Փաստ ինֆո

Եսայան եղբայրներին պատկանող «Թիմ» ընկերությունն առայժմ ձեռնպահ է մնում մեկնաբանել հեռահաղորդակցության խոշոր խաղացողներից՝ «Յուքոմ» ընկերության ներկայացրած հայցն ընդդեմ «Թիմ»-ի։

Հիշեցնենք, «Յուքոմ»-ը Թիմ» ՍՊԸ-ին մեղադրում է անբարեխիղճ մրցակցության մեջ, որը դրսեւորվել է «Վեոն Արմենիա» ՓԲ ընկերության բաժնետոմսերի ձեռքբերման գործարքի կնքման շուրջ ու պահանջում դատարանից՝ դադարեցնել անբարեխիղճ մրցակցությունը։ Հայցադիմումը դատարանն արդեն վարույթ է ընդունել։

«Փաստինֆո»-ի հետ զրույցում «Թիմ» ընկերությունից ասացին, որ դիմել են Երևանի ընդհանուր իրավասության դատարան՝ քաղաքացիական գործի նյութերին ծանոթանալու և դրանց պատճենները ստանալու խնդրանքով. «Անկախ մեր դիմելուց, դրանք պետք է դատարանից ստանանք օրենքով սահմանված կարգով, ինչը նույնպես դեռևս տեղի չի ունեցել։ Հետևաբար այս պահին դեռ չենք կարող ո՛չ «Յուքոմ»-ի որևէ մեկնաբանությունների գնահատական տալ, ո՛չ էլ դրանց վերաբերյալ ինքներս որևէ դիրքորոշում ձևավորել»,-հայտնեցին «Թիմ» ընկերությունից՝ ընդգծելով, որ իրենք մշտապես աշխատում են միայն թափանցիկության և մրցակցային կանոնների պահպանմամբ։

Նշենք, որ «Վեոն Արմենիա» ՓԲ ընկերության բաժնետոմսերը նախկինում ձեռք բերելու ցանկություն էր հայտնել «Յուքոմ» ընկերությունը, որտեղ նախկինում աշխատում էին «Թիմ» ընկերության համահիմնադիրներ Եսայան եղբայրները՝ հանդիսանալով նաեւ բաժնետերեր, սակայն հրապարակավ դեմ արտահայտվեցին գործարքին, ընդդիմացան Յուքոմի ղեկավարությանը։ Արդյունքում Եսայան եղբայրները դուրս եկան աշխատանքից, ստեղծեցին «Թիմ» ընկերությունն ու իրենք սկսեցին «Վեոն Արմենիա»-ի բաժնետոմսերը ձեռք բերելու շուրջ բանակցություններ վարել։ Պետական իրավասու կառույցները տվեցին իրենց համաձայնությունը ու դեռ չգնված ընկերությունը Եսայանները գրավադրեցին բանկում, քանի որ բավարար չափով գումար չունեին բաժնետոմսերի դիմաց վճարելու համար։

Ի դեպ, արձանագրենք, որ թեեւ Եսայան եղբայրները այլեւս չեն աշխատում «Յուքոմ» ընկերությունում, սակայն իրենց բաժնեմասից հրաժարվելու կամ այն վաճառելու մասին հայտարարություն չի եղել ու ստացվում է, որ Եսայան եղբայրները լինելով «Վեոն Արմենիա» -ի սեփականատեր՝ տեղյակ են նաեւ «Յուքոմ» ընկերության ծրագրերին, քանի որ հանդիսանում են բաժնետեր։ Այս ու այլ հարցերի վերաբերյալ մեկնաբանություն ստանալու համար դիմել էինք «Թիմ» ընկերության համահիմնադիր Հայկ Եսայանին ու չնայած նախնական համաձայնությանը՝ մեկնաբանություն ստանալ առայժմ չի հաջողվել։

Աղբյուր` Փաստինֆո