Փաստ ինֆո

Ջերզիում, որտեղ գրանցված է Լիդիան Ինթերնեշնլը՝ Մեծ Բրիտանիայի օվշորային գոտի է և այդտեղ ընթանում է սնանկացման պրոցես։ Եթե հիմնադիր կազմակերպությունը սննկացման գործընթացում է, ապա իրեն հիմնած դուստր կամ այլ կազմակերպությունները նույնպես պետք է այդ գործընթացում լինեն։ Այս մասին այսօր լրագրողների հետ հանդիպմանը հայտնեց բնապահպան-իրավաբան Նազելի Վարդանյանը՝ նշելով, որ պարտապանների ցուցակում կան նաեւ թուրք բաժնետերեր։ Փաստաբանը հավելեց, որ տեղեկությունը հրապարակվել է Օնտարիոյի դատարանի կայքում։

«Հիմա, որ հայտարարում են, թե եկել են այստեղ աշխատելու՝ աշխատելու ոչ մի իրավունք չունեն, որովհետև եթե ակտիվներն անցել են նոր կազմակերպություններին, ուրեմն նոր կազմակերպությունները նոր պայմաններով պետք է գան թույլտվություններ ստանան, փորձաքննություն անցնեն և այլն։ Բանկերը և վարկային կազմակերպությունները բացարձակապես հանքաարդյունաբերությամբ զբաղվելու իրավունք չունեն և, հավանաբար, այդ բաժնետոմսերը կվաճառվեն մեկ այլ ընկերության»։
Անդրադառնալով ջերմուկցիների բողոքին, Վարդանյանը նշեց, որ այն կոնկրետ Լիդիան ընկերության դեմ չէ, այլ առհասարակ այդտեղ հանքարդյունահանման դեմ է։

«Նրանց պայքարը քաղաքական չէ, և այն անձինք ովքեր ուզում են այս պայքարից քաղաքական դիվիդենտներ ստանան, սխալվում են և կարող են այլ բանով զբաղվել՝ դա անբարոյական է։ Այս վերջին 4 օրվա պայքարի ժամանակ, ովքեր որ քաղաքական նպատակով էին այնտեղ, նրանց ճանապարհ էին դնում դեպի Երևան և չէին թողնում, որ քաղաքական հայտարարություն արվի։ Սա խոսում է այն մասին, որ սա արդար պայքար է»։

Նազելի վարդանյանը հիշեցրեց, որ 10 օր առաջ գիշերը՝ ժամը 5-ին զինված պահակային խումբ է մտնում տարածք, այն դեպքում, որ մինչ այդ այդտեղ պահնորդական կազմակերպություն է եղել ու նորմալ գործունեություն է իրականացրել։ Նոր խումբը՝ առանց տարբերանշանի և օրենքի կոպիտ խախտումով, այնպիսի զենքեր ունեն, որոնք արգելված են և սադրանքի նպատակ ունենալով, պահապանների նկատմամբ հայհոյանքներ են հնչեցնում։

«Ջերմուկցիները սադրանքի չեն գնում։ Հետո դա կարգավորվեց և որոշ ժամանակ անց վագոն տնակն են հանում։ Դրան հաջորդեց Ջերմուկում, ապա Երևանում բողոքի ակցիաները։ Այստեղ տարբերակված մոտեցում ունեցավ ոստիկանությունը՝ մի դեպքու,մ երբ Լիդիանի նախկին աշխատողները ելույթ էին ունենում, որևէ մեկը չխոչընդոտեց դա, իսկ երբ որ Ամուլսարի աջակիցները իրարից հեռու բողոքի խոսքն էին ասում, կամ պաստառ էին բռնում, բոլորին տարան ոստիկանություն։ Հավասար մոտեցում չկա»։

Աղբյուր` Փաստինֆո