Փաստ ինֆո

«ԿԱՄՔ» հասարակական նախաձեռնության անդամներն ու մի շարք քաղաքացիներ պատրաստվում են հավաք իրականացնել ԿԳՄՍ նախարարության շենքի դիմաց՝ պահանջելով նախարար Արայիկ Հարությունյանի հրաժարականը։ Նախաձեռնությունն արդեն մի քանի օր է, ինչ ակցիաներ է նախաձեռնում՝ Հարությունյանի հրաժարականի պահանջով։ «Փաստինֆո»-ի հաղորդմամբ՝ նախարարության շենքի դիմաց ոստիկանական ուժեր են կուտակվել, կան տասնյակ ոստիկանական ավտոմեքենաներ։ 

Գրականագետ, հայ բանասիրության ֆակուլտետի դասախոս Սերժ Սրապիոնյանը ևս միացել է ցուցարարներին։

«Մշակույթի ոլորտում բացի հուզանք ու զանգից ուրիշ ին՞չ է կախել այս նախարարը, որ ես ասեմ մշակույթով ինքը զբաղվել է։ Սպորտի ոլորտում բացի ՀՖՖ նախագահի փոփոխությունից ուրիշ ի՞նչ է ինքը արել։ Եվ երբ մարդիկ, որոնք վիթխարի հեղինակություն ունեն, երբ դժգոհություն են արտահայտում, նախարարը համարում է խավարամիտ։ Ես հույս ունեմ խավարի և լույսի տարբերությունը այս նախարարը գիտի։ Խավարը նշանակում է ոչ թե լուսավորության հեռացում այլ լույսի բացակայություն։ Հենց լույսը մտնում է այդ խավարի պիրթը, որտեղ ինքը նստած է, այդ տիրույթում խավարը ցրվում է և սա խավարի ցրման գործընթացն է, որը ժողովուրդը սկսում է»։

Սրապիոնյանը ելույթում հիշեցրեց վարչապետի այն արտահայտությունը, երբ ասում էր, որ «ուզում է 10 հազար մարդ էլ հավաքվի, նախարարը պիտի մնա իր աշխատանքին»։

«Ես հայտարարում եմ ՝ 10 հազար մարդը միլիոն հատ Արայիկ արժի։ Եթե երկրի գերագույն պաշտոնը զբաղեցնող մարդը 10 հազար հայրենակիցներին առոչինչ է համարում, ուրեմն այդ 10 հազարը այդ մեկին առոչինչ համարելու իրավունք ունեն։ Ես միամիտ չեմ, որ կարծեմ, որ Արայիկի փոխվելուց հետո այս համակարգը կփոխվի, բայց սա կլինի ձնհալի առաջին նշանը։ Հաջորդ եկողը գոնե այս ալիքից վախենալով, այսպիսի ռադիկալ քայլերի չի գնա»։

Սրապիոնյանը պնդում է, որ կրթության և մշակույթի հարցերը այնքան են առնչվել քաղաքականության հետ, որ կամա թե ակամա՝ հայտնվել են քաղաքական հորձանուտում։

«Այն բարեփոխումները, որ նախարարն արել է՝ այստեղ անվանեցին չարեփոխում և ես դրա հետ համաձայն եմ։ Որն է բարեփոխումը՝ կենսական անհրաժեշտության ծրագրերի փոփոխությունները ավելի վատով փոխե՞լն է բարեփոխում»։

Գրականագետը ասում է, որ երկու տարվա ընթացքում հասկացել է,որ կառավարությունից որևէ մեկը չի գալու և չի պատասխանելու:

«Այս խավարամիտը, որ կարծում է, թե Պաոլո Կոելիոյից վերցրած միտքը արտահայտելով ինքը օրիգինալ է թվալու, սխալվում է։ Նշանակում է իր կաբինետում և աթոռի հետևում ավելի ինքնավստահ է, քան դուրս գա և այն մարդկանց հետ զրուցի՝ ում համար ինքը ռեֆորմներ է նախատեսել։ Իմ թոռներն այս տարի դպրոց չեն գնալու, ես իմ թոռներից կապիկ չեմ կերտելու, կերտելու եմ հայ ու նվիրված մարդ։ Լևոն Շանթի օրինակն եմ բերել՝ չուներ ոչ մի վկայական, բայց ամենաբարձր հայերից մեկն էր»,- եզրափակեց Սրապիոնյանը։

Աղբյուր` Փաստինֆո