Փաստ ինֆո

ԱԱԾ համակարգ չունենք։ Նիկոլը օտարի շահը պաշտպանող գործակալական ցանցի կողմից կազմված հատուկ ծրագրի իրականացնողն է մեր երկրում,- «Փաստինֆո»-ի հետ զրույցում հայտարարել է ԱԱԾ նախկին բարձրաստիճան պաշտոնյա Գուրգեն Եղիազարյանը՝ անդրադառնալով Հայոց պատմության առարկայական չափորոշիչների մշակման գործում թուրքական կողմի մասնակցության մասին ակադեմիական հանրության կողմից ԱԱԾ-ին ուղղված մտահոգություններին։

«Ինչպես պետք է այսօրվա Ազգային անվտանգությունը նայի Ազգային անվտանգության խորհրդի հետ կապված հարցերին կամ թուրքական կողմի մասնակցությամբ դպրոցների վրա կատարված այդ, այսպես ասած, դիվերսիային, երբ նրա տնօրենը 29 տարեկան մի տղա է և չի էլ հասցրել հասկանալ, թե ինքն ինչով պետք է զբաղվի։ Եթե մարդը չի հասկացել, թե ինքն ինչո՞վ պետք է զբաղվի, ապա մոտավորապես Նիկոլի օրին մեկն է։ Հետևաբար, հարց տվեք, թե ինչպե՞ս նա պետք է զբաղվի ազգային անվտանգության հետ կապված հարցերով՝ պարզ է, որ չի զբաղվի,- ասել է Գուրգեն Եղիազարյանը՝ ավելացնելով. « մեզ մնում է ժամ առաջ պրծնել Նիկոլից, ուրիշ կերպ այս հարցերը չեն լուծվելու, այլ տարբերակ չկա։ Ստացվել է այնպես, որ հիմա Հայաստանում հարցեր լուծողը՝ էնտեղ մի տիկին կա՝ Լարիսա է անունը, նա է»։

Բանախոսի խոսքերով՝ մենք հիմա ԱԱԾ համակարգ, կարելի է ասել չունենք և նույն այդ լարիսաներին այս իրավիճակը շատ ձեռք է տալիս։ «Նիկոլը օտարի շահը պաշտպանող գործակալական ցանցի կողմից կազմված հատուկ ծրագրի իրականացնողն է մեր երկրում, որի արդյունքում, քանի դեռ սրա դեմը չենք առել, պետական բարձրաստիճան պաշտոններին կտեսնենք ԼԳՊՏ համայնքի կարկառուն ներկայացուցիչների դեմքերը, իսկ ՀՀ Կառավարության շենքի աշտարակի վրա կծածանվի ԼԳՊՏ դրոշը։ Այլ կերպ ասած՝ Հայաստան պետք է չլինի, որն էլ ձեր հնչեցրած՝ առարկայական չափորոշիչների հետ կապված հարցի պատասխանն է։ Քանի դեռ ուշ չէ, քանի դեռ վերջնականապես չենք կորցրել մեր երկիրը, պետությունն ու պետականությունը, պետք է համախմբվել, կոչ անել՝ «Մերժիր Նիկոլին», իսկ մերժման այդ պրոցեսում տեսնում եմ՝ սկզբում ինձ, հետո՝ ձեզ»,- նշել է Գուրգեն Եղիազարյանը։

Հիշեցնենք, որ արդեն տևական ժամանակ հանրակրթական դպրոցների առարկայական նոր չափորոշիչների ներմուծման խնդիրը մեծ հակասությունների տեղի է տվել ինչպես ակադեմիական գիտական հանրույթի, այնպես նաև հասարակական լայն շերտերում։ Շատերի մոտ անհուն զարմանք է, թե ինչպես կարող է Հայոց պատմության առարկայական չափորոշիչների նախնական մշակման փուլում ակտիվ ներգրավվածություն ունեցած լինի թուրքական կողմը, որի մասին լուրերը ոչ միայն չեն հերքում առարկայական չափորոշիչներ մշակողներն ու համակարգող խմբի ղեկավարը, այլ նաև հստակ հայտարարում են այդ մասին։ Այս առիթով գիտական ծավալուն վեճեր են եղել նաև ակադեմիական շրջանակներում, որի արդյունքում գիտական հանրույթը կոչ եկավ պաշտոնական հայտարարությամբ, որով հորդորում էր երկրի Ազգային Անվտանգության Ծառայությանը իր վերահսկողության տակ վերցնել հարցը և կանխել վերահաս վտանգը, որ սպառնում էր թուրքական կողմի վերախմբագրմամբ դասագրքերի տեսքով մուտք գործել հանրակրթական դպրոցներ։ Խնդրի վերաբերյալ, սակայն, Ազգային Անվտանգության Ծառայության կողմից, արդեն տևական ժամանակ որևէ արձագանք կամ անդրադարձ չի եղել։

Հեղինակ՝ Նվարդ Մանվելյան

Աղբյուր` Փաստինֆո