Փաստ ինֆո

ԱԺ «Իմ քայլ»-ը խմբակցության պատգամավորները վաղուց են մատնել իրենց մտայնությունն առ այն, որ իրենց համար Սահմանադրական դատարանի խնդիրն ունի քաղաքական բնույթ։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով ՍԴ դատավորի թեկնածու Վահրամ Ավետսիյանի թեկնածությունից հրաժարվելուն։

Պատգամավորի խոսքով երկրի բարձրագույն դատական ատյանն ընկալվում է որպես քաղաքական գործունեության սուբյեկտ. «Կարծում եմ՝ իրենց ձեռնտու է, որ ունենան հլու-հնազանդ, կամակատար դատավոր։ Էն օրը մի ուրիշ անգրագետ հայտարարում է, որ հեղափոխությունը դեռ չի մտել ՍԴ։ Մտել է օրենսդիր մարմին, գործադիր, բայց դատական ապարատ դեռ չի մտել։ Ուրեմն վայ էն երկրին, որտեղ հեղափոխությունը մտավ դատական ապարատ։ Դա նշանակում է չունենալ անկախ դատական համակարգ և պարզապես երրորդ երկրներին ցույց տալու համար բարբաջել դրա անհրաժեշտության մասին»,-ասաց պատգամավորը։

Գևորգ Պետրոսյանը նշեց, որ ամեն դեպքում Վահրամ Ավետիսյանն օգտվել է Սահմանադրությամբ իրեն վերապահված իրավունքից և որևէ մեկը չի կարող դա պիտակավորել. «Ցավալին այն է, որ Վահրամ Ավետիսյանից հետո բերելու են մի այնպիսի թեկնածու, որի ամբողջ առաքելությունը Գյումրիից Երևան քրքարշ քայլելով գալն էր։ Ուրիշ որևէ գործնական հատկանիշ, փորձառություն չունեն։ Շատ ուրախ կլինենք, որ այսուհետ ավելի պիտանի, ավելի բանիմաց ու փորձառու թեկնածուներ առաջադրվեն, բայց կասկածամիտ եմ, որովհետև Նիկոլ Փաշինյանի վերջին շրջանի կադրային քաղաքականությունը հասցրեց նրան, որ իրենց համար կարևոր չէ որևէ մասնագիտական, գործնական ունակություն։ Կարևորը քայլած լինի և իրենց ծափի տակ հինգ րոպե առաջ պար գա»,-ասաց Գևորգ Պետրոսյանը՝ նկատելով, որ երբ դատական համակարգը համալրվի սկզբունքային մարդկանցով, Նիկոլ Փաշինյանն ավելի շուտ կթուլանա, ինչի համար էլ վախենում է սկզբունքային մարդկանց նշանակելուց. «Նրան պետք են Գրիգորյան Վահեներ, որոնք ծվարեն աշխատասենյակներում, պետբյուջեն մսխեն, ոչինչ չանեն, պարգևատրվեն և այդպես վայելեն կյանքի հաճույքը։ Այնտեղ կան պատգամավորներ, որոնք պատգամավորի քվեարկության կոճակը լիֆտի կոճակից չեն տարբերում, հետևաբար նրանց կարծիքը քիչ է հետաքրքիր։ Եթե նրանք իսկապես նման նպատակ ունեն երկիրը փրկել արհավիրքից, պետք է որակյալ մարդկանց ներգրավեն»,-նշեց պատգամավորը։

Գևորգ Պետրոսյանն ուրախ է՝ Վահրամ Ավետիսյանը համոզվեց, որ դասվում է այն մարդկանց շարքին, ովքեր կարողանում են իրադրությունը սառնասրտորեն ճիշտ վերլուծել և պատիվը համբավի հետ չեն ուզում փոխանակել. «Ուրախ կլինեի, որ ինքն ընտրվեր, բայց եթե բանը հասել է նրան, որ որևէ գործնական հատկանիշ չվկայակոչելով մարդու հավակնության իրավունքն արգելափակում են, սա մեր երկրի դժբախտության դրսևորումներից մեկն է»,-հավելեց պատգամավորը։

Հիշեցնենք, որ Վահրամ Ավետիսյանը ԱԺ նախագահին է ներկայացրել «ՍԴ դատավորի պաշտոնում ընտրվելու մասին» իր համաձայնությունը հետ կանչելու վերաբերյալ դիմում։ Ֆեյսբուքյան գրառման մեջ Վահրամ Ավետիսյանը նշել էր, որ «Իմ քայլը» խմբակցության պատգամավորների մոտեցումները ՍԴ դատավորի ապաքաղաքականացվածության և անկախության վերաբերյալ համահունչ չեն իր մոտեցումներին։

Աղբյուր` Փաստինֆո