Փաստ ինֆո

ՀՀ կառավարությունը մի փաթեթ է պատրաստում, որպեսզի կարողանա ըստ արժանվույն ընդունել այն մարդկանց, որոնք ուզում են լքել Լիբանանը և գալ Հայաստան։ Այս մասին այսօր մամուլի ասուլիսի ժամանակ հայտարարեց Սփյուռքի գործերի գլխավոր հանձնակատար Զարեհ Սինանյանը։

Անդրադառնալով Բեյրութում իրավիճակի ուսումնասիրությանը՝ Զարեհ Սինանյանն ասաց, որ տեղում երկու տեսակի իրար հակասող տեղեկություն են ստացել. «Մեր հոգևոր առաջնորդների հանդիպումների ընթացքում հետևյալ պատգամն էր մեզ փոխանցվում, որ լիբանանահայությունն ամուր է, կառչած է լիբանանյան հողին, որ համայնքը վերականգնվելու է, ամրանալու է և այս ամենն անցողիկ է։

Համարյա բոլոր այլ կազմակերպությունների և մանավանդ բոլոր անհատների հետ հանդիպման ընթացքում լրիվ այլ պատգամ ստացանք։ Բացահայտ էր մարդկանց խուճապային տրամադրությունը և Լիբանանը լքելու ցանկությունը, իսկ մեծ մասի մոտ՝ գալ Հայաստան։ Խնդիրն իրականում շատ բարդ է, որովհետև մարդիկ, ունենալով նույնիսկ այդ ցանկությունը, ֆիզիկապես չեն կարող գալ, որովհետև բանկային այս սահմանափակումների արդյունքում չեն կարող իրենց գումարը բանկից դուրս հանել։ Տնտեսական լուրջ ճգնաժամի արդյունքում չեն կարողանում վաճառել իրենց բնակարանները, տները, բիզնեսները, իսկ սրանք այն գումարներն են, որոնք նախատեսում էին որպես հիմք իրենց հաջորդ հանգրվանը կերտելու համար, հետևաբար չեմ կարծում, որ այդ հոսքը միանգամից մեկ շաբաթվա, մեկ ամսվա կամ նույնիսկ մեկ տարվա ընթացքում է տեղի ունենալու։ Իհարկե, այս պահին էլ հոսք կա»,-ասաց Զարեհ Սինանյանը՝ հավելելով, որ հուլիսի 14-ի, 21-ի, 28-ի, օգոստոսի 4-ի և 11-ի «Middle East Airlien» ընկերության 5 չվերթով Հայաստան է եկել 370 մարդ. «Նրանց մեր աշխատակիցները դիմավորում են օդանավակայանում և մենք հետևում ենք՝ ինչու են եկել, ով են։ Նրանք մարդիկ են, որոնք Հայաստան են գալիս ապրելու համար»,-ասաց Զարեհ Սինանյանը։

Աղբյուր` Փաստինֆո