Փաստ ինֆո

Մասնագիտացված հակակոռուպցիոն դատարանի ստեղծումը ռոմանտիզմ է, որից որևէ դրական արդյունք չենք ունենալու։ «Փաստինֆո»-ի հետ զրույցում այս կարծիքն արտահայտեց ԵՊՀ սահմանադրական իրավունքի ամբիոնի վարիչ Վարդան Այվազյանը՝ ընդգծելով, որ կոռուպցիայի դեմ պայքարը նման դրվագային, չհիմնավորված քայլերով չէ։

Վարդան Այվազյանը գտնում է, որ մասնագիտացված հակակոռուպցիոն դատարանի ստեղծումից առաջ առնվազն 300 էջանոց կոնցեպտուալ հիմնավորում պետք է ներկայացվեր, որով կհիմնավորվեր դատարանի գոյության իրավունքը, արդյունավետությունը և որ այն իսկապես իր նպատակին կծառայի. «Ասում ենք ջահել, անցորդ երեխեք են, անգրագետ կերպով պետության նկատմամբ փորձարարություն են կազմակերպում, ինչը ողջունելի չէ։ Եթե առանձին մարմին են ստեղծում, ապա պետք է հիմնավորեն՝ մեր երկրում կոռուպցիան ինչպիսի հետագիծ ունի, ինչ զարգացում է ունեցել, ինչ դրսևորումներ ունի, որն է այդ մարմնի անհրաժեշտությունը։ Ո՞վ ասաց, որ սովորական դատարաններում, եթե այդ դատավորները մասնագիտանան, ավելի վատ կքննեն հակակոռուպցիոն գործեր, քան այդ դատարանի դատավորները։ Ինչպե՞ս ենք երաշխավորելու նրանց անկախությունը իշխանություններից, նրանց հակակոռումպացված լինելը։ Այս հարցերի պատասխանը ոչ մեկից չենք լսել։ Հակակոռուպցիոն դատավորները նույն մսից ու արյունից են կազմված, ինչ ընդհանուր իրավասության, սահմանադրական դատարանի կամ վարչական դատարանի դատավորները։ Ինչպե՞ս ենք անալիզ, ռենտգեն անելու, որ որոշենք նրանք ամենալավն ու անաչառն են և որպես այդպիսի դատարան շատ մեծ արդյունք են գրանցելու կոռուպցիայի դեմ պայքարում։ Դրա համար էլ սա մանկամիտ ռոմանտիզմ է»,-նկատեց Վարդան Այվազյանը։

Նրա խոսքով սա պետության նկատմամբ անգրագետ փորձարարություն է։ Նույնն է, ինչ առողջ մարդու վրա ինչ-որ դեղ փորձարկեն և տեսնեն՝ կմեռնի, թե կօգնի։ Վարդան Այվազյանը կարծում է, որ պետության նկատմամբ ցանկացած անգրագետ, կոնցեպտուալ հիմնավորում չունեցող փորձարարություն կարելի է որակել որպես պետության դեմ ուղղված հանցագործություն։

Ինչ վերաբերում է նրան, որ հակակոռուպցիոն դատարանի դատավորներն ավելի բարձր աշխատավարձ պետք է ստանան, Վարդան Այվազյանի կարծիքով դա արդեն կոռուպցիայի դրսևորումներից մեկն է. «Ո՞րն է տարբերությունը։ Այսինքն` հակակոռուպցիոն արդարադատությունն ավելի բարձր ենք դասում, քան սովորական արդարադատությունը։ Արդարադատությունը մեկն է և չի կարող տարբեր աստիճաններ ունենալ՝ բարձր, ցածր, կարևոր և ոչ կարևոր։ Սա մանկամտություն է»,-ասաց մասնագետը՝ ընդգծելով, որ այստեղ արդեն կոռուպցիոն ռիսկ է տեսնում։

Անդրադառնալով միջազգային փորձին՝ Վարդան Այվազյանը նկատեց՝ միայն միջազգային փորձով և ինչ-որ երկրում դատարանի առկա լինել-չլինելով չենք կարող որոշել մեր երկրին դա պետք է, թե ոչ. «Կան երկրներ, որտեղ մարդու միս են ուտում։ Հիմա եկեք այդ օրենքն էլ ներմուծենք մեր իրականություն։ Պետք չէ այդ միջազգային փորձը հալած յուղի պես, առանց դրա կոնցեպտուալ հիմքերն ուսումնասիրելու, բերել ու ասել՝ քանի որ X երկրում կա նման մարմին, ուրեմն բերեք մենք էլ ունենանք։ Սա ամենաանգրագետ, ամենաչհիմնավորված, ամենաթույլ փաստարկումն է։ Միջազգային փորձն ուսումնասիրում են կոնցեպտուալ հիմքով և մեծ վերլուծություն են իրականացնում»,-ամփոփեց Վարդան Այվազյանը։

Նշենք, որ Արդարադատության նախարարությունը հանրային քննարկման է ներկայացրել նախագծերի փաթեթ, որով առաջարկվում է ստեղծել մասնագիտացված հակակոռուպցիոն դատարան։ Նախատեսվում է, որ դատարանը պետք է ունենա 25 դատավոր և այլ դատավորների համեմատ նրանք ավելի բարձր աշխատավարձ պետք է ստանան։

Աղբյուր` Փաստինֆո