Փաստ ինֆո

Երեք ամիս առաջ վարչապետին ներկայացված՝ աշխատանքից ազատվելու դիմումից հետո ԲՈԿ նախագահ Սմբատ Գոգյանը շարունակում է աշխատել։ Այսօր ֆեյսբուքի իր էջի ուղիղ եթերում նա նշեց, որ նման իրավիճակում լավ աշխատելն անհնար է, որովհետև համակարգը ճգնաժամային վիճակում է։

«Մայիսի 14-ին, երբ ես աշխատանքից ազատման դիմում գրեցի, վարչապետին շնորհակալություն էի հայտնել գրության մեջ և խնդրել էի ազատել ինձ աշխատանքից, որովհետև նախարարության հետ կան բովանդակային հակասություններ և այդ հակասությունները գնալով խորանում են։ Ինձ համար շատ զարմանալի և հաճելի էր, որ վարչապետը ինձ հրավիրեց իր մոտ հանդիպման, զրուցեցինք և պայմանավորվել էինք մանրամասների մասին չխոսել և ես իմ խոստումը պահել եմ, բայց վերջում նա ասաց, որ իմ ազատման դիմումի հրամանի տեքստն իր սեղանին դրած է, սակայն նա այն չի ստորագրի, կուսումնասիրի խնդիրը և որոշում կայացնելուց առաջ մեկ անգամ ևս կհանդիպի ինձ հետ»,- ասաց նա։

Սմբատ Գոգյանը նշում է, որ պարբերաբար վարչապետի օգնականների և խորհրդականների միջոցով փորձում է հիշեցնել վարչապետին այս հարցի մասին։

«Բնականաբար, լինելով պատասխանատու անձնավորություն, այս 3 ամիսների ընթացքում ամեն օր եկել եմ աշխատանքի, կատարել եմ իմ պարտականությունները։ Բայց այս իրավիճակում լավ աշխատել պրակտիկորեն անհնար է, որովհետև համակարգը ճգնաժամային վիճակում է և այս հարցի հանգուցալուծումը պետք է ստանալ, որպեսզի գիտնականները հասկանան, թե Հայաստանում գիտության և գիտականության զարգացման ինչ ռազմավարություն կա»,- ասաց ԲՈԿ նախագահը։

Հիշեցնենք, որ ԿԳՄՍ-ն հայտարարությամբ է հանդես եկել՝ տեղեկացնելով, որ բավարարել է Դիանա Գալոյանի վարչական բողոքները՝ անվավեր ճանաչելով ԲՈԿ նախագահի հրամանները․

«ԲՈԿ նախագահի՝ 09.07.2020 թ. հրամանով Դ. Գալոյանին տնտեսագիտության դոկտորի գիտական աստիճան շնորհելու մասով անվավեր ճանաչելու վերաբերյալ հարուցված վարույթը ճանաչվել է ամբողջությամբ ոչ իրավաչափ, իսկ Դ. Գալոյանին տնտեսագիտության դոկտորի գիտական աստիճան շնորհելու մասով անվավեր ճանաչելու մասին 17.07.2020 թ. հրամանը ճանաչվել է առոչինչ»,- նշված է ԿԳՄՍ հայտարարությունում։

Աղբյուր` Փաստինֆո