Փաստ ինֆո

Լուսավոր Հայաստան խմբակցության պատգամավոր Հրանտ Այվազյանը այցելել է Մղարթ համայնք:

Ֆեյսբուքյան իր էջում պատգամավորը գրառում է կատարել, որտեղ կարող եք գտնել տեղեկատվություն այցի վերաբերյալ և այցի լուսանկարները:

«Հերթական անգամ այցելել եմ Մղարթ համայնք, հանդիպել եմ գյուղացիների ու ՏԻՄ ներկայացուցիչների հետ, լսել գյուղում առկա խնդիրները, պատասխանել նրանց հուզող, հետաքրքրող հարցերին։

Նախորդ տարվա այցերի ժամանակ մղարթեցիներն ու արդվեցիները առաջնային խնդիր էին համարել ջրի խնդիրը։
Գյուղացիները մինչ օրս, անհիշելի ժամանակներից դույլերով ջուր են վերցնում գրեթե ցամաքած աղբյուրներից, կամ հնարավորության դեպքում մեքենաներով բերում այլ համայնքներից։
Գյուղի մեծերը կես կատակ կես լուրջ ասում էին, որ Մղարթ հարս չեն ուղարկում, քանի որ չեն ցանկանում, որ իրենց աղջիկները ողջ կյանքում ջրի հերթ կանգնեն ու դույլերով ջուր բերեն։

2019թ֊ի սեպտեմբերի 9֊ին դիմել եմ կառավարությանը, որից հետո որոշում է կայացվել լուծել Մղարթ և Արդվի համայնքների խմելու ջրի հարցը։
Մի քանի անգամ հայտարարվել է մրցույթ նախագծի համար, սակայն ոչ ոք չէր մասնակցել, կարծես թե հարցը մտնում էր փակուղի։
Սակայն ի ուրախություն գյուղացիների, օրեր առաջ մրցույթը կայացել է, հուսանք գործընթացը նորմալ կընթանա և շուտով կիրականանա մղարթեցիների ու արդվեցիների երբեմնի երազանքը։

Մղարթը Լոռու մարզի փոքր գյուղերից է, ապրում է շուրջ 90 ընտանիք։

Համայնքը գազաֆիկացված չէ, առաջնային խնդիրներից է ներհամայնքային ճանապարհների անմխիթար վիճակը, լուսավորությունը։

Այցի ընթացքում եղել եմ նաև դպրոցում, հանդիպել եմ տնօրինության հետ, քննարկել ենք դպրոցում և համայնքում առկա խնդիրները, զարգացման ուղիները։
Դպրոցը կարիք ունի մասնակի վերանորոգման, առաջնային խնդիրներից է սպորտդահլիճի բացակայությունը։
Մշակույթի տան մի մասը անմխիթար վիճակում էր, նպատակահարմար է վերանորոգել և օգտագործել որպես սպորտդահլիճ։

Գյուղացիները մտահոգված են, որ կառավարությունը որոշել է ցորենի ծրագրում ընդգրկել 2֊10 հա ցանքատարածք ունեցողներին, իսկ իրենց հողերը հիմնականում 0,5 հա է, և իրենք չգիտեն կնդգրկվեն թէ՞ ոչ։

Հարգելիներս, եթե ձեր համայնքներում առկա են խնդրիներ և հարցեր, որ կցանկանաք քննարկել և բարձաձայնել, կարող եք զանգահարել կամ գրել անձնական նամակով։
Ես և/կամ Լուսավոր Հայաստանի մեր պատգամավորները կայցելենք համայնք, սիրով կպատասխանենք ձեր հարցերին, տեղում ծանոթանալով խնդրներին, կքննարկենք և մեր լիազորությունների սահմաններում կձեռնարկենք համապատասխան քայլեր»,- գրել է Այվազյանը։

Աղբյուր` Փաստինֆո