Փաստ ինֆո

Ներքաղաքական կյանքում այսօր ընդգծվում է երեք բեւեռ, որոնցից երկուսին իշխանությունը պիտակավորում է որպես նախկին։Այսօր տեղի ունեցած մամուլի ասուլիսում հայտարարել է քաղտեխնոլոգ Կարեն Քոչարյանը՝ նշելով, որ ընդդիմության մեջ լիդերի պայքարի է գնում։

Ըստ նրա, այսօր տեսանելի է երեք լիդեր՝ Ռոբերտ Քոչարյան, Սերժ Սարգսյան, Արթուր Վանեցյան, որոնք, քաղտեխնոլոգի գնահատմամբ, միասին հանդես չեն գա։ Նրա խոսքերով՝ գուցե գործիչները հանրային դաշտում հայտարարեն, թե գնում են կոնսեսուսի, բայց դա իրականում տեղի չի ունենա, որովհետեւ կան թե ամբիցիաներ եւ թե զգուշավորություն։

«Իշխանությունները ընդդիմության լիդերի դերում չեն ուզում տեսնել հենց Վանեցյանին»,- ընդգծել է Կ.Քոչարյանը՝ նկատելով, որ թեեւ Ռ.Քոչարյանն ու Սերժ Սարգսյանն ունեն ռեսուրսներ՝ թե մարդկային, թե գեոքաղաքական, ֆինանսական առումով, բայց ընկալվում են որպես նախկին, մերժված։

Ինչ վերաբերում է Արթուր Վանեցյանին, ապա որքան էլ իշխանությունները փորձեն կապեն նախկինների հետ՝ չեն կարող, որովհետեւ նրան ոչ Քոչարյանն է նշանակել, ոչ Սարգսյանը, այլ Փաշինյանն է Վանեցյանին նշանակել ԱԱԾ տնօրեն եւ 1,5 տարի աշխատել։ Քաղտեխնոլոգի դիտարկմամբ՝ աշխատունակ չեն նաեւ քարոզչական դաշտում իշխանությունների շրջանառության մեջ դրած այն թեզերը, թե Վանեցյանն էր խանգարում, որ «նախկիններին» բռնեն՝ նշելով, որ նրա հրաժարականից անցել է մոտ մեկ տարի, սակայն ոչ մեկին դեռ չեն «բռնել»։ Հարուցվում են գործեր, բայց մարդ չի կալանավորվել, ում էլ կալանավորել էր Վանեցյանը՝ այս իշխանություններն ազատ են արձակել։

«Իշխանությունները խանդով նայում են հենց Վանեցյանին»,- նշեց Կարեն Քոչարյանը՝ որպես հիմնավորում արձանագրելով, որ Սերժ Սարգսյանի օգոստոսի 19-ի ասուլիսին խանդի տեսարաններ իշխանությունների կողմից չեղան, իսկ Վանեցյանը գնաց Արցախ՝ սկսվեց իսկական «բոլոլա»։

Աղբյուր` Փաստինֆո