Փաստ ինֆո

ՀՀ վարչապետ Նիկոլ Փաշինյանը ֆեյսբուքյան ուղիղ եթերում էր: Նա ամփոփեց Գեղարքունիքի մարզ կատարած իր այցը: Փաշինյանն ասում է, որ այսօրվա այցը պայմանականորեն անվանում է հեղափոխության «բերքահավաք»: Նրա խոսքով՝ Հայաստանը վերածվում է մեծ շինհրապարակի:

«Այցը այս օրերին է տեղի ունենում, որովհետև արտակարգ դրության մասին նոր որոշմամբ՝ մի շարք սահմանափակումներ են հանվել, ուստի որոշել ենք շրջել գյուղերում, չնայած սոցիալական հեռավորություն պահել դժվար էր»,- ասաց Վարչապետը։

Նիկոլ Փաշինյանը հիշեցրեց, որ 2018 թվականին ռազմավարական ծրագիր որդեգրեցին, որ Սևանա լճի շուրջ ճանապարհները պետք է բարձր մակարդակի լինեն, ափերը պետք է հավասարապես հասանելի լինեն։ Հիմա խնդրի լուծման եզրափակիչ փուլին են հասել։

«Վարդենիսից դեպի Շորժա, Շողակաթ համայնք եկող ճանապարհի մի կտոր կար, որը պատմության մեջ երբեք ասֆալտապատ չի եղել և հիմա այնտեղ փայլուն ճանապարհ է կառուցվել։ Սրանով ես համարում եմ, որ Սևանի արևելյան ափի տնտեսական զարգացման ռազմավարական հիմք է դրվել, որովհետև արևելյան ափը և հատկապես Արեգունի-Արտանիշ հատվածը բնակլիմայական առումով փայլուն հատված է և համոզված եմ, որ լուրջ ներդրումային ծրագրեր կիրականացվեն՝ էկոտուրիզմի տրամաբանության մեջ»։

Սևանա լճի շուրջ 100 տոկոս հասանելիությունը գրեթե լուծված է, ասաց վարչապետը, իսկ Սևանի հետ կապված ազգային պարկ առանձին այց կունենա և ափամերձ հատվածի խնդիրները կլուծի։

«Ես տեսա գյուղական փողոցներ, որոնք նախկինում երբեք ասֆալտապատ չեն եղել։ Խոսքը միայն դրա մասին չէ, դրանք ձեռք են բերում ջրահեռացման համակարգեր, ես տեսա համակարգեր, որոնք գոյություն չեն ունեցել երբեք, փողոցային լուսավորություն, որը երբեք չի եղել, մանկապարտեզներ են կառուցվում, որոնք կամ զրոյից են կառուցվում, կամ տասնյակ տարիներ չեն նորոգվել։ Հսկայածավալ աշխատանքներ տեսանք, որ տարածքային համաչափ զարգացման մեր որդեգրած բանաձևն աշխատում է, որի անունը սուբվենցիոն ծրագիր է»։

Փաշինյանը տեղեկացրեց, որ 6 միլիարդից ավելի գումարով նախագծեր են այս պահին գեղարքունիքի մարզում իրականացվում միայն սուբվենցիայով։

«Այն ժամանակ եկանք, խոստումներ տվեցինք, այսօր կատարեցինք։ Եվ հարցը, թե արդյոք սրա համար է տեղի ունեցել հեղափոխություն, այո սրա համար է եղել, որովհետև այսօր գյուղերում քաղաքակրթական հեղափոխություն է տեղի ունենում։ Մարդիկ, որ գոյության ընթացքում շրջել են գյուղերում կալոշներով, այսօր տնից դուրս են գալիս և բարձրակարգ ասֆալտապատ ճանապարհներ են տեսնում, ջրահեռացման համակարգերով ու լուսավորության համակարգերով։ Սա լավատեսություն է տալիս ասելու, որ ՀՀ-ն դառնու է մի մեծ շինհրապարակ»։

Աղբյուր` Փաստինֆո