Փաստ ինֆո

«Ես վստահ եմ, որ մեր նախաձեռնությունը թիրախավորվելու է որոշ ուժերի և խմբերի կողմից։ Եվ այս դեպքում թիրախ են դառնալու կոնկրետ մարդիկ։ Եվ դրանցով փորձ է արվելու շեղվել հիմնական ուղղությունից»։ Այս մասին այսօր «Ազգային արժեքների պաշտպանություն» նախաձեռնության անդամների և լրագրողների հետ հանդիպմանն ասաց փաստաբան, ի.գ.թ Արա Զոհրաբյանը։

«Ազգային արժեքների պաշտպանություն» նախաձեռնությունը հանրային քննարկման է ներկայացրել «Հայաստանյայց Առաքելական Սուրբ Եկեղեցու, հայոց լեզվի, մշակութային ժառանգության, ընտանիքի և մանկության պաշտպանության հիմունքների մասին» օրենքի նախագիծը: Զոհրաբյանը նշել է, որ այս ոլորտներում կան վտանգներ։

«Օրինակ՝ Ստամբուլյան կոնվենցիայի վավերացման փորձով խնդիր էր դրված, որ որոշ զուգընկերներ և միավորումների հավասարեցնել ընտանիքի մոդելին։ Մենք սրա մեջ էինք խնդիր տեսնում, ոչ թե բռնության դեմ պայքարի։ Մյուսը Լանզարոտեի կոնվենցիան էր, որը արտակարգ դրության պայմաններում առանց հանրային քննարկման վավերացվեց և հետագա քննարկումներն էլ ցույց տվեցին , որ այստեղ կա վտանգ, որը կրթության մակարդակում երեխաներին տարրական և միջնակարգ դասարաններում սեռական կրթություն դասավանդելու ռիսկ էր առաջանում, որտեղ մենք նույնպես խնդիր ենք տեսնում»։

Զոհրաբյանը ներկայացրեց հետագայում հանրաքվեի դրվող օրենքի նախագծի որոշ դրույթներ։

«Հայաստանյայց Առաքելական Սուրբ Եկեղեցին չի կարող սնանկ ճանաչվել և լուծարվել։ Դրան գումարած եկեղեցու սահմանադրական կարգավիճակը որևէ կերպ վատթարացնող օրենքները չպետք է ընդունվեն առանց եկեղեցու համաձայնության։ Ընտանիք հոդվածում ներառված է, որ ընտանիքը ստեղծվում է զույգերի ամուսնական տարիքի հասած կամավոր միությունից։ Ներկայացված է, թե ովքեր կարող ընտանիքի անդամ հանդիսանալ, և ամուսնության ճանաչման և գրանցման արգելք է նախատեսված։ Այս նախագծով փորձում ենք արգելել երկու տղամարդու միջև ամուսնություն, երկու կնոջ միջև ամուսնություն և սեռափոխված անձանց միջև։

Մանկության մասով արգելվում է մինչև 12 տարեկան երեխաներին սեռական կրթություն դասավանդելը։ Երեխայի անմեղությունը նրա սեռական կուրության մեջ է, ինչպես ասում էր մի սեքսոլոգ։ Այո, երեխան այդ տարիքում չպետք է իմանա ինչ է սեռական կյանքը։Նախատեսվում է նաև, որ 13 տարին լրացած երեխաներին սեռական կրթություն դասավանդելիս կրթական ծրագրերը ներկայացնել հանրային քննարկման, որպեսզի երաշխիք ունենանք, որ վարագույրների հետևում կրթական ծրագրեր չընդունվեն։ Կա նաև հայ ժողովրդի ազգային ինքնությունը խաթարող կրթական ծրագրերը արգելելու դրույթն։ Մեկ դրույթ էլ կա, որ արգելվում է երեխաներ որդեգրել թվարկածս անձանց միությունների կողմից։ Պետք է ձեզ տեղեկացնեմ, որ 2008-ին ՀՀ-ն ստորագրել է երեխաների որդեգրման կոնվենցիա, որը հետագայում ևս կարող է վավերացվել։

Դրանով թույլատրվում է նաև նույնասեռականների կողմից երեխա որդեգրել։ Մյուս դրույթը Հայոց լեզվի և մշակութային ժառանգությանն է վերաբերում։ Այս նախագծով առաջարկվում է ազգային հերոսների, հայ ժողովրդի համար բացառիկ ծառայություն մատուցող, եկեղեցու կողմից սրբադասված անձանց անուններն արգելել ձեռնարկատիրական գործունեության ոլորտներում օգտագործել»,- եզրափակեց Զոհրաբյանը։

Աղբյուր` Փաստինֆո