Փաստ ինֆո

ՀՀ երկրորդ նախագահ Ռոբերտ Քոչարյանի և մյուսների գործով վարույթը կասեցնելու և ՍԴ դիմելու մասին ՀՀ ՊՆ նախկին նախարար Սեյրան Օհանյանի պաշտպան Կարեն Մեժլումյանի ներկայացրած միջնորդության լուծումը հետաձգելու մասին դատարանի որոշման դեմ վերաքննիչ բողոքը դատարանը թողել է առանց քննության։ «Փաստինֆո»-ի հաղորդմամբ՝ նման որոշում է կայացրել Վերաքննիչ քրեական դատարանի դատավոր Տիգրան Սահակյանը՝ որոշումը վերաքննության կարգով բողոքարկման ենթակա չլինելու պատճառաբանությամբ։

Ավելի վաղ տեղեկացրել ենք, որ պաշտպան Կարեն Մեժլումյանը միջնորդություն է ներկայացրել՝ նախկին խմբագրությամբ ՀՀ քրեական օրենսգրքի 300-րդ հոդվածի սահմանադրականության հարցով ՍԴ դիմելու և Ռոբերտ Քոչարյանի և մյուսների գործի վարույթը կասեցնելու մասին։

Նման միջնորդությամբ հանդես են եկել նաև Ռոբերտ Քոչարյանի պաշտպանները։ Հուլիսի 14-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, չհեռանալով խորհրդակցական սենյակ, հայտարարեց, որ հետաձգում է քննարկումը՝ մինչեւ Վճռաբեկ դատարանում եւ Սահմանադրական դատարանում առկա դիմումների գործով որոշման կայացումը։ Կարեն Մեժլումյանը վերաքննիչ բողոքով պահանջել է բեկանել դատարանի՝ ՍԴ դիմելու և գործի վարույթը կասեցնելու մասին միջնորդության լուծումը հետաձգելու միջոցով մերժելու մասին որոշումը և կայացնել նոր դատական ակտ՝ միջնորդությունը բավարարելու մասին։ Բողոքը դատարան մուտք է եղել հուլիսի 22-ին, մակագրվել՝ հուլիսի 24-ին։ Հուլիսի 31-ին Վերաքննիչ դատարանը որոշում է կայացրել բողոքն առանց քննության թողնելու մասին։

Մինչդեռ, հիշեցնենք, Վերաքննիչ քրեական դատարանի մեկ այլ դատավոր, իշխանությունների կողմից ընդունելի Արմեն Դանիելյանը վարույթ ընդունել էր ՍԴ դիմելու առաջին ատյանի դատավոր Դավիթ Գրիգորյանի որոշման դեմ դատախազության վերաքննիչ բողոքը ու անգամ բավարարել այն, թեեւ փաստաբաններն այն ժամանակ հայտարարում էին, որ նշված որոշումը ենթակա չէ բողոքարկման։

Աղբյուր` Փաստինֆո