Փաստ ինֆո

«Թալանել են, լափել են, գռփել են»՝ այս բառերը, որ 2018-ի «հեղափոխականների» համար անցաթղթի արժեք ունեին, միայն 2020-ի ամառային ամիսներին է, որ փոքր ինչ նահանջել են:

Դա նշանակում է, որ հեղափոխականները, առնվազն թավշյայի կորիզը և ուղղորդող ուժն ի տարբերություն 2018-ի ապրիլյան օրերի, ի տարբերություն նաև 2019-ի, 2020 թվականի կեսերին արդեն իրենց բավարարված են զգում: Այնքան բավարարված, հանգստացած, որ այլևս չեն ցանկանում հիշել հին օրերը, երբ փրփրաբերան բղավում էին՝ թալանել են, լափել են…

Հիմա տղերքը ժամանակ չունեն, արդեն առաջնորդի շնորհիվ ստացած աշխատավարձերով ու հսկայական պարգևավճարներով կարողացել են և՛ տուն, և՛ մեքենա ունենալ, հերթը հասել է ամառանոցներին: Հերթը հասել է ստարտափներով սեփական բիզնեսներ ունենալուն, վարկերով շինարարություն ծավալելուն: Այսինքն, հիմա էլ «դաչաների» ու բիզնեսների համար են պայքարում…

Նրանք այն չեն այլևս, ինչ էի՛ն հեղափոխության օրերին, երբ ժողովրդին խոստանում էին ոսկե սարեր, վստահեցնելով, որ իրենց նպատակը հանրային շահն է, որ հեղափոխությունից հետո բոլորը երջանիկ են լինելու:

Հիմա իրենք զբաղված են, շատ են զբաղված, ժամանակ չունեն՝ լսելու, ոչ Ամուլսարը որպես սար պահպանելու համար պայքարող ժողովրդի ձայնը, որ սեփական երկրում անվտանգ ապրելու պայքար է, իրենց ասես չի էլ հետաքրքրում, թե ինչ խնդիրների համար են բողոքի ցույց անում ավտոներկրողները, մինչդեռ նրանց միամտացրին ու նրանց մուծումներով հարստացան, չեն ուզում լսել, թե ինչի համար են փողոց փակում Աղբյուր Սերոբի բնակիչները, քանզի հենց իրենք են այդ բնակիչների համար խնդիրներ ստեղծողները, նրանց հետաքրքիր չէ, թե՝ ի՞նչ են ուզում իրենցից ՌԴ արտագնա աշխատանքի մեկնել ցանկացող իրենց հայրենակիցները, ինչու՞ են աղմկում Եկմալյանի քանդված տների բնակիչները, ի՞նչ է բնիկ երևանցիների ուզածը, կամ՝ ի՞նչ հարցեր է բարձրացնում՝ հայտնի սպորտսմենը, որն անժամկետ հացադուլի է նստել:

Եվ ընդհանրապես, ի՞նչ են ուզում այս բողոքավորները…

Տղերքը Սերժին մերժեցին, հինը մերժեցին, նոր Հայաստան պարգևեցին բոլորիդ, վարչապետն էլ վերջերս հայտարարեց, որ այսքան ու այսքան աշխատավարձ ստացող աշխատատեղ է ավելացել:

Ինչ անում ենք, դժգոհ եք, գնացեք, ապրեք էլի…

Հեղինակ՝ Մ.Մ.

Աղբյուր` Փաստինֆո