Փաստ ինֆո

Վահրամ Ավետիսյանի հետ հանդիպումն անցել է այն մթնոլորտում, ինչ սովորաբար մյուս թեկնածուների հետ է անցնում։ Այս մասին այսօր լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով Վահրամ Ավետիսյանի և խմբակցության անդամների հանդիպմանը։

«Հնչում են տարբեր հարցեր, այդ թվում նաև սուր հարցեր, որոնք հնչել են։ Հավանաբար դա էր պատճառը, որ առանձին պատգամավորների հարցադրումներից պարոն Ավետիսյանի մոտ կար այդպիսի տպավորություն»,-ասաց Լիլիթ Մակունցը։
Հարցին՝ կառավարությունը Վահրամ Ավետիսյանին փոխարինող թեկնածու ունի արդեն, Մակունցը նշեց, որ խմբակցությունը որևէ տեղեկատվություն չունի։

Դիտարկմանը, որ նույն քննադատությունը, որը հնչում էր Վահրամ Ավետիսյանի հասցեին, հնչում է նաև Երվանդ Խունդկարյանի հասցեին, որ նախկին իշխանությունների հետ է աշխատել, Լիլիթ Մակունցն ասաց. «Պետք է արձանագրենք, որ պարոն Ավետիսյանն ինքն է որոշել, որ չի ուզում, որպեսզի ԱԺ-ն դիտարկի իր թեկնածությունը և այստեղ մենք անելիք չունենք։ Թեկնածուն որոշում է կայացրել և մենք հարգում ենք իր որոշումը ու մասնագիտական գործունեությունում հաջողություններ մաղթում։ Ինչ վերաբերում է պարոն Խունդկարյանին և պարոն Ավետիսյանին առաջադրվող հարցերի վերաբերյալ, այնուամենայնիվ այդ հարցերը որքանով ընդհանրություն ունեն, բնականաբար իրավական դաշտում երկուսն էլ գործունեություն են ծավալել։ Այնուամենայնիվ հարցերը որոշ չափով տարբերվում են։ Պատգամավորներն իրենց հուզող բոլոր հարցերն առանց սահմանափակումների ներկայացրել են թեկնածուին»,-ասաց Լիլիթ Մակունցը։

Ինչ վերաբերում է մամուլում շրջանառվող այն տեղեկություններին, որ «Իմ քայլը» որոշել է պաշտպանել Երվանդ Խունդկարյանի թեկնածությունը, Լիլիթ Մակունցն ասաց, որ ՍԴ նախագահ դառնալու կամ ընտրվել-չընտրվելու հետ կապված այս պահին որևէ բան չեն կարող հնչեցնել, որովհետև թեկնածուն պետք է ԱԺ գա, լիագումար նիստերի դահլիճում նույնպես հարցեր կհնչեն և պատգամավորները գաղտնի քվեարկությամբ կորոշեն։

Աղբյուր` Փաստինֆո