Փաստ ինֆո

Հայաստանի կառավարությունը վերացրել է  օտարերկրյա քաղաքացիների մուտքի համար արդեն 6 ամիս սահմանված արգելքը։ Այսպիսով` կառավարությունը հույս ունի, որ դա լրացուցիչ ուղևորահոսքերի խթան կհանդիսանա, ինչն էլ իր հերթին կնպաստի զբոսաշրջության աշխուժացմանը։

Տուրիզմի հայկական ֆեդերացիայի նախագահ Մեխակ Ապրեսյանը «Փաստինֆո»-ի հետ զրույցում ասաց, որ  զբոսաշրջիկների՝ Հայաստան գալու արգելքի վերացումը կատարելագործման և որոշ շտկումների կարիք ունի։

«Արգելքը օդային ճանապարհով օտարերկրացիների համար հանվում է։ Օդանավակայանում զննումը անցնելուց, եթե հիվանդություն չունեն, նրանց թողնում են երկիր, բայց պետք է ինքնամեկուսանան երկու շաբաթով։ Կարող են ինքնամեկուսացման ժամանակ ՊՇՌ թեստ հանձնեն, եթե արդյունքը լինի բացասական, կարող են դուրս գալ։ Մենք զբոսաշրջիկներին իրենց երկրում հանձնած թեստով չենք ընդունում, ասում ենք արի՝ ինքնամեկուսացի, այդ ընթացքում կարող ես հյուրանոցում թեստ հանձնել։ Դրանից հետո պատասխանին սպասեն։ Բայց եթե հանկարծ դրական է՝ ի՞նչ է տեղի ունենալու։ Այդ մարդիկ եկան ու ընկան «գերի՞»։ Լավ, ո՞վ է նրանց պահելու, որտե՞ղ։ Եթե հյուրանոցում դրական է լինում պատասխանը ու մնում են այդտեղ՝ նաև խնդիր է առաջանում հյուրանոցի և այդտեղ հանգստացողների համար։ Կարող է դա մտավախություն ու խնդիրներ առաջացնել՝ իմանալով, որ դրական արդյունքով մարդիկ կան։ Բացի դրանից՝ փչանում է այդ մարդու ճանապարհորդությունը»,- ասաց նա։

Մեխակ Ապրեսյանը դրական է համարում ջանքերը՝ ուղղված Տուրիզմի ոլորտը վերականգնելուն, սակայն կարծում է՝ ավելի ճիշտ կլինի քննարկել այն հնարավորությունը, որ արդյո՞ք կարող ենք դրսից՝ միանգամից 48 ժամվա թեստի բացասական արդյունքով մարդ ընդունել, ճանաչենք թեստն ու այդպես թողնենք։

«Միգուցե կարող ենք ֆիքսել, եթե արժանահավատություն կա թեստի մասով, ապա կոնկրետ իմանանք ո՞ր լաբորատորիաների թեստերն ենք ընդունում։ Սրան գումարվում է մեկ այլ խնդիր։ Ուկրաինական ավիաընկերությունները  վերսկսում են թռիչքները, կարծես նման վերջնական որոշումը չկա։ Արդյո՞ք կանոնավոր ուղևորափոխադրումներ են լինելու, որովհետև հիմնականում զբոսաշրջիկները գալիս են կանոնավոր չվերթներով։ Մեզ մոտ քիչ է եղել, որ չարթերներով գան։ Մենք պետք է այդ հնարավորությունը տանք և՛ կանոնավորի վերականգնման, և՛ ոչ կանոնավորի»։

Ապրեսյանը փաստում է, որ սրանք միակողմանի մտավախություններ չեն, նույն մտածմունքները կարող են ունենալ նաև զբոսաշրջիկները։

«Եթե ասում են չէ, քո թեստը կապ չունի, մեր թեստը պետք  է հանձնես՝ որպես տուրիստ համոզված չես, թե այնտեղ թեստի արդյունքը ինչպիսին կլինի։ Լինում է նաև սխալմունք։ Այսպիսով` կարող են գալ, հասնել և փչանա ճանապարհորդությունը։ Այս ամենը հաշվի առնելով՝ ցանկություն ունեցողներ մեծամասնությունը, կարծես թե, գալու մտավախություն կունենա։ Եթե նույնիսկ մենք ավելի հեշտ մեխանիզմ կիրառենք, երկրորդ հարցը կա, նրանք կարող են դիտել Հայաստանը դեռ ոչ ամենաանվտանգ երկիր և դա էլ զգուշավորության պատճառ լինի։ Մենք նախ պետք է պայմանները նախապես հստակեցնենք, որ եթե մեկ շաբաթ հետո մեզ մոտ դինամիկան լավանա, բայց մեր պայմանները այնպիսին չլինեն, որ արտերկրից պատրաստվեն մեզ մոտ գալու՝ հաշվի առնելով, որ միանգամից որոշումներ չեն ընդունում։ Պետք է բարենպաստ պայմաններ ստեղծել, որպեսզի կարողանանք մրցունակ լինել, փոքրացած շուկայում մեր տեղը չկորցնենք»։

Մեխակ Ապրեսյանն ասում է, որ տարբեր երկրներից չվերթներ վերսկսելու հետաքրքրություններ կան, օրինակ՝ Եգիպտոսը, Իրանը,։ Նրա փոխանցմամբ՝  եվրոպական երկրներից էլ հետաքրքրություններ կան, անգամ տարբեր ավիաընկերությունների ներկայացուցիչների կողմից։

«Հարցը նրանում է, արդյո՞ք թույլ ենք տալու կանոնավոր ուղևորափոխադրումներ իրականացնել։ Հիմա պետք  է որոշում, կայացնել, որովհետև ուղևորափոխադրողն էլ ժամանակ է պահանջում որոշումներ կայացնելու համար»։

Հիշեցնենք, որ նախատեսվում է սահմանել ժամանող ուղևորահոսքի որոշակի սահմանաչափ։ Օրական ուղևորահոսքի սահմանաչափը կսահմանվի ուղևորափոխադրող ընկերությունների հետ այս պահին ընթացող բանակցությունների արդյունքում։ ՀՀ քաղաքացիներն այլ երկրներ մեկնելու հնարավորություն կստանան տվյալ երկրի իշխանությունների որոշմամբ` պայմանավորված տվյալ երկրի համաճարակաբանական վիճակով։

Աղբյուր` Փաստինֆո