Փաստ ինֆո

«Ե՛վ ծնողները, և՛ ուսուցիչները մտահոգված են, թե ինչպես է կազմակերպվելու կրթությունը` պանդեմիայի պայմաններում։ Այստեղ մեզ համար ամենակարևորը պետք է լինի այն, որ կրթության որակը հանկարծ չտուժի, որովհետև կրթություն ասելով մենք չենք հասկանում միայն գիտելիքը՝ այն, ինչ ուսուցիչը փոխանցում է և աշակերտը վերցնում է։ Այստեղ շատ կարևոր են կրթության մյուս բաղադրիչները և հատկապես սոցիալիզացիան,- «Փաստինֆո»-ի հետ զրույցում ասում է կրթության ոլորտի փորձագետ Ատոմ Մխիթարյանը՝ անդրադառնալով սեպտեմբերի 15-ից հանրակրթական դպրոցներում և ԲՈւՀ-երում վերսկսվող դասերի խնդրին։

Վերլուծելով ԿԳՄՍ նախարարության կողմից մշակված համավարակի պայմաններին՝ համապատասխան կրթական նոր առանձնահատկությունների մասին, կրթության փորձագետը գրեթե վստահ է՝ սեպտեմբերին դպրոցներում քաոս է սպասվելու.«Շատ խիստ պայմաններ են սահմանված նույնիսկ առաջին դասարանցիների համար, որին նրանք հոգեբանորեն պատրաստ չեն։ Դրանից առաջին հերթին տուժելու է ամբողջ կրթության համակարգը։ Հենց առաջին դասարանում են դրվում այն հիմքերը, որոնց հիման վրա հետագայում կառուցվում է ողջ կրթական համակարգը և երեխայի հետագա ճակատագիրը։ Սա մեր կրթական ոլորտի լիազորների առաջին որոշումը չէ, որը հակասական տրամադրություններ է առաջացնում ծնողների և հասարակության մոտ՝ լայն իմաստով։ Որոշումներ են կայացվում՝ բացառապես հաշվի չառնելով հիմնական շահառուների կարծիքը, որոնք այդ դեպքում երեխաներն են, նրանց ծնողներն ու ուսուցչական կազմը։ Ինչպե՞ս կարելի է երեխային ստիպել, որ մի ողջ դպրոցական օր անշարժ նստեն իրենց տեղերում, դասամիջոցներին դուրս չգան, գրատախտակին չմոտենան, կամ մտածե՞լ են արդյոք այդպիսի պայմաններ մշակողները, թե ինչպե՞ս են սնվելու աշակերտները՝ փակ ճաշարանների առկայությամբ, կամ ինչպե՞ս են, օրինակ առաջին դասարանցիները զուգարան գնալու և այլն։ Դեռևս ուշ չէ և մինչ դասերի վերսկսվելը գուցե կրթության ոլորտի պատասխանատուները վերանայե՞ն իրենց որոշումները, որովհետև հակառակ դեպքում սեպտեմբերից դպրոցներում քաոսային վիճակ է սպասվելու»,- ասում է կրթության ոլորտի փորձագետ Ատոմ Մխիթարյանը։

Հիշեցնենք, որ ԿԳՄՍ նախարարության կողմից կորոնավիրուսային հիվանդության պայմաններում դպրոցներում ուսումնական պրոցեսի կազմակերպման համար հստակ կանոններ են սահմանվել։ Ըստ այդ կանոնների՝ մուտքը դպրոց առանց դիմակի արգելվում է: Դպրոց մուտքի մոտ կատարվելու է պարտադիր ջերմաչափում, ձեռքերի ախտահանում։ Աշակերտին կարող է ուղեկցել ոչ ավել, քան մեկ անձ: Ուղեկցողի մուտքը դպրոց արգելվում է՝ բացառությամբ կրթության առանձնահատուկ պայմանների կարիք ունեցող սովորողների։Դասարաններում սովորողների առավելագույն թույլատրելի թիվը 20-ն է։ Դասարանները բաժանվում են խմբերի՝ ելնելով 1.5 մետր սոցիալական հեռավորություն ապահովելու հնարավորություններից։ Դպրոցներում սահմանվում է 6-օրյա աշխատանքային ռեժիմ։ Դասամիջոցների ընթացքում սովորողները չեն լքելու դասասենյակը։ Աշակերտները դասին մասնակցում են տեղից, գրատախտակի մոտ կանչելն արգելվում է և այլն։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո