Փաստ ինֆո

Բելառուսի նախագահ Ալեքսանդր Լուկաշենկոն չի պատասխանել ոչ միայն Գերմանիայի կանցլեր Անգելա Մերկելի զանգերին, այլեւ հրաժարվել է խոսել եւս մեկ եվրոպական առաջնորդի՝ Ֆրանսիայի նախագահ Էմանուել Մակրոնի հետ: Այս մասին հայտնել Է Էստոնիայի վարչապետ Յուրի Ռատասը, փոխանցում է «Ինտերֆաքսը»։

«Երկու եվրոպական առաջնորդներից հեռախոսային բանակցությունների մասին խնդրանքներն ուղարկվել են նաեւ Մինսկ՝ Ալեքսանդր Լուկաշենկոյին, որը չի պատասխանել եւ չի վերցրել հեռախոսը», — ասել է Ռատասը եւ նշել, որ Մակրոնն ու Մերկելը զանգահարել են նաեւ Ռուսաստանի նախագահ Վլադիմիր Պուտինին: Էստոնիայի վարչապետը կարծում է, որ Մոսկվան կարեւոր դեր է խաղում Բելառուսին վերաբերող հարցերում:

Այն մասին, որ Լուկաշենկոն չի պատասխանել Մերկելի զանգերին, հաղորդվել Է օգոստոսի 19-ին։ Գերմանիայի կանցլերը մի քանի անգամ ցանկացել է հեռախոսազրույց կազմակերպել նրա հետ, սակայն նա անտեսել է դա։ Ավելի ուշ Լուկաշենկոն Պուտինին խնդրել էր Մերկելին փոխանցել Բելառուսի գործերին չմիջամտելու խնդրանքը։

Բելառուսի ղեկավարը նաեւ խոսել է՝ Մինսկի քաղաքացիական հասարակության հետ երկխոսության մեջ միջնորդության վերաբերյալ՝ Մակրոնի հայտարարությունների մասին: Ի պատասխան Լուկաշենկոն ֆրանսիացի գործընկերոջը առաջարկել է իրեն միջնորդ դարձնել Ֆրանսիայի իշխանությունների եւ «դեղին բաճկոնների» շարժման միջեւ:

Բելառուսում զանգվածային բողոքի ակցիաները սկսվել են օգոստոսի 9-ի նախագահական ընտրություններից հետո. ցուցարարները համաձայն չեն պաշտոնական արդյունքների հետ, որոնց համաձայն Լուկաշենկոն հավաքել է ձայների 80 տոկոսը: Ակցիաները կոշտ ցրվել են, բելառուսական իշխանությունների գործողությունները քննադատություն են առաջացրել Արեւմուտքում:

Աղբյուր` Փաստինֆո