Փաստ ինֆո

Մենք Լիբանանում հայրենադարձության ընթացք չենք թելադրել։ Լիբանանում ժամանակի ընթացքում ստեղծվել են հանգամանքներ, որի արդյունքում այսօր կա այն, ինչ կա։ Այսօր հրավիրված մամուլի ասուլիսի ժամանակ այս մասին ասաց Սփյուռքի գործերի գլխավոր հանձնակատար Զարեհ Սինանյանը։

Վերջինս թվարկեց այդ հանգամանքներից մի քանիսը, այդ թվում երկարաժամկետ տնտեսական ճգնաժամը. «Ճգնաժամ, որը մի փոքր արհեստածին է, այսինքն` պարտադրված է Լիբանանի վրա, բայց որի հետևանքները շատ լուրջ են։ Մեկ տարուց ավել տևող լրջագույն բանկային համակարգի կաթվածային վիճակ։ Այնտեղ տեղի է ունենում շահերի բախման լուրջ գործընթաց. Արևմուտք, Արևելք, Իրան, ԱՄՆ։ Կարծես բոլորի շահերն այնտեղ բախվում են և մարդկանց մոտ լուրջ վախ կա, որ այնտեղ կարող են տեղի ունենալ նույնիսկ սիրական քաղաքացիական պատերազմը հիշեցնող երևույթներ»,-ասաց Զարեհ Սինանյանը։

Նա նշեց, որ Գյուլբենկյան հիմնադրամը 2019 թվականի հոկտեմբերին հարցախույզ է անցկացրել Լիբանանում, որին մասնակցել է 521 լիբանանահայ։ Հարցվածների 58 տոկոսն ասել է, որ մոտ ապագայում իրենք լքելու են Լիբանանը, իսկ հարցվածների 49 տոկոսն ասել է, որ նրանք մտածում են նաև Հայաստան գալու մասին. «Ահա մի իրականություն, որը գոյություն ուներ Լիբանանում դեռ կորոնավիրուսից և այս պայթյունից առաջ»,-նշեց Զարեհ Սինանյանը։

Սփյուռքի գործերի գլխավոր հանձնակատարն ընդգծեց, որ որպես պետություն նախ օրինական պատասխանատվություն են կրում ՀՀ քաղաքացիների նկատմամբ, իսկ հետո բարոյական պատասխանատվություն են կրում բոլոր հայրենակիցների առաջ. «Հետևաբար եթե լիբանանահայությունը լքելու է Լիբանանը, բնական է՝ ցանկանում ենք, որ նրանք Հայաստան գան»,-ասաց Զարեհ Սինանյանը։ Նա նաև նշեց, որ դեսպանատան տվյալներով այսօր մոտ 25 հազար լիբանանահայ ՀՀ քաղաքացի է։

Աղբյուր` Փաստինֆո