Փաստ ինֆո

ՀՀ վարչապետ Նիկոլ Փաշինյանը ֆեյսբուքյան ուղիղ եթերի ժամանակ ասաց, որ այսօր շատ են խոսում տրամադրությունների մասին և կասկածում հեղափոխության իրական արժեքներին: Վարչապետն ամփոփում էր Գեղարքունիքի մարզ կատարած իր այցը և անդրադարձավ նաև քաղաքական արձագանքին։ Վստահեցրեց, որ այսօր նույն տրամադրությունն է՝ ինչ հեղափոխության ժամանակ՝ հավելելով, որ իրականում հեղափոխությունը շարունակվում է:

«Այդ թեմային չէի ուզում անդրադառնայի, բայց հեղափոխությունն այսօր շարունակվում է շատ վստահ և հաղթական է շարունակվում՝ բոլոր ասպարեզներում՝ անվտանգությունից սկսած, շարունակելով կրթական և ենթակառուցվածքային ոլորտում։ Սա չի նշանակում, որ բոլոր խնդիրները լուծված են, սա նշանակում է, որ հեղափոխությունը հաղթական շարունակվում է»։

Փաշինյանն ասաց, որ վերջերս պրոցես է նկատում, որ մարդիկ են հայտնվել, որոնք հանդես են գալիս հեղափոխության արժեքների պահապանների դերում։

«Ես, որ ուշադիր եմ լինում, տեսնում եմ, որ այդ մարդկանց հիմնական մասը նրանք են, որոնք հեղափոխության արժեքները մեզանից պաշտպանում են, ու գիտեք դրանք ինչ մարդիկ են, նրանք, ովքեր 2012, 13, 14, 15 թվին ձեռ էին առնում մեզ, խոսում էին, ժողովրդին զգուշացնում էին, որ սրանք պրոյեկտ են, էս են, էն են։ Ընդ որում՝ նրանք հեղափոխությունը նկատեցին այն ժամանակ, երբ տեղի էր ունեցել պրծել։ Ինչով կարային խանգարել են, էսօր եկել են հեղափոխության արժեքների պահպանությունից են խոսում, նրանք չեն կարող խոսել, որովհետև չգիտեն դա ինչ է։ Նրանց դավանած արժեքները այն են, որ ժողովրդին բազմիցս բերել են պարտության և մեր ճամփաբաժանը եղել է այն ժամանակ, երբ ես խոստացել եմ, որ պարտության չենք տանելու ժողովրդին։ Ես թույլ չեմ տա, որ որևէ մեկը 11 թվից սկսած հեղափոխության դեմա գործել, կուլիսներում սրա նրա հետ պայմանավորվածություններ է ձեռք բերել ու ձախողել, հիմա պաշտպանի դերում են հանդես գալիս։ Դուք չգիտեք, թե որոնք են հեղափոխության արժեքները, դուք դեռ պետք է դասընթացներ անցնեք դրա մասին գաղափար ունենալու համար»։

Աղբյուր` Փաստինֆո