Փաստ ինֆո

«Բարգավաճ Հայաստան» կուսակցության ղեկավար Գագիկ Ծառուկյանն առերես հարցաքննվել է Վազգեն Պողոսյանի հետ։ Այս մասին «Փաստինֆո»-ի հետ զրույցում ասաց Գագիկ Ծառուկյանի փաստաբանական խմբի անդամ Սմբատ Մինասյանը։ 

Նախաքննական գաղտնիքից ելնելով՝ պաշտպանը չմանրամասնեց, թե ինչ ցուցմունք է տվել Ծառուկյանն առերես հարցաքննության ընթացքում, սակայն նշեց, որ, ըստ էության համաձայնել է Վազգեն Պողոսյանի հետ, քանի որ նրանց ցուցմունքներում որևէ հակասություն չի եղել։

«Նրանց ցուցմունքներում հակասություն չկա։ Պարզապես ապահովել են հակընդդեմ հարցման իրավունքը։ Այսինքն՝ վարույթն իրականացնող մարմինը պարտավոր է ապահովել հակընդդեմ հարցման իրավունքը և մեղադրյալը պետք է ուղղի հարցերն այն մարդուն, ում ցուցմունքն ընկած է մեղադրանքի հիմքում»,- ասաց փաստաբանը՝ նշելով, որ Գագիկ Ծառուկյանի դեմ ցուցմունք չկա։

Հիշեցնենք, որ հունիսի 21-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժեց Ծառուկյանին կալանավորելու միջնորդությունը: Դատարանի այս որոշման դեմ վերաքննիչ բողոք ներկայացրեցին թե դատախազությունը, թե պաշտպանական կողմը։ Վերաքննիչ քրեական դատարանը հուլիսի 8-ին մերժեց փաստաբանների բողոքը, իսկ դատախազության բողոքը մասնակի բավարարեց՝ բեկանելով դատարանի որոշումը և ուղարկելով նոր քննության։
Վերաքննիչ դատարանի այս որոշման դեմ պաշտպանները վճռաբեկ բողոք են ներկայացրել։

Սմբատ Մինասյանը «Փաստինֆո»-ին հայտնեց, որ վճռաբեկ բողոքում ներկայացրել են առաջին ատյանի և վերաքննիչ դատարաններում բարձրացված հարցերը՝ ակնկալելով ստանալ նախադեպային որոշում։ Մասնավորապես, պաշտպանները վիճարկել են քրեական հետապնդման հարուցման օրինականության, քննչական ենթակայության, պատգամավորի անձեռնմխելիության հաղթահարման հարցերը, քաղաքական հետապնդումը, հիմնավոր կասկածի և կալանավորման հիմքերի վերաբերյալ հարցերը։ Բացի այդ՝ պաշտպանները համաձայն չեն նաև գործն առաջին ատյանի դատարան ուղարկելու վերաքննիչի որոշման հետ եւ կարծում են, որ այդպիսով խախտվել է Վճռաբեկ դատարանի իրավական դիրքորոշումը, համաձայն որի՝ Վերաքննիչ դատարանը պետք է որոշում կայացնի՝ կամ մերժի բողոքը, կամ բավարարի, ոչ թե ուղարկի Առաջին ատյանի դատարան։ Մինասյանը հայտնեց, որ վճռաբեկ բողոքը ներկայացվել է երեկ, իսկ դատախազությունը՝ օրերս, սակայն երկու ամսվա ընթացքում պետք է որոշում կայացվի՝ բողոքները վարույթ ընդունելու կամ վարույթ ընդունելը մերժելու մասին, իսկ վարույթ ընդունելուց հետո՝ ամիսների ընթացքում պետք է որոշում կայացվի դատաքննության հարցը, դա երկար գործընթաց է։ Ինչ վերաբերում է այդ ժամանակահատվածում՝ վարույթն իրականացնող մարմնի կողմից կալանավորման նոր միջնորդություն ներկայացնելուն՝ փաստաբանը նշեց, որ նոր հիմքերի առկայության դեպքում հնարավոր է, բայց հիմքերը պետք է լինեն փաստարկված, այլ ոչ թե՝ ենթադրություններ, ըստ փաստաբանի՝ նման հիմքեր չկան, նախաքննությունն իր հունով ընթանում է, մասնակցում են քննչական գործողություններին։

Հիշեցնենք, որ ԲՀԿ ղեկավար Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-ին քննադատեց իշխանությունների հակահամաճարակային գործողությունները նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում բարձրացնելով իշխանությունների 100 տոկոսի փոփոխության հարց:Հայտարարությունից հետո մամուլում շրջանառության մեջ դրվեց 1979թ Գագիկ Ծառուկյանին առնչվող խմբակային բռնաբարության գործի մասին նյութերը։

Հունիսի 14-ին Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել: Նույն օրը նա հրավիրվեց հարցաքննության՝ ՊԵԿ նախկին նախագահ Գագիկ Խաչատրյանի գործով։Հունիսի 15-ին ՀՀ գլխավոր դատախազ Արթուր Դավթյանը միջնորդություն էր ներկայացրել ԱԺ-ին՝ Գագիկ Ծառուկյանին պատգամավորական անձեռնմխելիությունից զրկելու և նրան ազատությունից զրկելու մասին։ Հունիսի 16-ին ԱԺ-ն կողմ է քվեարկեց միջնորդությանը՝ զրկելով Գագիկ Ծառուկյանին անձեռնմխելիությունից և թույլատրելով նրան ազատազրկել եւ նույն օրը Գագիկ Ծառուկյանն ԱԱԾ-ում մեղադրանք է առաջադրվել ընտրակաշառքի գործով՝ ՀՀ քրեական օրենսգրքի 38 -154.2-րդ հոդվածի 2-րդ մասի հատկանիշներով՝ ընտրակաշառք տալու համար ու քննիչը նրան կալանավորելու մասին միջնորդություն էր ներկայացրել դատարան։

Հեղինակ՝ Իզաբել Սահակյան

Աղբյուր` Փաստինֆո