Փաստ ինֆո

«Արցախի նախագահի մամլո խոսնակի հայտարարությունն իհարկե խայտառակություն էր, որովհետև ես չեմ հավատում, որ որևէ իրեն հարգող քաղաքական գործիչ նման հայտարարություն կանի, ինչն արել էր Արցախի նախագահի մամլո խոսնակը՝ փաստացի ԱՀ նախագահի անունից։ Պետք չէր այդպես,- այսօր տեղի ունեցած ասուլիսում ասել է քաղտեխնոլոգ Կարեն Քոչարյանը։

Նրա փոխանցմամբ՝ Բակո Սահակյանն ընդունելի էր բոլորի, այդ թվում նաև այս իշխանությունների համար։ «Եթե չգիտեք գաղտնիք բացեմ՝ 2008 թվականի մարտի 1-ից հետո շատ ընդդիմադիր գործիչներ Հայաստանից փախել են հենց Արցախ և նույն Բակո Սահակյանը բնականաբար այդ մասին իմացել է, էլ չեմ ասում պաշտոնական ընդունելության մասին ։ Երբևիցե մենք չենք լսել նման արտահայտություն, թե որևէ մեկը չի կիսում Սերժ Սարգսյանի կամ Ռոբերտ Քոչարյանի քաղաքական հայացքները և այդ պատճառով նրան չի ընդունի Արցախում»,- նշեց Կարեն Քոչարյանը։

Քաղտեխնոլոգն ընդգծեց, որ նման բան չի կարող անցնել իրեն հարգող որևէ քաղաքական գործչի մտքով։ «Ո՞նց ասեմ, որ շատ կոպիտ չհնչի՝ սա մանկապարտեզի տեքստ էր և չէի կարծում, որ հենց այսպես պետք է իր քաղաքական պիկին հասած գործունեությունը սկսեր Արայիկ Հարությունյանը։ Սա պարզապես մանկական սխալ էր: Եթե շախմատի տերմինալոգիայով ասենք՝ Արայիկ Հարությունյանը детский мат եղավ ուղղակի»,- ասաց քաղտեխնոլոգ Կարեն Քոչարյանը։

Հիշեցնենք, որ Արցախի նախագահ մամուլի խոսնակը մեկնաբանելով Արցախում գտնվող Արթուր Վանեցյանին չհանդիպելու հանգամանքը, նշել էր, թե. «Նախագահ Հարությունյանի համար ընդունելի չեն պաշտոնական հանդիպումներն այն քաղաքական ուժերի հետ, որոնք կասկածի տակ են դնում Նիկոլ Փաշինյանի գլխավորությամբ ՀՀ իշխանությունների վարած քաղաքականությունը»։

Աղբյուր` Փաստինֆո