեն վարկային պայմանագրի տակ ձեռքով գրում է, որ տեսել է տոկոսադրույքը, որքան է, ստորագրում է վեց անգամ»,- Մանուել Մանուկյանին պատասխանեց ԿԲ նախագահը։

Գալստյանը հիշեցրեց, որ օրենսդրական նախաձեռնություններ ներկայացնում է կառավարությունն ու ԱԺ-ն, իսկ Կենտրոնական բանկը կարող է միայն առաջարկ անել։

«Իրավական նորմեր չկան, որովհետև դրանցով բանկերին պետք է պարտադրենք ավանդատուներին գումար չտալ։ Բանկերը բարեգործական հիմնարկներ չեն։ Վարկային արձակուրդի ընթացքում 100 հազարավոր մարդիկ վարկային արձակուրդ են ստացել»,- հավելեց Գալստյանը։

Մանուել Մանուկյանը չհամաձայնեց, ասաց, որ երեք ամիս վարկային արձակուրդ տալը և տոկոս գանձելը քաղաքացիներին օգնություն չէ։ Ավելին, նա նկատեց, որ բազմաթիվ դեպքեր կան, երբ հայտարարված վարկային արձակուրդի ժամանակ՝ երեք ամիսների ընթացքում մարդկանցից, միևնույն է, գանձել են գումարներ։ ԿԲ նախագահն էլ ասաց, որ արձակուրդ եղել է մայր գումարների վրա, ինչը Մանուել Մանուկյանը արձակուրդ չհամարեց։

«Մարդը 12 ամսվա փոխարեն 15 ամսվա տոկոս է վճարելու արտակարգ դրությունից դուրս գալուց հետո, պետք էր գանձել միայն մայր գումարից ինչ- որ չափ»,- առաջարկեց Մանուկյանը։
«Կենտրոնական բանկը դադար տալու իրավասություն չունի, որովհետև օրենքը լիազորություն ԿԲ-ին չի տվել՝ երկու իրավական սուբյեկտների մեջ հարաբերություն, ճիշտ ու սխալ որոշել։
Հարցին, թե ԿԲ-ն չի՞ կարող մեկ տարի վարկային արձակուրդ տալ՝ Գալստյանը պատասխանեց.

«Մենք մեկ օր արձակուրդ չենք կարող տալ։ ԿԲ-ն չի կարող փակել որևէ կազմակերպություն, որը գործում է օրենքի սահմաններում։ Մենք ցույց ենք տվել, որ օրենքի խախտում կատարած կազմակերպությունները փակվել են։ Խնդրել ենք հիմնավոր դեպք ներկայացնեք, որտեղ խախտվել են մարդու իրավունքները»։

«Եթե կա դեպք, որ մարդը գնացել վարկ է վերցրել, երեք-4 օր հետո հասկացել է, որ չի կարողանա վճարել գումարը հետ է վերադարձրել և իրենից տոկոս են ուզում, ես խոստանում եմ կզբաղվենք այդ խնդրով»,- հավելեց Մարտին Գալստյանը։

«Ի՞նչ կապ ունի ֆինանսական կազմակերպությունը մարդու ֆինանսական վիճակի հետ»-, ասաց Գալստյանը Մանուել Մանուկյանի այն դիտարկմանը, որ մարդիկ 5 ամիս առանց գումարի են մնացել՝ նստել են տանը, բայց պարտավորվել են տոկոս վճարել։

Հանդիպման ավարտին Մանուել Մանուկյանն ասաց, որ պայքարը չի նահանջելու, իրենք հաղթելու են։

Մանրամասները՝ տեսանյութում

Աղբյուր` Փաստինֆո