Փաստ ինֆո

Գազի պայթյունից, ըստ էության ավերվեց մի ամբողջ շքամուտք՝ 12 բնակարանով։ Պետք է ցավով արձանագրել, որ այսպիսի դեպքերի շարք է արձանագրվում Հայաստանի Հանրապետությունում, ինչը մեր բոլորի ուշադրությունը պետք է եւս մեկ անգամ սեւեռի բնական գազի շահագործման անվտանգության կանոնների պահպան խնդրի վրա։ Այսօր կառավարության նիստում հայտարարել է ՀՀ վարչապետ Նիկոլ Փաշինյանը։

Հիշեցնեք, որ օգոստոսի 26-ին՝ ժամը 07:18-ին, Ճգնաժամային կառավարման ազգային կենտրոն ահազանգ է ստացվել այն մասին, որ Երևանի Քանաքեռ-Զեյթուն վարչական շրջանի Ռայնիսի 1 հասցեում գտնվող բազմաբնակարան շենքում փլուզում է տեղի ունեցել։ Նախնական տվյալներով՝ տեղի է ունեցել գազի պայթյուն, որի հետեւանքով բնակիչներից մեկը մահացել է, կան տուժածներ։

Ն.Փաշինյանը տեղեկացրեց, որ դեպքի առթիվ հարուցվել է քրեական գործ, որի շրջանակներում կպարզվեն դեպքի բոլոր հանգամանքները, բայց նշեց, որ ուզում է հրավիրել բնակիչների ուշադրությունը՝ կանոնները պահպանելու վրա։

Վարչապետի փոխանցմամբ՝ բնակարանից զրկված քաղաքացիներին առաջարկվել է ժամանակավոր կացարան՝ հյուրանոցում, որից շատերը հրաժարվել են, իսկ ովքեր համաձայնվել են տեղափոխվել են հյուրանոց՝ մեկ շաբաթ ժամանակով։

«Հարցը քաղաքապետարանի, կառավարության օրակարգում է եւ առաջիկայում կկողմնորոշվենք մեր հետագա անելիքների վերաբերյալ»,- ասաց վարչապետը։

Աղբյուր` Փաստինֆո