Փաստ ինֆո

Նախնական տվյալներով՝ մեր զինծառայողը մոլորվել է ու հայտնվել ադրբեջանական կողմում, սակայն, թե իրականում ինչ է կատարվել պարզ կլինի ծառայողական քննության արդյունքում,- ԱԺ-ում լրագրողների հետ ճեպազրույցում հայտարարել է ՀՀ պաշտպանության նախարար Դավիթ Տոնոյանը՝ անդրադառնալով Ադրբեջանում հայտնված հայ սպա Գուրգեն Ալավերդյանին։

«Իրականացվում է ծառայողական քննություն, նաեւ քրեական գործ է հարուցված կամ կհարուցվի մոտակա ժամանակ, ծառայողական քննության արդյունքում կհասկանանք, թե ինչպես է դա կատարվել: Մեր նախնական գնահատականն այն է, որ մեր զինծառայողը մոլորվել է և հայտնվել հակառակորդի կողմում։ Արդյոք մեր զինծառայողը առևանգվել է, թե այլ պայմաններ են եղել, պետք է դեռ պարզենք։ Դրանից կախված՝ տարբեր միջազգային կառույցներում տարբեր ձևաչափերով կաշխատենք»,- հայտարարել է Դ.Տոնոյանը։

Նախարարը նշել է, որ ներկայումս մեր պահանջն այն է, որ միջազգային Կարմիր խաչի ներկայացուցչությունն Ադրբեջանում այցելի մեր զինծառայողներին, քանի որ առ այս պահը, նախարարի տեղեկություններով, նման այցելություն չի եղել։
Լրագրողի այն հարցադրմանը, որ Ադրբեջանի կողմից միջազգային մարդասիրական նորմեր են խախտվել՝ Դավիթ Տոնոյանը նշել է. «Գոյություն ունեն ստանդարտ պրոցեդուրաներ, որով ցանկացած իշխանություն, նաեւ Ադրբեջանի իշխանությունները տեղեկացվում են, զգուշացվում են, որ իրենք խախտում են կատարել: Դրանից հետո լինում են արձագանքներ տարբեր ձեւաչափերի: Մենք վստահ ենք, որ եւ ԵԱՀԿ-ի, եւ Միջազգային կարմիր խաչի գրասենյակի շրջանակներում, եւ ՄԱԿ-ի համապատասխան կառույցները ջանք ու եռանդ չեն խնայում, որ վերադարձվեն մեր զինծառայողները: Բայց կան նաեւ վերադարձման ինչ-որ պայմաններ՝ փոխանակել եւ այլն: Այս պահին դրա մասին խոսել մենք չենք կարող: Գլխավորը այս փուլում անվտանգ ու առողջ լինեն»։
Հիշեցնենք, որ օգոստոսի 23-ին ՀՀ ՊՆ-ն հայտնեց, որ սպա Գուրգեն Ալավերդյանը մարտական հենակետը ստուգելու ընթացքում եղանակային անբարենպաստ պայմանների պատճառով շփոթվել և մոլորվել է, իսկ մինչ այն Ադրբեջանի ՊՆ-ն հայտարարություն էր տարածել, թե իբր ավագ լեյտենանտ Ալավերդյանը «Գորանբոյի ուղղությամբ դիվերսիոն հարձակում է իրականացրել» և հայտնվել է իրենց տարածքում։
Իբրև իրենց պնդումներին ապացույց ադրբեջանական ԶԼՄ-ներով տարածվեց մեր սպայի «ինքնախոստովանությունը» պարունակող բեմականացված մի տեսանյութ, որտեղ նրան ակնհայտորեն պարտադրվել էր կարդալ կոնկրետ տեքստ՝ իր դիվերսանտ լինելու եւ, իբր, Ադրբեջանում մնալու ցանկություն ունենալու մասին։ Միաժամանակ հայտնի էր դարձել, որ Ադրբեջանում հարուցվել է քրեական գործ, որի շրջանակներում հայ սպային մեղադրանք է առաջադրվել 5 տարբեր՝ «ագրեսիվ պատերազմի վարում», «լրտեսություն», «օրենքով չնախատեսված զինված կազմավորումների կամ խմբերի ստեղծում»,
«հրազենի, զինամթերքի, պայթուցիկ նյութերի ապօրինի ձեռքբերում, տեղափոխում, պահպանում և փոխադրում»,«Ադրբեջանի սահմանի ապօրինի հատում» հոդվածներով։ Միջազգային իրավունքի մի շարք մասնագետներ ահազանգել են, որ վտանգված է հայ սպայի կյանքի իրավունքը, առկա է խոշտանգման մեծ վտանգ։

Նշենք, որ նախկինում արձանագրվել են դեպքեր, երբ մոլորվելու արդյունքում ադրբեջանական կողմում հայտնված հայ գյուղացիները, մասնավորապես Մանվել Սարիբեկյանը, Կարեն Պետրոսյանը Ադրբեջանում կիրառված բռնությունների հետեւանքով մահացել են։

Ադրբեջանում գերության մեջ մահացած Կարեն Պետրոսյանի դին փոխանցվել է Հայաստանին

Մանվել Սարիբեկյանի գործով ՄԻԵԴ-ն ընդդեմ Ադրբեջանի վճիռ կայացրեց

Աղբյուր` Փաստինֆո