Փաստ ինֆո

Ձկնորսները փակել են Երևան-Սևան մայրուղին, քանի որ նրանց արգելել են սիգ որսալ։ Ձկնորսներն ի նշան իրենց դժգոհության բերել են նաև իրենց նավակները։ 

«Խնդիրը մեր ձուկ բռնելու հարցն է։ Լիքը բաներ են սահմանում, մենք բոլոր ձկնորսներով համաձայն ենք, որ մեզ կոդ տան, տանենք տերմինալով ամիսը ինչ-որ գումար 5000, 1000 պետական մուծումներն անենք, մենք էլ մեր ձուկը բռնենք։ Էսօր կանգնել ասում են՝ 1 կգ ձուկը 2200 դրամ կառնեն։ Ո՞վ կառնի»,-նշեց բողոքող ձկնորսներից մեկը։

Շրջակա միջավայրի նախարարության ներկայացուցիչը, ինչպես նաև Գեղարքունիքի մարզպետ Գնել Սանոսյանը հանդիպեցին ձկնորսների հետ և համաձայնության եկան, որ երեքշաբթի նրանց վերջնական պատասխան կտան։

Գնել Սանոսյանը լրագրողների հետ զրույցում ասաց, որ խնդիրը բավական խորն է և 2004 թվականից արդյունագործական ձկնորսություն չկա և ոլորտի պատասխանատուները հանձն են առել ոլորտը կարգավորել. «Բոլորս գիտակցում ենք, որ երկար տարիներով չկարգավորված ոլորտը կարգավորելիս կարող են որոշակի խնդիրներ առաջանալ։ Երկու օր է, որ կարգը գործում է և քաղաքացիները որոշակի խնդիրներ են տեսել, դրա համար իրենց բողոքի ձայնն են բարձրացնում։ Պայմանավորվածության եկանք, որ առանց ավելորդ ագրեսիայի, առանց բորբոքվելու, հանգիստ մթնոլորտում իրենք շաբաթ և կիրակի օրերը բոլոր այն խնդիրները, որ տեսնում են, բոլոր հարցերը թղթի վրա կձևակերպեն և կտան Շրջակա միջավայրի նախարարությանը և այնտեղի գործընկերները բոլոր հարցերին կփորձեն պատասխանել»,-նշեց Գնել Սանոսյանը։

Ավելի ուշ ձկնորսները բացեցին Երևան-Սևան մայրուղին, կսպասեն չորեքշաբթի օրվան, երբ պատկան մարմիններից պատասխան ստանան, կորոշեն իրենց հետագա քայլերի մասին։

Աղբյուր` Փաստինֆո