Փաստ ինֆո

ՀՀ վարչապետ Նիկոլ Փաշինյանը տեսակապով հարցազրույց է տվել BBC հեռուստաալիքի HARDtalk հայտնի հաղորդմանը: Հարցազրույցի ընթացքում հաղորդավար Սթիվեն Սակուրը դիմել է Փաշինյանին` նշելով, որ արդեն երկու տարի է, ինչ վերջինս իշխանության է եկել և խոսել է հայ ժողովրդի շրջանում «թավշյա հեղափոխության» հետ կապված հույսերի մասին:

«Արդեն երկու տարուց ավելի է, ինչ Դուք, այսպես կոչված, «թավշյա հեղափոխության» մեծ հույսերով եկել եք իշխանության: Երբ ես նայում եմ Հայաստանին, կարծես այժմ շատ հայեր զգում են, որ այդ հույսերը խորտակվել են: Ի՞նչն է սխալ ընթանում»,-հարցրել է հաղորդավարը: ՀՀ վարչապետը չի համաձայնել հաղորդավարի հնչեցրած մտքին:

«Ես չեմ համաձայնի Ձեր տպավորության հետ, քանի որ Հայաստանի բոլոր քաղաքացիները տեսնում են, որ իրենք ապրում են ժողովրդավար երկրում: 2019 թվականին մենք ամենամեծ տնտեսական աճն ենք ունեցել Եվրոպայում: Մեր երկիրը մեծ առաջընթաց է գրանցել բոլոր վարկանիշներով` ժողովրդավարության զարգացում, խոսքի ազատություն, անկախ դատական համակարգ, հակակոռուպցիոն քաղաքականություն: Երկու տարի անընդմեջ միջազգային պարբերականները Հայաստանը ճանաչել են որպես տարվա երկիր՝ ոչ միայն ժողովրդավարության, այլ նաև տնտեսության ոլորտում: Այո՛, կորոնավիրուսի համավարակը ընդհատեց դա, սակայն մենք շարունակելու ենք մեր թռիչքը»,-պատասխանել է ՀՀ վարչապետը:

Հաղորդավարն էլ անդրադարձավ Փաշինյանի ադմինիստրացիային։

«Ձեր ադմինիստրացիան, երևի թե, չի տեսնում այն փոփոխությունը, որ որոշ մարդիկ չստացան այն, ինչ ակնկալում էին, թե ձեր գալով կգտնեն խաղաղության ուղի Ադրբեջանի հետ, սակայն անցյալ ամիս տեսանք նոր կռիվ, նոր կոնֆլիկտ։ Նորից զոհերի մասին լսեցինք և, կարծես թե, սա նույն բանն է, և ոչ թե փոփոխություն»։

«Խաղաղությունը չի կարող լինել միակողմանի։ Կլիներ իրական խաղաղություն, եթե Ադրբեջանը պատասխաներ հայերի ջանքերին»,-պատասխանեց Փաշինյանն և ասաց, որ խաղաղության նոր ֆորմուլա է առաջարկել, երբ եկավ իշխանության, որը պետք է բավարարեր երեք կողմերին էլ, բայց Ադրբեջանի նախագահը չարձագանքեց։ Հաղորդավարն էլ հակադարձեց, թե գործերն ավելի բարձր են խոսում, քան խոսքերը և ասաց։

«Այն ինչ տեսանք հուլիսին տպավորություն չստեղծեց, թե խաղաղության միտում ուներ Հայաստանը»,-, այսպիսով` լրագրողական էթիկային դեմ գնալով, հաղորդավարը հայտնեց ադրբեջանամետ տեղեկություն, թե իբր Հայաստանն է սկսել ռազմական գործողությունները, որի արդյունքում 76-ամյա Ադրբեջանի խաղաղ բնակիչ է մահացել, ինչին Փաշինյանը պատասխանեց.
«Ադրբեջանը ռազմական հարձակում սկսեց Հայաստանի նկատմամբ, ընդ որում` դա առանձին գործողություն չէր։ Ադրբեջանի նախագահը շարունակաբար դիմում էր ռազմատենչ հռետորաբանության` ասելով, որ նա պատրաստվում է Ղարաբաղի հարցը լուծել ուժի միջոցով։ Այդ հռետորաբանության արդյունքում Ադրբեջանի կառավարությունը կանգնեց խնդրի առաջ՝ բացատրելու իր հասարակությանը, ինչու չկարողացան լուծել Լեռնային Ղարաբաղի հարցը»։

Հաղորդավարը ընդհատեց վարչապետին, ասելով, թե Հայաստանն ասում է Ադրբեջանն է սկսել, հակառակ կողմն էլ ասում է, թե Հայաստանն է սկսել գործողությունները, և ինքը չի պատրաստվում դա քննարկել իր հաղորդման շրջանակներում, սակայն ասաց, որ մի բան պարզ է, որ Փաշինյանը ամիսներ շարունակ պրովոկացիայի է դիմել, ինչն էլ պատճառ է դարձել բարձրացնելու լարվածությունը Ղարաբաղում։ Նաև օրինակ բերեց անցած տարվա օգոստոսը, երբ Փաշինյանը այցելեց Ստեփանակերտ և ելույթում ասաց, որ Արցախը Հայաստան է և վերջ և դա հաղորդավարը «գրեթե սադրանք» որակեց։

Վարչապետը հրադադարի խախտումների հետաքննության միջազգային մեխանիզմների ներդնումը պատճառաբանել է նրանով, որ միջազգային հանրությունն արդեն բավական ժամանակ հրադադարի խախտումների դեպքում ստիպված է լինում լսել երկու կողմերի փոխադարձ մեղադրանքները:

«Ես կարող եմ հասկանալ միջազգային հանրությանը, որն ամեն անգամ ստիպված է լսել կողմերի փոխադարձ մեղադրանքներն առ այն, թե ով սկսեց կամ ով առաջինը խախտեց զինադադարը։ Եվ կրկին ու կրկին դրա ականատեսն ենք լինում արդեն բավականին ժամանակ։

Այդ իսկ պատճառով մենք առաջարկում ենք ներդնել հրադադարի խախտումների հետաքննության միջազգային մեխանիզմներ։ Եվ սա միանգամայն հիմնավորված առաջարկություն է Հայաստանի կողմից»,- նշել է վարչապետը:

Հաղորդավարը նաև անդրադարձավ կորոնավիրուսի դեմ իր կառավարության մղած պայքարին՝ այն անվանելով ձախողված, ինչին վարչապետը հակադարձեց, ասելով որ դեռ վաղ է գնահատականներ տալ և չի մեկնաբանել այն փաստը, որ հարևան Վրաստանում մի քանի անգամ քիչ դեպք է գրանցվել։ Հարցին, թե ինչու է Ղարաբաղում խնջույքին առանց դիմակ եղել այն դեպքում, երբ քաղաքացիներին ամոթանք էր տալիս դիմակ չկրելու համար, Նիկոլ Փաշինյանն ասել է. «Այդ օրը մենք գործել ենք Լեռնային Ղարաբաղում գոյություն ունեցող կանոնների համաձայն»։

Հարց հնչեց նաև Սահմանադրական բարեփոխումների մասին, թե որքանով են Հայաստանի իշխանությունները անել հնարավորը, որպեսզի Սահմանադրական դատարանը լիովին համապատասխանի Հայաստանի Սահմանադրությանը:

«Պետք է շեշտեմ, որ մենք ցանկանում ենք ունենալ այնպիսի Սահմանադրական դատարան, որն ամբողջովին կհամապատասխանի մեր սահմանադրության տառին և ոգուն: ՀՀ գործող սահմանադրությունը տալիս է Սահմանադրական դատարանի ճշգրիտ նկարագրությունը, բայց իրականում մենք նախկինում ունեինք բոլորովին այլ Սահմանադրական դատարան: Այսպիսով, մենք ձգտում ենք և անում ենք հնարավորը, որպեսզի Սահմանադրական դատարանը լիովին համապատասխանի մեր Սահմանադրությանը»։

Վերջում հաղորդավարը փաստեց, որ Հայաստանը բարդ տարածաշրջանում է գտնվում և ունի ստրատեգիական ընտրություն՝ շարունակել Մոսկվային ընդունել որպես գլխավոր դաշնակից, կամ հայացքները ուղղի դեպի Եվրոպա և ՆԱՏՕ.

«Ընտրությունը Ձերն է՝ ո՞ր կողմ կտանեք Հայաստանը»,- հարցրեց հաղորդավարը, ինչին Փաշինյանը պատասխանեց, որ Ռուսաստանը ստրատեգիական կարևորության գործընկեր է, միաժամանակ ԵՄ-ի հետ ունենք գործընկերության փաստաթուղթ։ ԵՄ-ն, ի դեպ, մեր գլխավոր գործընկերն է, մենք ունենք բավականին էֆեկտիվ համագործակցություն ՆԱՏՕ-ի հետ։

Հաղորդավարը Փաշինյանին ընդհատեց, նշելով, որ եթե Հայաստանն ուզում է ամբողջական համագործակցել ՆԱՏՕ-ի կամ ԵՄ-ի հետ, խնդիրներ են առաջանալու, որովհետև Հայաստանը Թուրքիայի հետ տոքսիկ հարաբերությունների մեջ է։ Խնդիրներ կան նաև ԱՄՆ-ի հետ հարաբերություններում, որովհետև Հայաստանը համագործակցում է Իրանի Հանրապետության հետ, և երբ ԱՄՆ-ն հայտնեց, որ Հայաստանը պետք է սանկցիաներ կիրառի Իրանի նկատմամբ՝ Հայաստանը հրաժարվեց։ Նիկոլ Փաշինյանը պատասխանեց, որ մենք ունենք լավ հարաբերութուններ Իրանի, ԱՄՆ-ի հետ և Հայաստանը ամբողջապես փորձում է կատարել իր միջազգային պարտականությունները։

Աղբյուր` Փաստինֆո