Փաստ ինֆո

«Անընդմեջ երկարաձգվող արտակարգ դրության ռեժիմը խնդիրներ ստեղծեց գրեթե բոլոր ոլորտների համար։ Այս ընթացքում ընդդիմությունն էլ  պարբերաբար բարձրացրել է իր ձայնը՝ փորձելով մատնանշել  այդ խնդիրները։ Իսկ ուրիշ ի՞նչ պետք է աներ քաղաքական  ընդդիմությունը, եթե այս ողջ ընթացքում բողոքի խոսք բարձրացնելու բոլոր հնարավոր ձևերը՝ ակցիաներ և այլն,  պարետատան կողմից արգելված են եղել։ Թեև հենց այդ ընթացքում էր, որ  մենք ականատես եղանք Գագիկ Ծառուկյանին ԱԱԾ հրավիրելու դրվագին , որ շատ արագ ակտիվ  փողոցային պայքարի վերափոխվեց, այնպես որ՝ ակտիվություն նույնպես եղավ»,- ասում է քաղտեխնոլոգ Կարեն Քոչարյանը՝ «Փաստինֆո»-ի հետ զրույցի ընթացքում, քննարկելով ամիսներ շարունակվող արտակարգ դրության պայմաններում ընդդիմության որդեգրած քաղաքականությունը։

-Եթե հարցը քննարկում ենք, մասնավորապես վերջին ժամանակների տեսանկյունից, ապա եկեք ֆիքսենք, որ հիմա ամառ է, իսկ տարվա այս ժամանակներին միշտ էլ քաղաքական հարաբերական անդորր է եղել։ Առհասարակ, ամռանն ամեն տեսակի ակտիվ շարժ կանգ է առնում։

-Արդյո՞ք խաղաղ ամռանը փոխարինելու կգա թեժ աշունը, ինչպես հաճախ են ասում՝ «աշունը թեժ է լինելու»։

-Այո, ճիշտ եք նկատել։ Գրեթե ամեն աշնանամուտին մենք լսում ենք այդ նախադասությունը՝  «աշունը թեժ է լինելու», ինչն, անկեղծ ասած, ինձ մոտ միշտ ծիծաղ է առաջացրել։ Բայց, հաշվի առնելով, թե ինչ տնտեսական իրադարձություններ են նախորդել այս աշնանը, կարծում եմ, որ այն, իրոք, այս տարի թեժ է լինելու։  Համենայն դեպքս անզեն աչքով իսկ երևում է, որ պրոցեսներ և վերադասավորումներ քաղաքական դաշում տեղի են ունենում։

-Ուրեմն, ի՞նչ սպասենք ընդդիմությունից այս աշնանը։

-Ընդդիմությունն, ընդհանուր առմամբ, իհարկե դեռ թույլ է։ Իսկ եթե փորձենք առարկայորեն վերլուծել դաշտի վերջին զարգացումները, ապա կտեսնենք, որ  Արթուր Վանեցյանի գլխավորությամբ «Հայրենիք» կուսակցությունը, ԲՀԿ-ն  և ՀՅԴ-ն ինչ – որ ընդհանուր  հայտարարի գալու փորձեր են անում։ Թեև, այստեղ չեմ կարող չասել այն մասին, որ վերջին 2-3  շաբաթվա ընթացքում ինձ մոտ տպավորություն է ստեղծվում, որ իշխանությունն ամեն ինչ անում է Արթուր Վանեցյանի վարկանիշը բարձրացնելու համար։

-Ինչպե՞ս։

-Թեկուզ հենց այն զվարճալի մեղադրանքով, որ հարուցվեց Արթուր Վանեցյանի դեմ։ Այս ամենից հետո  ինձ մոտ նույնիսկ այնպիսի տպավորություն է, որ իշխանությունը համագործակցում է Արթուր Վանեցյանի հետ։

- Պարոն Քոչարյան,  արտակարգ դրության երկար ձգվող ամիսների ընթացքում հաճախ կարծիք կամ տեսակետ էր հնչում, թե իշխանությունն այս տարբերակով փորձում է լռեցնել ընդդիմադիր թևին, զրկելով նրան իրական բողոքի ակցիաներ անցկացնելու հնարավորությունից։ Դուք նույնպե՞ս այս տեսակետի կողմնակիցն եք եղել։

-Ոչ։ Այստեղ ես համաձայն չեմ հավաքական ընդդիմախոսների հետ։ Այնուամենայնիվ, արտակարգ դրությունը երկարաձգվում էր՝ պայմանավորված այն հանգամանքով, որ օրական 500-ի հասնող վարակակիր էր գրանցվում։ Խոսել  այն մասին, որ այսպիսի իրավիճակում արտակարգ դրության ռեժիմը  երկարաձգվում է քաղաքական նպատակներից ելնելով՝  միայն հավաքներից խուսափելու համար, կարծում եմ անկեղծ չէ։

- Ձեր կարծիքով այս պահին հասարակության մեջ կա՞ պարպված  լուրջ  բողոք, որն առաջիկայում  կարող է վերածել խռովության մեծ ալիքի։

- Որ այս իշխանություններից հիասթափվածների արդեն իսկ  բավականին մեծ զանգված կա, դա փաստ է, իսկ թե որքանո՞վ դա  կվերածվի բողոքի մեծ ալիքի, ցույց կտա միայն երկրի սոցիալական վիճակն ու ժամանակը։ Ինչքան երկար ժամանակ տնտեսությունը շարունակի այս տեմպերով գահավիժել, այնքան բողոքի ալիքը մեծ կլինի։

- Բացի սոցիալ տնտեսական հանգամանքով պայմանավորված, չե՞ք կարծում, որ բողոքի ալիքը կարող է ակտիվանալ նաև ընդդիմադիր միասնական  լիդերի ի հայտ գալով և վերջինիս   հավանական ակտիվությամբ։  

-Անպայման։ Այն իրավիճակը, որի մասին ես խոսեցի նախորդ պատասխանում, անպայման կծնի ընդդիմադիր լիդեր։

- Որպես  քաղտեխնոլոգ, ի՞նչ եք կարծում, ո՞վ է այս պահին հավակնում ընդդիմադիր դաշտի հավանական լիդերի դերին։

- Այս պահին հստակ լիդեր չի ընդգծվում։ Թերևս, նկատելի ակտիվություն են ցուցաբերում, ինչպես վերևում  արդեն ասացի՝ «Հայրենիք», ԲՀԿ և ՀՅԴ եռյակը։ Իր տված վերջին հրապարակային հարցազրույցով  այդ երի համար առանձին հայտ ներկայացրեց նաև Հանրապետության երկրորդ նախագահ Ռոբերտ Քոչարյանը, կարծես նաև հանրապետության երրորդ  նախագահ Սերժ Սարգսյանը, իր նախընտրած ձևաչափով երկար տևող  լռությունը խախտելուց հետ։ Այսքանով հանդերձ,  մեծ հարց է, թե այս պահին ով որ դաշտում է խաղում։ Համենայն դեպս,  թվարկածս վերջին երկու անձերը ներկայանում են առանձին-առանձին։ Կարծում եմ և՛ Ռոբերտ  Քոչարյանը և՛ Սերժ Սարգսյանը շատ լավ հասկանում են, որ իրենք իրենցով չեն կարող որպես ընդդիմության լիդերներ հանդես գալ, այլ իրենց ձեռքի տակ եղած ֆինասական և հատկապես աշխարհաքաղաքական  ռեսուրսներով՝ միայն այդ պրոցեսի ակտիվ  մասնակից։

- Այնուամենայնիվ, կհիմնավորե՞ք, թե ինչու հանրապետության նախկին երկու նախահագներին չեք տեսնում ընդդիմության  անմիջական ղեկավարի դերում։

-Նրանք երկուսն էլ քաղաքականության մեջ են և սա այլ հարց է։ Ինչպես երկրորդ նախագահն ասաց իր վերջին  հրապարակային ելույթներից մեկում՝ եթե դու չես զբաղվում քաղաքականությամբ, ապա  քաղաքականությունն է զբաղվում քեզանով։ Բայց եթե խոսում ենք որպես ընդդիմադիր լիդեր հանդես գալու հավանականության մասին, ապա,  չեմ կարծում և սա պայմանավորված է մի քանի հանգամանքով և դրանցից թերևս ամենագլխավոր պատճառը նախորդների վերադարձի բացառումն է։

-Պարոն Քոչարյան, ի՞նչ եք կարծում, իշխանությունն իրեն զգո՞ւմ է իշխանության դերում, թե՞ ոչ։

- Հարցը հետաքրքիր էր... Կարծում եմ՝ իշխանությունն իրեն ավելի քան իշխանություն է զգում, այնքան շատ, որ արդեն իսկ կտրվել է ռեալ  իրականությունից ու չի հասկանում, որ  նախկին համատարած էյֆորիան վաղուց  արդեն անցել է և բավականին ջրեր են հոսել։ Այս իշխանությունն անհավանական արագ տեմպերով հհկացավ, այն առումով, որ արագ տեմպերով  կտրվեց իրականությունից և սկսեց իրենց վստահված աթոռներում ոչ թե պատասխանատու, այլ  կոմֆորտ զգալ։

- Ինչի՞ն կարող է հանգեցնել այս սցենարը։   

-Չեմ կարծում, որ իրենց համար ամենալավ սցենարների...

Հեղինակ՝ ՆվարդՄանվելյան

Աղբյուր` Փաստինֆո