Փաստ ինֆո

ՀՀ ՍԴ նախագահի պարտականություններն ստանձնելուց հետո Աշոտ Խաչատրյանը շտապել է պարգեւատրման կարգադրություն ստորագրել եւ սա այն դեպքում, երբ հուլիսին սահմանադրական դատարանը մատնված է եղել անգործության։

Նկատենք, որ 2020 թվականի հուլիսի 22-ին հրապարակման պահից ուժի մեջ է մտել «Սահմանադրական դատարանի մասին» սահմանադրական օրենքում փոփոխություններ և լրացումներ կատարելու մասին» 2020 թվականի հունիսի 30-ի ՀՕ-376-Ն սահմանադրական օրենքը եւ «Սահմանադրական դատարանի մասին» ՀՀ սահմանադրական օրենքի 18-րդ հոդվածի 3-րդ մասով՝ 2020 թվականի հուլիսի 22-ից Սահմանադրական դատարանի դատավոր Աշոտ Խաչատրյանը ստանձնել է Սահմանադրական դատարանի նախագահի լիազորությունների ժամանակավորապես կատարումը՝ որպես տարիքով ավագ դատավոր:

«Փաստինֆո»-ն գրավոր հարցումներ էր ուղարկել ՍԴ նախագահի պաշտոնակատարին՝ պարզելու Սահմանադրական դատարանի աշխատանքային ծանրաբեռնվածությունը, թե մասնավորապես քանի ՍԴ եւ աշխատակարգային նիստեր են տեղի ունեցել։ Արդյունքում պաշտոնապես հաստատվեց, որ աշխատանքները ձախողվել են.«2020 թվականի հուլիս ամսին նշանակված Սահմանադրական դատարանի նիստերն (հուլիսի 7, 14) ու աշխատակարգային նիստերը (հուլիսի 24, 27, 31) չեն կայացել քվորումի բացակայության պատճառով»,- գրավոր տեղեկացրել են Սահմանադրական դատարանից։

Սակայն դա չի խանգարել, որ հուլիսի 22-ից ՍԴ նախագահի պարտականություններն իրականացնող Ա.Խաչատրյանը շտապի պարգեւատրման կարգադրություն ստորագրել։

«Սահմանադրական դատարանի նախագահի լիազորությունները ժամանակավորապես կատարող պարոն Ա. Խաչատրյանի օգոստոս ամսվա կարգադրությամբ Սահմանադրական դատարանի դատավորներն ու աշխատակազմը պարգևատրվել են աշխատավարձի 60 տոկոսի չափով»,- պաշտոնապես հայտնել են Սահմանադրական դատարանից՝ պարզաբանելով, թե 30-ական տոկոս նախորդող երկու ամիսների համար:

Այլ խոսքով՝ հունիսի վերջերից սահմանադրական ճգնաժամում հայտնված Հայաստանում, որտեղ ձախողվել է սահմանադրական արդարադատությունը, խախտվել քաղաքացիների իրավունքները, ՍԴ դատավորները պարգեւատրվել են։ Ըստ ամենայնի՝ «հեղափոխական Հայաստանում» պարգեւատրվում են ոչ թե աշխատելու, այլ աշխատանքները ձախողելու համար։

Աղբյուր` Փաստինֆո