Փաստ ինֆո

Կառավարությունն այսօրվա նիստում հաստատեց կորոնավիրուսի տնտեսական չեզոքացման 24-րդ միջոցառումը, որով աջակցություն կցուցաբերի գինեգործներին ու կոնյակագործներին։

ՀՀ էկոնոմիկայի նախարար Տիգրան Խաչատրյանը նշեց, որ միջոցառումը վերաբերում է խաողողի մթերումներին և գինեգործության ու կոնյակագործության ոլորտում գործող կազմակերպությունների մոտ առաջացած խնդիրները կարգավորելուն. «Ինչպես ներքին շուկայում, այնպես էլ արտահանման հիմնական շուկաներում կորոնավիրուսի տարածումն ուղղակի ազդեցություն է թողել կոնյակագործության և գինեգործության կազմակերպությունների գործունեության արդյունքների վրա։ Արտադրանքի նկատմամբ պահանջարկը նվազել է, ինչն ազդել է նաև վաճառքների ծավալի վրա։

Պաշտոնապես հաստատված վիճակագրական տեղեկություններ ունենք, որ թե՛ արտահանման, թե՛ ներքին շուկայում իրացման ծավալների ավելի քան 30 տոկոսով անկումներ են արձանագրված առանձին կազմակերպությունների, որոնք որոշակի որակական սեգմենտում են գործում։ Կազմակերպությունների վրա երկու առումով է ազդեցություն թողել. Նախ այն առումով, որ ընթացիկ դրամական եկամուտները նվազել են, որովհետև վաճառքն է նվազել և այն առումով, որ այդ ոլորտում գործունեության պայմանների վատացման հետևանքով ֆինանսական կազմակերպությունները, բանկերն ավելի զգուշավոր են այդ կազմակերպությունների հետ հարաբերություններում և ավելի մեծ դժվարությամբ են վարկավորում։ Այդ երկու գործոնները միասին վերցրած կազմակերպությունների մոտ առաջանում է ֆինանսական միջոցների որոշակի դեֆիցիտ այն ժամանակահատվածում, երբ առջևում խաղողի մթերումներն են և տեղեկություն ունենք, որ այս տարի խաղողի բերքը զգալիորեն ավելի բարձր է լինելու, քան նախորդ մի քանի տարիների ընթացքում»,-ասաց նախարարը։

Տիգրան Խաչատրյանը նշեց, որ աջակցման գործիքակազմը կոնյակի և գինու արտադրությամբ զբաղվող կազմակերպություններին սուբսիդավորվող վարկերի հատկացումն է։ Նախարարը նշեց, որ վարկն ունի որոշակի պայմաններ։

Աղբյուր` Փաստինֆո