Փաստ ինֆո

Երևանի ընդհանուր իրավասության դատարանում՝ նախագահությամբ դատավոր Արտուշ Գաբրիելյանի, հայտարարեց «Օրենքով գող» Անդրանիկ Հարությունյանի՝ «Մասիվցի Անդիկի» սպանության օժանդակության գործով դատաքննության մեկնարկի մասին։ 

«Փաստինֆո»-ի հաղորդմամբ՝ դատախազը հրապարակեց մեղադրական եզրակացությունը,համաձայն որի գործով մեղադրյալ Արմեն Ղարիբյանն է Անդրանիկ Հարությունյանի վերաբերյալ տեղեկատվություն տրամադրել ու այդպիսով օժանդակել Անդրանիկի Հարությունյանին սպանելուն: Մեղադրական եզրակացության հրապարակումից հետո ամբաստանյալ Ղարիբյանն ասաց, որ մեղադրանքը հասկանալի է, մեղավոր իրեն չի ճանաչում, քանի որ այն իր հետ որևէ կապ չունի։

Պաշտպան Արսեն Սարդարյանն էլ , անդրադառնալով մեղադրական եզրակացությանը, նշեց, որ առաջին անգամ է հանդիպում եզրակացության, երբ անձին մեղադրում են սպանության մեջ՝ հիմք ընդունելով խիստ կասկածելի կապը, որն ունեցել է կասկածյալի հետ։ Պաշտպանը պահանջեց, որ դատարանն ուսումնասիրի միայն իր պաշտպանյալի վերաբերյալ ապացույցները։ Պաշտպան Վահե Մնացականյանը միացավ Սարդարյանի դիրքորոշմանը և նշեց, որ ի սկզբանե սահմանափակվել է պաշտպանության իրավունքը, մասնակցել են միայն կալանքի երկարացման նիստերին։ Բացի այդ՝ նա հայտնեց, որ բերման են ենթարկել իր պաշտպանյալին՝ հղի կնոջ հետ, ինչով ճնշել են վերջինիս։ Կողմերի դիրքորոշումը լսելուց հետո դատարանը սահմանեց ապացույցների հետազոտման հաջորդականությունը, համաձայն որի՝ նախ կհետազոտվեն գրավոր փաստաթղթերը, ապա՝ կանցնեն վկաների հարցաքննությանը և վերջում դատարանը կլսի ամբաստանյալին։

Նախագահող դատավորը հրապարակեց Անդրանիկ Հարությունյանի դիակի դատաբժշկական փորձաքննության եզրակացությունը, ինչից հետո պաշտպան Վահե Մնացականյանն առաջարկեց փորձաքննությունների եզրակացությունները չհրապարակել, քանի որ կողմերը ծանոթ են դրանց։ Բացի այ՝ պաշտպանական կողմը գտնում է, որ սպանության հանգամանքների վերաբերյալ ապացույցներն իրենց չեն վերաբերում։

Հիշեցնենք, որ 2019 թվականի հուլիսի 2-ին՝ ժամը 23:10-ին, «Սուրբ Գրիգոր Լուսավորիչ բժշկական կենտրոն»-ից Ոստիկանության Նոր Նորքի բաժին ահազանգ էր ստացվել, որ հրազենային վնասվածքով իրենց մոտ է տեղափոխվել 1973 թվականին ծնված Անդրանիկ Հարությունյանի՝ «Մասիվցի Անդիկի» դին։

Դեպքի առթիվ հարուցվել էր քրեական գործ՝ ՀՀ քրեական օրենսգրքի 104-րդ հոդվածի 1-ին մասի և 235-րդ հոդվածի 1-ին մասի հատկանիշներով: Նախնական քննության տվյալների համաձայն՝ Անդրանիկ Հարությունյանին կյանքի հետ անհամատեղելի հրազենային վնասվածք պատճառել է ՌԴ քաղաքացի Սուլեյման Միիևը, ով որպես մեղադրյալ է ներգրավվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 235-րդ հոդվածի 1-ին մասով, այն է՝ շատերի կյանքի համար վտանգավոր կերպով սպանությունը եւ ապօրինի կերպով զենք-զինամթերք ձեռք բերել ու պահելը։ Վերջինիս նկատմամբ հայտարարվել էր հետախուզում ու առայժմ չի հայտնաբերվել։ Փոխարենը կալանավորվել է Արմեն Ղարիբյանը, ով մեղադրվում է սպանությանն օժանդակելու մեջ ու գործն արդեն դատարանում է՝ դատավոր Արտուշ Գաբրիելյանի վարույթում։

Սպանության օժանդակության մեջ մեղադրվող Արմեն Ղարիբյանը շուրջ մեկ տարի է, ինչ կալանավորված է։

Հեղինակ՝ Իզաբել Սահակյան

Աղբյուր` Փաստինֆո