Փաստ ինֆո

Կառավարությունն այսօրվա նիստում հաստատեց կորոնավիրուսի տնտեսական չեզոքացման 23-րդ միջոցառումը։

ՀՀ էկոնոմիկայի նախարար Տիգրան Խաչատրյանն ասաց, որ հակաճգնաժամային այս միջոցառումը վերաբերում է զբոսաշրջային ոլորտին առնչվող գործունեության մի քանի տեսակներով զբաղվող կազմակերպություններին։ Կորոնավիրուսի համաճարակի տարածումը հատկապես մեծ ազդեցություն է թողել զբոսաշրջության ոլորտին առնչվող ծառայությունների բնագավառում. «Ըստ վերջին ամիսների տվյալների՝ նշված ոլորտներում ծառայությունների մատուցումից եկամուտները նախորդ տարվա նույն ամիսների համեմատությամբ կրճատված են ավելի քան երկու անգամ։ Նշված պատճառներով առաջացած ֆինանսական դժվարությունների արդյունքում կազմակերպությունները կանգնել են բիզնեսի շարունակականության ապահովման համար անհրաժեշտ ակտիվները պահպանելու համար զգալի դժվարությունների առջև։ Այդ կազմակերպությունների համար ամենակարևոր խնդիրներից մեկն աշխատատեղերի պահպանման հետ կապված ֆինանսական դժվարությունները պահպանելու հարցն է։ Այս աջակցության նպատակը նշված ոլորտում գործունեություն իրականացնող կազմակերպությունների աշխատակազմի և աշխատատեղերի պահպանումն է և այդ աշխատատեղերի ավելացման խթանումը։

Աջակցության շահառուների շրջանակը հետևյալն է. կացության կազմակերպում, ներառում է նաև առողջարանները, հանրային սննդի կազմակերպում, զբոսաշրջային գործակալություններ և օպերատորներ և զբոսաշրջային այլ ծառայություններ։ Նախատեսվում է, որ աջակցությունից կօգտվեն այն կազմակերպությունները, որոնք ունեն առնվազն երեք աշխատակից և ստեղծվել են ոչ ուշ, քան 2020 թ.-ի մարտի 31-ը։ Եթե կազմակերպությունը զբաղվում է միաժամանակ գործունեության մի քանի տեսակներով, ապա կարող է դառնալ միջոցառման շահառու, եթե եկամուտներից կեսից ավելին ստացվել է թվարկված ոլորտներում գործունեությունից։ Աջակցության չափը կհաշվարկվի եկամուտների համամասնությամբ՝ այդ գործակիցը կիրառելով աշխատավարձի ֆոնդի նկատմամբ, որպեսզի ստացվի աշխատակիցների այն մասի վճարաչափը, որոնք հենց տուժած ոլորտներում են»,-ասաց նախարարը։

Վերջինս նշեց, որ աջակցության տևողությունը 2020 թվականի հուլիսից մինչև 2021 թվականի մարտ ամիսներն են։ Եթե ոլորտային շրջանառություններն ավելի շուտ վերականգնվեն և մեկ եռամսյակի արդյունքներով նախորդ տարվա նույն եռամսյակի համեմատությամբ գերազանցեն 70 տոկոսը, ապա աջակցության տրամադրումը կդադարեցվի։ Աջակցության եղանակը յուրաքանչյուր երրորդ կամ չորրորդ աշխատակցի աշխատավարձի սուբսիդավորումն է, ինչը նշանակում է ամբողջ աշխատավարձի ֆոնդի 33 կամ 25 տոկոս հատուցում։

Տիգրան Խաչատրյանը նշեց, որ ավելի մեծ չափով աջակցություն կստանան այն կազմակերպությունները, որոնք չնայած եկամուտների կրճատմամբ պայմանավորված դժվարություններին աջակցության ամսվա ընթացքում նախորդ տարվա նույն ամսվա համեմատությամբ պահպանել են իրենց աշխատակիցների և աշխատատեղերի ոչ պակաս, քան 70 տոկոսը։

Աղբյուր` Փաստինֆո