Փաստ ինֆո

Կառավարության շենքի մոտ բողոքի ակցիա իրականացնող քաղաքացիները պնդում են՝ սահմանները պետք է բացվեն։ Ակցիայի մասնակիցներից մեկը լրագրողների հետ զրույցում ասաց՝ հասկանում են, որ ճգնաժամ է, բայց իրենց պետք է թողնեն գնալ, աշխատել, որ կարողանանք դուրս գալ ճգնաժամից։

«Դրա համար չե՞ք պայքարում»,-ասաց նա՝ հավելելով. «Մեր վերջը ինչ է լինելու։ Աթոռի կռի՞վ էր, ես անկուսակցական եմ, բայց ինչի՞ մենք պայքարեցինք մեր վարչապետի համար, որ այսպես անի՞, կոտորի՞ ժողովրդին։ Նախարարներդ մեկ միլիոն ու կես փող են ստանում, բայց ես վեց ամիս է՝ փող չեմ ստացել, ասում են՝ բանկերը կներեն, ինչը՞ կներեն։Մենք պայքարեցինք, ինձ էլ ծեծեցին, ասեցինք՝ արի, փոխի երկիրը, ոչ թե արի, նախարարներին կողքդ նստեցրու ու ամեն մեկին միլիոններ բաժանի։ Ես իմ ձայնը տվել եմ վարչապետին ու փոշմանել եմ ու ինձ նման հազարավոր քաղաքացիներ կան, որ փոշմանել են»։

Կառավարության շենքի մոտ ակցիայի մասնակիցներն իրենց բողոքը ներկայացրին նաև ՀՀ արտաքին գործերի նախարար Զոհրաբ Մնացականյանին։ Նրանցից մեկը, դիմելով Մնացականյանին, ասաց՝ մինչև երբ պետք է պատանդ պահեք ժողովրդին, ամբողջ աշխարհի սահմանները բաց են, իսկ մենք դեռ երկարացնում ենք արտակարգ դրությունը։ Քաղաքացու դժգոհությանն ի պատասխան Զոհրաբ Մնացականյանը հիշեցրեց, որ երկրում ստեղծված անհարմարությունները պայմանավորված են համավարակով։ Ակցիայի մասնակցիներից մեկը, ով լիբանանահայ է, դիմեց նախարարին՝ ասելով, որ իր աղջիկը Լիբանանի քաղաքացի է և ինքն արդեն մեկ տարի է, չի տեսել աղջկան։

«Ինքը հնարավորություն ունի գալ Հայաստան, քանի որ դուք Հայաստանի քաղաքացի եք և Հայաստանում եք: Այդ ամենը շատ պարզ եղել է այս շրջանում: Վերջին 3 օրվա ընթացքում Լիբանանից 3 օդանավ է եկել Հայաստան, ընդամենը 100 հոգի է եկել այդ օդանավով: Մենք այդ հնարավորությունը ստեղծել ենք: Հիմա մենք շարունակելու ենք այդ քաղաքականությունը: Ձեր աղջիկը պետք է դիմի Հայաստանի դեսպանատուն, որպեսզի կարողանա վերադառնալ Հայաստան: Այսինքն՝ պարզ հարցեր են, որոնք դուք կարող եք ճշտել, հետո նոր իմ վրա գոռալ»,– ասաց ԱԳ նախարար Զոհրաբ Մնացականյանը:

Մանրամասները՝ տեսանյութում

Աղբյուր` Փաստինֆո