Փաստ ինֆո

Կազմակերպությունները կանխատեսում են՝ զբոսաշրջությունը, համապատասխանաբար նաև դրան առնչվող ծառայությունների ոլորտները նորից կհասնեն իրենց ակտիվության զգալի վերականգնման եկող գարնանը։ Այս մասին այսօր մամուլի ասուլիսի ժամանակ հայտարարեց ՀՀ էկոնոմիկայի նախարար Տիգրան Խաչատրյանը։ 

Նախարարը նշեց, որ հաշվի առնելով այս հանգամանքը՝ կառավարությունը մտադիր է զբոսաշրջությանը տրամադրվող աջակցությունը սահմանել առաջիկա 9 ամիսների համար. «Այն պահից սկսած, երբ կունենանք ավելի արագ վերականգնում և կազմակերպությունները կունենան իրենց նախորդ տարվա շրջանառությունների 70 տոկոսը գերազանցող իրացման շրջանառություն, այդ ժամանակահատվածում աջակցությունը կդադարեցվի»,-նշեց նախարարը։

Վերջինս ընդգծեց, որ այս աջակցությունից չեն օգտվի այն կազմակերպությունները, որոնք 2020 թվականի մարտից հետո անձնակազմը կրճատել են 50 տոկոսից ավելի չափով. «Մենք շատ ենք կարևորում, որ մեր գործընկեր կազմակերպությունները մեծ բարեխղճությամբ վերաբերվեն իրենց հարկային պարտավորությունները կատարելուն։ Եթե պարզվի, որ որևէ կազմակերպություն իր կողմից եկամուտները հաստատող փաստաթղթեր դուրս չի գրում, իսկ դրանք ՀԴՄ-ի շահագործման կանոնների խախտումն է և եթե այդ կազմակերպությունների կողմից հաշվարկային փաստաթղթեր դուրս չեն գրվում, ապա դա հիմք է հանդիսանում, որ կազմակերպությունը դադարի օգտվել այդ աջակցությունից»,-ասաց Տիգրան Խաչատրյանը։

Էկոնոմիկայի նախարարը նշեց, որ այս ամսվա դրությամբ կազմակերպությունները, որոնք կարող են լինել հակաճգնաժամային 23-րդ միջոցառման շահառու, ունեն 23 հազարը գերազանցող աշխատակիցներ, ինչը նշանակում է, որ այս միջոցառման շրջանակներում կառավարության կողմից աջակցվող աշխատատեղերում աշխատակիցների աշխատավարձը փոխհատուցելու քանակը կգերազանցի 6000-ը. «Կարծում ենք՝ սա զգալի չափով աջակցություն է։ Մոտավորապես ամսական հատուցվող գումարի չափը կարող է կազմել 600-700 մլն դրամ»,-հավելեց նախարարը։

Աղբյուր` Փաստինֆո