Փաստ ինֆո

Վարչապետն անընդհատ եթերում լինելու ցանկություն, խնդիր ունի։ Կար նպատակ իրենց ցույց տալու, նոր լսարանի առաջ ելույթ ունենալու։ «Փաստինֆո»-ի հետ զրույցում այս մասին ասաց քաղտեխնոլոգ Արմեն Բադալյանը՝ անդրադառնալով ՀՀ վարչապետ Նիկոլ Փաշինյանի՝ BBC Hard Talk-ին տված հարցազրույցին։

«Կարևոր չէ՝ ինչ է ասում, կարևորն անընդհատ եթերում լինելն է։ Դա խնդիր էր, որն իր առջև էր դրվել։ Բայց դա ձևաչափային խնդիր է, բովանդակային խնդիր, որպես այդպիսին, չկար։ Ոչ թե չկար, որովհետև Hard Talk-ի հաղորդավարն ինչ-որ բարդ հարցեր էր տալիս, այլ ուղղակի վարչապետը հստակ պատկերացում չունի՝ ի վերջո այս երկիրն ուր է ուզում տանել և 5, 10, 20 տարի հետո ինչպիսի պետություն պետք է լինի։ Այսինքն` ներքաղաքական և արտաքին քաղաքական կյանքի բոլոր բնագավառների վերաբերյալ բարեփոխային ոչ մի պատկերացում չկա։ Իսկ այդ հաղորդումն ընդամենը անգլախոս լսարանին Հայաստանի այդ բոլոր բնագավառների վերաբերյալ եղած բարեփոխումները ներկայացնելու ձևաչափ է»,-ասաց քաղտեխնոլոգը։

Վերջինս գտնում է՝ վարչապետն անգլախոս լսարանի վրա չի կարող որևէ ազդեցություն ունենալ, քանի որ այնտեղ վարչապետին դիտարկում են որպես մարդ, որը հարցազրույց է տալիս՝ անկախ նրանից, թե այդ մարն ինչ է արել կամ չի արել։ Դա լսարան չէ, որի վրա կարող են ազդել։ Ավելին, խնդիրն այստեղ նրանց վրա ազդելը չէ, այլ քո ասելիքը նրանց տեղ հասցնելն է. «Խնդիրն այն է, թե քո ասելիքն ընկալվե՞ց այդ լսարանի կողմից, և դա ինչ կդրդի այդ լսարանին անել։ Այսինքն` քեզ աջակցելու, ներդրումներ անելու, ինչ գործնական հետևանք կունենա քո ասելիքը։ Իսկ նրա ասելիքը ոչ մի գործնական հետևանք այդ լսարանի վրա չունեցավ, որովհետև չի կարող օրինակ ասել՝ Ղարաբաղը Հայաստան է և վերջ, այնուհետև մի քանի վայրկյան հետո ասի, որ պետք է Ղարաբաղի համար այնպիսի լուծում լինի, որ բավարարի երեք կողմերին։ Սա արդեն անլրջության է վերածվում։ Պատահական չէ, որ հաղորդավարն այդ պահը մի քիչ ծաղրանքով ընկալեց, որովհետև չի կարող Ղարաբաղը լինի Հայաստան և վերջ ու բավարարի Ադրբեջանին։ Սա մի քիչ նորմալ չէ»,-ասաց Արմեն Բադալյանը։

Հաջողվեց վարչապետին իր ասելիքը հասցնել միջազգային հանրությանը, թե ոչ, քաղտեխնոլոգը վստահ չէ, բայց կարծում է, որ խոսքը տեղ հասցնելու համար նախ պետք է խոսք ունենաս և հասկանաս՝ ինչ ես ուզում. «Եթե դու չգիտես՝ Ղարաբաղի հարցի վերաբերյալ ինչ ես ուզում, ո՞նց ես տեղ հասցնելու։ Ասում ես Ղարաբաղը Հայաստան է և վերջ, հետո ասում՝ Ղարաբաղի հարցի լուծումը պետք է բավարարի երեք կողմերին։ Ադրբեջանական կողմին հաստատ չի բավարարելու այս տեսակետը։ Այսինքն անորոշ ինչ-որ բան ես ասում, որ մեկը մյուսին հակասում է։ Եթե Հայաստանի ներսում դա չեն հասկանալու, անգլախոս լսարանը ո՞նց է հասկանալու քո այդ մտքերը։ Անգլախոս լսարանը սառն է դատում։ Չի նայում՝ դու ով ես, նայում է քո ասածը տրամաբանակա՞ն է, թե՞ ոչ։ Տեսնում է՝ տրամաբանական չէ, ասում է հաջողություն»,-ասաց քաղտեխնոլոգը։

Վերջինս նկատեց՝ լրագրողը բավականին լավ էր պատրաստվել և հարցերից երևում էին, որ շատ լավ գիտի՝ Հայաստանում ինչ իրավիճակ է տիրում։ Քաղտեխնոլոգի խոսքով նա ինֆորմացիա է ստացել Մեծ Բրիտանիայի արտաքին քաղաքականությունն իրականացնող կառույցներից, վերլուծական կենտրոններից. «Նա տեղեկացել է վերլուծական կենտրոնից, իսկ դա նշանակում է՝ Մեծ Բրիտանիայի վերլուծական կենտրոնները գիտեն, թե Հայաստանում ինչ է կատարվում։ Շատ լավ են տիրապետում ներսի իրավիճակին։ Նշանակում է՝ Մեծ Բրիտանիան լրագրողի միջոցով ՀՀ վարչապետին մեսիջ է ուղարկում, որ ինքը չի արդարացնում այն պլանները, ըստ որի իրեն իշխանության են բերել։ Վարչապետը սա պետք է հասկանար»,-նշեց Արմեն Բադալյանը։

Չնայած հաղորդավարի լավ պատրաստվածությանը, քաղտեխնոլոգի խոսքով վարչապետը պատրաստվածությամբ զիջում էր։ Արմեն Բադալյանը գտնում է, որ լավ պատրաստվելու համար պետք է լավ իմանալ՝ ինչ ես ուզում. «Եթե գիտես՝ ինչ ես ուզում, ենթադրում ես՝ ինչ հարցեր կարող են լինել և այդ հարցերին ինչ պատասխաններ կարող ես տալ։ Բայց եթե չգիտես, հստակություն չունես ոչ մի հարցի վերաբերյալ, ո՞նց ես պատրաստվելու»,-ասաց Արմեն Բադալյանը։

Վերջինս նաև ընդգծեց, որ ցանկալի է գերազանց տիրապետել այն  լեզվին, որով հարցազրույց պետք է տալ, քանի որ դա ոչ թե ստանդարտ հարցուպատասխան է, այլ քո տեսակետը հաղորդելու ձևաչափ, որտեղ ցանկացած մանրուք, ցանկացած լրացուցիչ բառ, ասելիքը ճիշտ է հասցնում լսարանին. «Եթե 100 տոկոսով վստահ չես, որ այդ լեզվին տիրապետում ես, որևիցե խնդիր չկա, կարող ես խոսալ հայերեն և անգլերեն գերազանց իմացող մեկը դա թարգմանի ու թարգմանության մեջ այդ երանգները դնի, որն ուզում ես շեշտադրել»,-ասաց Արմեն Բադալյանը։

Աղբյուր` Փաստինֆո