Փաստ ինֆո

Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, վերացրել է «օրենքով գող» համարվող Անդրանիկ Հարությունյանի՝ «Մասիվցի Անդիկի» սպանության գործով ամբաստանյալի՝ հարազատների հետ տեսակցության արգելքը։

Նման միջնորդությամբ հանդես եկավ պաշտպանական կողմը՝ պահանջելով վերացնել Ղարիբյանի տեսակցությունների արգելքը, որը դատարանը բավարարեց մասնակի։ Մասնավորապես՝ դատարանը թույլատրեց ամբաստանյալին տեսակցել եղբոր և ծնողների հետ։

Ամբաստանյալի պաշտպանները նոր միջնորդություն ներկայացրին՝ գործի ամբողջական նյութերին ծանոթանալու մասին, մասնավորապես, պաշտպանը նշեց, որ, եթե ծանոթ չեն գործի նյութերին, չեն կարող պաշտպանությունը պատշաճ կերպով իրականացնել։ Պաշտպան Արսեն Սարդարյանը միացավ ներկայացված միջնորդությանը և վստահեցրեց, որ իր պաշտպանյալը որևէ կապ չի ունեցել սպանության մեջ մեղադրվող անձի հետ, եթե կապ էլ ունեցել է, տեղեկացված չի եղել վերջինիս նպատակների մասին։ Մեղադրող դատախազն էլ առարկեց՝ նշելով, որ հիմնավորումներն առարկայազուրկ են և սույն գործով պաշտպանությունը պետք է իրականացվի ներկայացված նյութերի շրջանակներում և, որ պաշտպանության կողմը նման միջնորդությամբ նպատակ է հետապնդում մայր գործի նյութերին ծանոթանալու։ Դատավորը մերժեց միջնորդությունը։

Պաշտպան Արսեն Սարդարյանը դատարանին ներկայացրեց նաև Ղարիբյանի առողջական վիճակի վերաբերյալ տեղեկանք, համաձայն որի, վերջինս ունի չարորակ ուռուցք և հեպատիտ C։
Հիշեցնենք, որ 2019 թվականի հուլիսի 2-ին՝ ժամը 23:10-ին, «Սուրբ Գրիգոր Լուսավորիչ բժշկական կենտրոն»-ից Ոստիկանության Նոր Նորքի բաժին ահազանգ էր ստացվել, որ հրազենային վնասվածքով իրենց մոտ է տեղափոխվել 1973 թվականին ծնված Անդրանիկ Հարությունյանի՝ «Մասիվցի Անդիկ»-ի դին։

Դեպքի առթիվ հարուցվել էր քրեական գործ՝ ՀՀ քրեական օրենսգրքի 104-րդ հոդվածի 1-ին մասի և 235-րդ հոդվածի 1-ին մասի հատկանիշներով: Նախնական քննության տվյալների համաձայն՝ Անդրանիկ Հարությունյանին կյանքի հետ անհամատեղելի հրազենային վնասվածք պատճառել է ՌԴ քաղաքացի Սուլեյման Միիևը, ով որպես մեղադրյալ է ներգրավվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 235-րդ հոդվածի 1-ին մասով, այն է՝ շատերի կյանքի համար վտանգավոր կերպով սպանությունը եւ ապօրինի կերպով զենք-զինամթերք ձեռք բերել ու պահելը։ Վերջինիս նկատմամբ հայտարարվել էր հետախուզում ու առայժմ չի հայտնաբերվել։ Փոխարենը կալանավորվել է Արմեն Ղարիբյանը, ով մեղադրվում է սպանությանն օժանդակելու մեջ ու գործն արդեն դատարանում է՝ դատավոր Արտուշ Գաբրիելյանի վարույթում։

Սպանության օժանդակության մեջ մեղադրվող Արմեն Ղարիբյանը շուրջ մեկ տարի է, ինչ կալանավորված է։

Հեղինակ՝ Իզաբել Սահակյան

Աղբյուր` Փաստինֆո