Փաստ ինֆո

«Եթե դիահերձումը չի եղել՝ հստակ պատճառը ոչ ոք չի կարող ասել, դա ուսումնասիրելը պետության աշխատանքն է»։ Այս մասին «Փաստինֆո»-ի հետ զրույցում հայտնեց բժիշկ-համաճարակաբան Էդուարդ Հովհաննիսյանը՝ անդրադառնալով մահվան դեպքերին և հասարակության շրջանում պտտվող այն լուրերին, որ առողջապահության նախարարությունը մահվան հիմնական դեպքերը վերագրել է այլ ուղեկցող հիվանդություններին։

«Դա շատ ավելի լուրջ ուսումնասիրություն է։ Նախ սխալմունք կարող է լինել, որ անձը մահացել է այլ պատճառից և գրվել է կորոնավիրուս և հակառակը՝ որ անձը մահացել է կորոնավիրուսից, տեղեկության սխալ է եղել և ստատիստիկան շեղվել է։ Այդ հարցը, իհարկե, ապագայի շատ խորը ուսումնասիրության հարց է։ Կարող ենք, իհարկե, ուսումնասիրության ժամանակ հանգել այն մտքին, որ մահերի վերլուծությունը պետք է շատ խորը արվեր և կար այդպիսի առաջարկ։ Մենք արդեն այդ մտքին ենք գալիս, բայց դա հիմնավորված պետք է լինի։ Սպասենք մեր աշխատանքի ավարտին, երբ հայտնենք նախնական տվյալը, նաև այդ մահերի մասին կլինի եզրակացություն։ Բայց հիմա հստակ ասել, որ չէ 1000 չի եղել մահվան ելքերը, 1500 է կամ ոչ՝ 800 է, անհնարին է լինելու այս պահին։ Դրանով իրականում պետք է զբաղվի պետությունը այլ ոչ թե որևէ նախաձեռնող խումբ»։

Էդուարդ Հովհաննիսյանը և գործընկերները ստեղծում են մասնագիտական խումբ։ Որոշել են վերլուծել հակահամաճարակային բոլոր միջոցառումները, մշակված քաղաքականությունը և ռազմավարությունը և հետո հանդես գալ եզրակացությամբ։

«Քանի որ այս պահին հավաքել ենք աշխատանքային խումբ՝ երբ որ պատրաստ լինի առաջին ուսումնասիրության արդյունքները, կունենանք եզրակացություն։ Թեմայի շուրջ սեպտեմբերի առաջին կեսին կունենանք նախնական արդյունքներ»։

Ստեղծված աշխատանքային խմբում Հովհաննիսյանը անձերի քանակը չի կարևորում, կարևորը որ կան համաճարակաբաններ, ինֆեկցիոն հետազոտողներ , առողջապահության կազմակերպիչ, վիճակագիր։ Վստահեցնում է, որ բավական պրոֆեսիոնալ են։

«Այս պահին հիմնվում ենք առկա տեղեկությունների վրա։ Ավելի խորքային տեղեկությունների համար հարցումներ գուցե անենք, եթե դրանք բավարար չլինեն, ապա կնշենք, որ հարցումներ ուղղել ենք և չենք ստացել համապատասխան պատասխանը, բայց հուսով եմ, որ կունենանք այն տվյալները, որոնք անհրաժեշտ են»։

Չնայած ըստ Հովհաննսիյանի՝ համավարակի տեմպը թուլանում է, սակայն պետք է շատ հետազոտել, շուտ հայտնաբերել, շուտ մեկուսացնել՝ ինչի իրականացման փուլում մենք թերացել ենք։

Աղբյուր` Փաստինֆո